Njoabu aathuuranîra gûcooka kwa Abusaromu
14
1 Njoabu mwana wa Seruya oona nkoro ya mûnene yîîrîgîîrîîte Abusaromu. 2 Kwoogu Njoabu aatûmana taûni ya Tekoa, aareeterwa mwekûrû warî ûmûûme kuuma noogo. Njoabu eera mwekûrû ûyu ata rî, “Îtuîkithie ta muntû ûrî na kîeba, na wîkîre nguo cia muntû ûkuîrîîtwe, na ûtikeebake maguta, îndî wîtuîkithie ta mwekûrû ûkuîrîîtwe na aakara îgiita rîîraaya akîrîragîra muntû ûmûkuû. 3 Na ûcooke ûthi kîrî mûnene ûmwîre bûra nthiîte gûkwîra.” Kwoogu Njoabu amwîra bûra akauga.4 Mwekûrû ûyu wa kuuma Tekoa agûkinya kîrî mûnene, eeturania aatiirithia ûthiû bwake nthîgûrû kwonania gîtîîyo, amwîra, “Itû mûnene nteethia.” 5 Mûnene amûûria, “I thîîna mbi ûrî n'yo?” Mwekûrû ûyu amûcookeria amwîra, “Menya, niû ndî mwekûrû ntigwa, mûkûrû wakwa naakuire. 6 Niû mûruti ngûgî waku ndaarî na aana baîrî ba antû arûme, na ntugû îmwe baarûa barî kîthakaani bonka na gûtaarî muntû wa kûbatuunyûkania. Ûmwe aaringa ûra ûngî amûûraga. 7 Na îîndî ûûgû antû bonthe ba mûciî ibanthûûkîîrîîte mûno bakiugaga, ‘Tûneenkere muntû ûyu araûragire mûruagina tûmûûrage, n'ûntû bwa kûruta mûruagina mwoyo; wana kinya wegua i tûkaathiria mûrea ûkua wan'we.’ Nabo bakaaya kûrûtha ûgu i ta bûmwe na kworia îkara rîakwa rîra rîtigeere, na kûthiria riîtwa rîa mûkûrû wakwa na gûtûma aaga mbeû aaga nthîgûrû.”
8 Rîru mûnene eera mwekûrû ûyu ata rî, “Înûka gwaku, na nkeeyana mawatho ma bûra gûkaarûthwa mantûûni maaku.” 9 Nwe mwekûrû ûyu wa kuuma Tekoa eera mûnene, “Mûnene mwathi wakwa, mabîtia i maakwa niû amwe na mûciî wa baaba, na ti maaku woû mûnene na gîtî gîaku kîa ûnene.” 10 Mûnene n'we amwîra, “Wegua kûrî muntû nwa ûmwe agaakûnyamaaria, ndetera we, na atikooro akûringithia kaîrî.” 11 N'we mwekûrû ûyu amûcookeria amwîra, “I ngûkwereka itû mûnene, ûrombe Mwathani Ngai waku, kaingo mûrîania wa nthakame atikaaye kûûragana, na mwana wakwa atikaûragwe.” Mûnene n'we amûcookeria amwîra, “Wa ta bûra Mwathani atûûraga mwoyo, gûtirî rûtundu nwa rûmwe rwa mwana waku rûkaagwa nthî.”
12 Rîru mwekûrû ûyu auga, “Ndakwereka, mbîtîgîîria nkwîre kiugo kîmwe, woû mûnene mwathi wakwa.” Mûnene amwîra, “Uga.” 13 Mwekûrû ûyu amûûria, “I kî n'ûntû wabaangîra antû ba Ngai mantû maathûûku ûûgû? N'ûntû rîra wauga ûgu, i ta kwonania nûkwîgambithia wengwa, n'ûntû bwa bûra ûregeete gûcookia mwana waku mûciî ûra eengatîîtue auma ku. 14 Twinthe nwa mwanka tûkue. Tûkari ta rûûyî rwîtîgîîte nthîgûrû, rûra rûtaûmba kwoywa kaîrî. Îndî Ngai atirutaga muntû mwoyo, îndî n'athuuranagîra njîra kaingo muntû ûra wîngatîîtue atigaakare kûraaya nwe. 15 Îîndî ndaaya kuuga mantû mama kîrî mwathi na mûnene wakwa n'ûntû antû babu beetû i baambîkîrîîte ûguaya; na mûruti ngûgî waku wa mwekûrû ndaathûgaania, ‘Nkaaria mantû mama na mûnene; nwa wîgue mûnene akandûthîra mantû mara nkwenda ta ndî mûruti ngûgî wake. 16 Inkûthûgaania mûnene akaambîgua, na aanteethie kuumania na muntû ûra akwenda gûtûrutaruta niû amwe na mwana wakwa kuuma nthîgûrû îra Ngai aagaîrîîre antû baake.’ 17 Na n'ûntû bwoogu ndaathûgaania, ‘Kiugo kîa mûnene mwathi wakwa gîkaanogokia; n'ûntû mûnene mwathi wakwa i ta Mûraîka wa Ngai wa kwathûrana wega na ûthûûku.’ Mwathani Ngai waku arookara amwe naawe!”
18 Mûnene amûcookeria amwîra, “Itû ûtikaarege gûncookeria bûra nthiîte gûkûûria.” Na mwekûrû ûyu amwîra, “Aria woû mûnene mwathi wakwa.” 19 Mûnene amûûria ata rî, “I Njoabu arakwîrire uuge mantû mama monthe?” Mwekûrû ûyu amûcookeria amwîra, “Wa ta bûra ûtûûraga mwoyo mûnene mwathi wakwa, ntiûmba gûkaana ûgu wauga. I mûruti ngûgî waku Njoabu aandutîîre watho ambîîra biugo bibu bionthe bira ndakwîra. 20 Mûruti ngûgî waku Njoabu n'we arûthîîte ûgu akîenda kûgarûra ûntû bûbu bûra bûkari. Îndî mwathi wakwa arî na ûûme ta bwa Mûraîka wa Ngai bwa kûmenya mantû monthe ma nthîgûrû îno.”
21 Nyumaani mûnene eera Njoabu, “Yîî, ngwîtîgîîria mantû mama; na n'ûntû bwoogu îthi ûgîîre mûthaka ûyu t'we Abusaromu.” 22 Njoabu n'we eeturania nthî na aatiirithia ûthiû nthî, n'ûntû bwa gûtîîya mûnene na aathaarima mûnene; na Njoabu auga, “Îmunthî niû mûruti ngûgî waku nkûmenya na ndoona kwendeerwa meethooni maaku, mûnene mwathi wakwa, n'ûntû mûnene akûrûthîra mûruti ngûgî wake bûra akûmûûrîîtie amûrûthîra.”
23 Kwoogu Njoabu auma agu aathi Ngesuri, aagîîra Abusaromu amûreeta Njerusaremu. 24 Îndî mûnene auga, “Abusaromu n'eenûke mûciî gwake, na atikaarekwe aambona.” Kwoogu Abusaromu eenûka gwake na atoona mûnene.
25 Gûtirî muntû ûngî Isiraeri warî na nkuma ya kûthongama ta Abusaromu; ataarî nwa koothûûku kuuma nthontia mwanka kaara ga kûgûrû. 26 Na mûthiani wa woora mwanka n'enjagwa ntundu cia kîongo gîake; eegua îgûkûra na yamûritûîra. Eenjwa, ntundu inu ciake ciathimagwa ikauma sekeri* magana maîrî, kûringana na kîthimi kîra gîetîgîîrîîtue i mûnene. 27 Abusaromu aarî na aana bathatû ba antû arûme na mwarî ûmwe. Mwarî ûyu eetagwa Tamari; aarî mwarî ûmûthongi.
28 Kwoogu Abusaromu aakarire mîanka îîrî gûku Njerusaremu, atoona mûnene. 29 Na nyuma ya ûgu Abusaromu aatûmana eetîrwa Njoabu, kaingo amûtûma kîrî mûnene; Njoabu aarega kûûya. Aacooka kaîrî amûtûmana rîa maîrî, Njoabu atatindanîra noogu. 30 Na n'ûntû bwoogu Abusaromu eera aruti ngûgî baake, “I bûkwona mûnda wa Njoabu ûrî akubî na wakwa, na arî na sayiri ku. Îthiini bûcumuuntie mwanki.” Kwoogu aruti ngûgî babu ba Abusaromu baabîîthia mûnda ûyu.
31 Rîru i rîo Njoabu aumire aathi kwa Abusaromu amûûria, “I mbi n'ûntû aruti ngûgî baaku bambîthîîrie mûnda?” 32 Abusaromu amûcookeria amwîra, “Ngûtûmanire ûûya aaga, kaingo naani ngûtûma kîrî mûnene, ûmbûûrîria we, ‘I mbi n'ûntû ndaarutirwe Ngesuri? Kaaba ûkeegua i noogo ndî.’ Îîndî ndîenda ûmbangîra nthi kûmwona, na wegua kûrî mabîtia ndî namo, rîru n'aambûrage.”
33 Rîru Njoabu aathi kîrî mûnene amwîra bûra Abusaromu augîîte. Mûnene aatûmana kîrî Abusaromu. Abusaromu agûkinya kîrî mûnene, aaturia maru mbere ya mûnene atiirithîîtie ûthiû nthîgûrû; na mûnene amûcunca.