Ndaundi aakomana na Siba
16
1 Rîra Ndaundi aarî akûthi aakûrûka kathûmbîri ga kîrîma aniini, Siba mûruti ngûgî wa Mefibosethi aakomana n'we, arî na mang'ooi maîrî marî na matandîko mîgongooni ya mo, makamatithîîtue mîgaate magana maîrî, ikûmbwa bia ncabiibû inyaarie îgana rîmwe, matunda îgana rîmwe ma îgiita rîa thaano, na îthatwa rîa ndibei. 2 Mûnene aûria Siba ata rî, “Wareeta bibi bia mbi?” Siba n'we amûcookeria amwîra, “Mang'ooi mama i ma gûkamataga antû ba mûciî wa mûnene, mîgaate na matunda i bia kûrîîwa n'aruti ngûgî, na ndibei n'yo n'ya kûnyunyagwa i bara bakaathirîrwa n'inya barî rwanda.” 3 Mûnene aûria, “Aabu arîkû ûyûûgu ûyu wa mwathi waku?” Siba n'we acookeria mûnene amwîra, “Atigirwe Njerusaremu, n'ûntû augire, ‘Îmunthî antû ba Isiraeri bagancookeria ûnene bwa cûûcû.’ ” 4 Rîru mûnene eera Siba ata rî, “Woone îîndî, into bia Mefibosethi bionthe i biaku.” Siba n'we auga, “Ingûgûcookeria nkaatho ndînyiîtie, kwoogu i mbone wega meethooni maaku, woû mûnene mwathi wakwa.”Simei aruma Ndaundi
5 Mûnene Ndaundi agûkinya bantû eetagwa Baurimu, i kwayire muntû wa mwîrîga wa ba Saûrû, na riîtwa rîake eetagwa Simei mwana wa Gera, na aayire akîrîrîkanaga. 6 Aayire aagera mûnene Ndaundi maiga, atongoria ba Ndaundi bonthe na acikaarî bonthe bara baarî na inya mûno bara baarî rûteere rwa ûrîo na rwa ûmotho. 7 Na Simei n'we wa akîrîrîkanaga augire ûûgû, “Umagarûka, umagarûka, mûûragani, kîîmuntû kîa ûtheri! 8 Mwathani n'akûrîanîrîîtie nthakame yonthe ya mûciî wa Saûrû, ûra woû ûkwathana bantû aake, na Mwathani akûnenkanîra ûnene njaraani cia mwana waku Abusaromu. Raitha, ûrî thîînaani n'ûntû ûrî mûûragani.” 9 Rîru Abisai mwana wa Seruya eera mûnene ata rî, “I mbi îgûtûma kurû ta îno nkuû îrîrîka mûnene mwathi wakwa? Reka nthi rûgongo rûra rûûngî nkamîgiite kîongo.” 10 Îndî mûnene auga, “I kû tûkuumania naabi, biû aana ba Seruya, wegua aarîrîkana n'ûntû i Mwathani wengwa amwîrîîte, ‘Ruma Ndaundi rî,’ aabu n'ûû ûngî agaacooka kûûria, ‘I mbi n'ûntû warûtha ûgu?’ ” 11 Ndaundi eera Abisai na aruti ngûgî baake bonthe ata rî, “Raitha, i mwana ûyû wakwa wengwa akwenda kûûnduta mwoyo. Îîndî gûkari ûgu rî, Mûbenjameni ûyû ti nkûrûki! Rekanaani n'we, kaarîrîkane, n'ûntû i Mwathani amwîrîîte arûthe bu. 12 Kwaûmbîka Mwathani akoona mathîîna mara mambûyîîrîîte, na Mwathani akandea na wega n'ûntû bwa kûrumangwa gwakwa îmunthî.” 13 Kwoogu Ndaundi na antû baake baathi bathingatîîte barabara, Simei n'we aageendeera rûteere rwa karîma beerekanîrîîte na Ndaundi. Aathiire akîrumanaga na akîgeraga Ndaundi maiga na akîûmbûraga tîîri. 14 Ndaundi na antû bonthe bara aarî nabo, bagîkinya Njorondani i baarî bakûnoga mûno, na baanogokeera oogo.
Mataaro ma Usai na Aithoferi
15 Kagiitani gaku Abusaromu na antû ba Isiraeri bonthe, baaya baakinya Njerusaremu, na Aithoferi aarî amwe n'we. 16 Na rîra Usai Mûariki, mûcoore wa Ndaundi, aayire kîrî Abusaromu, amwîra ûûgû, “Mûnene arootûûra! Mûnene arootûûra!” 17 Abusaromu aûria Usai ata rî, “Anga wega bûra ûûmba kûrûthîra mûcoore waku i bûbû? Aabu i mbi yagiriirie ûthiiyania na mûcoore ûyu waku?” 18 Usai eera Abusaromu, “Arî tibu, n'ûntû niû ndîgwatanîra na muntû ûra athuurîîtwe i Mwathani, antû baba, na antû ba Isiraeri bonthe. Niû naani nwa mwanka ntuîke wake na nkare kîrî we. 19 Na kaîrî rî, n'ûû mbatîîrue ndutîra ngûgî? Anga ti mwana wake mbatîîrue ndutîra ngûgî? Wa ta bûra ndaarutîîre abaagu ngûgî, nwabu na woû ngaakûrutîra.”
20 Rîru Abusaromu aûria Aithoferi ata rî, “Nwa weyane ûkûrû bwa bûra tûkûrûtha?” 21 Aithoferi eera Abusaromu ûûgû, “Maama na aka babu ba abaagu ba kwaiga, bara atigîîte bakaragia nyomba, na Aisiraeri bonthe bakaamenya nwînyangîîtie ngwatanîro yaku na abaagu cwe. Na antû bonthe bara bakûgwatanîra naawe bakaagîa wîru.” 22 Kwoogu baambîra Abusaromu îrema rûûgûrû rwa nyomba înu, na Abusaromu aathûnganîîra na aka bara baarî ba îthe ba kwaiga aamaama nabo akîonagwa n'antû ba Isiraeri bonthe. 23 Na ûkûrû bûra Aithoferi eeyanire ntugûûni inu bwakarire ta bwa muntû aûrîîtie Ngai. Ûgu i bu Ndaundi na Abusaromu baathûkagia ûkûrû bunthe bûra Aithoferi eeyanaga.