2 Samweri 15

Abusaromu aabanga kûregana na mûnene Ndaundi

1 Nyuma ya kagiita kaganoona, Abusaromu eecereria nkaarî ya ndûa, na mbaraathi, na antû mîrongo îtaano ba kûmuumagaragia barî mbere yake. 2 Aamenyereetie gûûkagîîra kûrîo akathi akarûngama rûteere rwa barabara mwîrîgaani wa taûni. Na wegua kûrî muntû akaaya arî na îgamba rîa kûgambwa i mûnene, Abusaromu aamwîtaga, akamûûria, “Uumîîte taûni îrîkû?” Na muntû ûyu amwîra aumîîte mwîrîgaani mûna wa Isiraeri, 3 Abusaromu aamwîraga, “Waabu, ntheto ciaku n'imbega mûno na i ciagîrîîte, îndî gûtirî muntû ûtaarîîtwe i mûnene wa kûthikîîria îgamba rîaku.” 4 Abusaromu akathi na mbere kuuga, “Ta ûkeegua ndaatuîkithua mûgiiti magamba nthîgûrû îno, rîru muntû wonthe ûra arî na îgamba akaaya kîrî niû, ntua kwonaga akûrûthîrwa bûra kûbatîîrue.” 5 Na muntû akîîya aakubî na Abusaromu akîenda kûmûturîria maru, Abusaromu aataambûrûkagia njara akamûgwata, na akamûcunca. 6 Abusaromu aarûthaga ûgu kîrî Aisiraeri bonthe bara baayaga kîrî mûnene n'ûntû bwa kûgiitîrwa magamba maao. N'ûntû bwa ûgu, antû ba Isiraeri bamwenda nkûrûki ya mûnene Ndaundi.

7 Nyuma ya mîanka înna îkûthira, Abusaromu eera mûnene ata rî, “Aba, mbîtîgîîria nthi Eburoni nkaûyûrie mûthiîtio wakwa ûra ndaathiîtîîrie Mwathani ku. 8 N'ûntû indaathiîtiirie mûthiîtio rîra ndatûûraga Ngesuri ndeeni ya Aramu, nkiugaga, ‘Wegua Mwathani na mma agancookia Njerusaremu, nkamûgonga ndî Eburoni.’ ” 9 Mûnene amwîra, “Îthi na ûkiri.” Kwoogu Abusaromu aathi bwa Eburoni. 10 Îndî Abusaromu aatûma atûmwa ba ciri mîîrîga yonthe ya Isiraeri, bauga, “Warîo bwegua rûgoci rwaringwa, rîru naabi buugîîrie nainya bûkiugaga, ‘Abusaromu n'we mûnene Eburoni!’ ” 11 Abusaromu aathiire na antû magana maîrî kuuma Njerusaremu bara baarî baathookie, na baakari woogu bataiyî bûra Abusaromu aathiîte kûrûtha. 12 Na îgiita rîra Abusaromu aarutaga igongwana biake, n'aatûmanire eetîrwa Aithoferi ûra atûûraga taûni ya Giro, ûra eeyaga mûnene Ndaundi kîrîra. Na njûri yaathi na mbere kûgîa inya nkûrûki, na antû bara baarî na Abusaromu baathi na mbere kwongeereka.

Ndaundi aatoorooka kuuma Njerusaremu

13 Mûtûmwa aaya kîrî Ndaundi, amwîra, “Nkoro cia antû ba Isiraeri mwanka agu cierekereete kîrî Abusaromu.” 14 Rîru i rîo mûnene Ndaundi eerire atongoria bara aarî nabo Njerusaremu, “Umaani na mpwî tûthiini wegua itûkwenda gûkuthûka Abusaromu! Tûthiini na mpwî, atigatwîthîre aaga atûthiria twinthe wîgue gûtirî we agaatigara taûniini îno yetû.” 15 Na atongoria babu ba mûnene bamwîra, “Raitha wone tiû itwîthuuranîrîte kûrûtha bunthe bûra mwathi wakwa mûnene ûgaatua.” 16 Kwoogu mûnene aathi, arî na antû ba mûciî wake bonthe. Îndî n'aatigire eekûrû îkûmi bara baarî ba kwaiga bamenyeera nyomba ya mûnene. 17 Mûnene aumagara aathi, na antû baake ba ndûa bonthe bamûthingata; na baarûngama mûthiani wa taûni înu ara nyomba ya mûthia yakîîtwe. 18 Na antû baake bonthe baakûrûkîîra aakubî n'we, Akerethi bonthe, Aperethi bonthe, na Angathi magana mathanthatû bara baamûthingatîîte kuuma Ngathi, baakûrûkîîra mbere ya mûnene.

19 Rîru i rîo mûnene aûriirie Itai Mûngathi, “I mbi îtûmîîte woû naawe ûtûthingata? Cooka, ûgakare na mûnene, n'ûntû woû ûrî mûgeni, na ûtiûmba gûtûûra nthîgûrû yenu. 20 N'ûntû woû ûraayire îgoro rîîkai rî, îmunthî i mbatîîrue nkwîra ûthiiyanie naati aaga na aara na ntiiyî naara nthiîte? Cooka, na ûcookanie na bara bangî ba kuuma Ngathi; na Mwathani aroobwonia kîao na gwîtîgîka gwake.” 21 Na Itai aacookeria mûnene amwîra, “Wa ta bûra Mwathani atûûraga mwoyo, na wa ta bûra mûnene mwathi wakwa arî mwoyo, wa ara mûnene mwathi wakwa akeegua arî, wana wegua i gûkua kana gûtûûra mwoyo, kinya mûruti ngûgî waku agu noogo akeegua arî.” 22 Ndaundi n'we eera Itai ata rî, “Îthi ûringanîrie rûgongo rûra rûûngî.” Kwoogu Itai Mûngathi n'we aaringa rûgongo rûra rûûngî, na antû baake bonthe na mîciî ya bara bonthe baathiyanîîtie n'we. 23 Na antû bonthe ba nthîgûrû înu i baarîraga nainya antû bonthe bakûrûkîîte. Mûnene aaringa rûgongo rûra rûûngî rwa kîguuru gîa Kindironi, na antû bara bangî bonthe baaringa baathi bwa rwanda. 24 Na ata rî, Sandoki na Arawi bonthe baaya bakamatîîte Îthandûkû rîa kîrîîkanîro rîa Ngai, nabo baigîîra îthandûkû rîru rîa Ngai nthîgûrû, mwanka rîra antû babu bonthe barîîkiirie na kuumagarûka ome ya taûni înu. Abiathari n'we aakinya. 25 Rîru mûnene eera Sandoki ata rî, “Kamata îthandûkû rîrî rîa Ngai ûrîcookie taûni. Wegua ngeetîgîrîka meethooni ma Mwathani, agaancookia kaîrî na agaatûma mbona îthandûkû rîrî kaîrî amwe na gîkaro kîarîo. 26 Îndî akambîîra, ‘Ntigûkena i woû,’ ene i niû ûyû aaga, n'andûthîre bûra akwona kûbatîîrue.” 27 Mûnene eera kinya Sandoki mûthînjîri wa Ngai ata rî, “N'ûkûmenya bûra mantû makarakari, cooka bwa taûni na ûkiri, woû na Abiathari, na aana beenu barî baîrî, Aimaasi mwana waku, na Njonathani mwana wa Abiathari. 28 Wone, niû ngeeteera mariûkooni ma rwanda, mwanka rîra ûkaandetera ntûmwa ûmbîîre bûra mantû makari.” 29 Kwoogu Sandoki na Abiathari acookia îthandûkû rîa Ngai Njerusaremu, nabo baakara noogo.

30 Îndî Ndaundi eetia na njîra ya gwîtia Karîma ka Mîceituuni, akîrîraga wa athiîte, akunîkîrîîte kîongo gîake n'ûntû bwa kîîthikîîro, na aarî mbayo i ntheri na antû bonthe bara aarî nabo i baakunîkîrîîte biongo biao na kinya bo beetia karîma bakîrîraga wabathiîte. 31 Na muntû ûmwe aapa Ndaundi ntheto amwîra, “Aithoferi n'ûmwe wa ndemi ira igwateene na Abusaromu.” Ndaundi n'we aaromba Ngai auga, “Itû Mwathani ngûkwereka ûgarûre ûûme bwa Aithoferi ûbûtuîkithie waa.” 32 Ndaundi agûkinya karîmaani kûra îgûrû kathûmbîri ara Ngai aagongagîrwa, Usai Mûariki aaya kîrî we baakomana arî na îgooti rîteembûkangu na eebakîîte mûthetu kîongo. 33 Ndaundi amwîra, “Wathiyania naani, ûkeegua ûrî mûrigo kîrî niû. 34 Îndî ûgacooka bwa taûni, na ûkeera Abusaromu, ‘Nkeegua ndî mûruti ngûgî waku, itû mûnene; wa ta bûra ndaraarî mûruti ngûgî wa abaagu kagiita gaakûrûkire, kwoogu îîndî nkeegua ndî mûruti ngûgî waku,’ rîru i rîo ûûmba kûmbînyangîria kîrîra kîa Aithoferi. 35 Anga bûtirî na Sandoki na Abiathari athînjîri ba Ngai noogo? Kwoogu mara monthe bûkeegua makîarua kuuma nyomba ya mûnene, bwîre mo Sandoki na Abiathari athînjîri ba Ngai. 36 Sandoki na Abiathari barî na aana baao baîrî noogo. Aimaasi mwana wa Sandoki, na Njonathani, mwana wa Abiathari, babu nwa ûntûmîre bo bakaaya bakambîîra mantû monthe mara ûkeegua.” 37 Kwoogu Usai, mûcoore wa Ndaundi, aacooka Njerusaremu, warîra Abusaromu nwe aakinyaga taûni înu.