2 Samweri 13

Amunoni aagwata Tamari

1 Ûûgû i bu waakarîkire nyuma ya kagiita kaganoona. Abusaromu mwana wa Ndaundi n'aarî na mwaragina ûmûthongi, eetagwa Tamari. I kwarî na mûruagina ûngî eetagwa Amunoni bataarî bagina ûmwe, ûra kinya we aarî mwana wa Ndaundi, n'we eenda Tamari. 2 Amunoni ûyu aatangîka nkorooni mûno mwanka aayua n'ûntû bwa mwaragina Tamari, n'ûntû aarî mwarî atamaamîîte na muntû mûrûme, na bwonekanaga bûrî ûntû bûûmo mûno kîrî Amunoni kûmûrûthîra nwa ata. 3 Îndî Amunoni n'aarî na mûcoore eetagwa Njonandabu, mwana wa Simea, mûruagina wa Ndaundi. Njonandabu aarî muntû wa ûbereera mûno. 4 Aûria Amunoni, “I kî n'ûntû woû mwana wa mûnene ûgûceng'a wa bûra gûgûkea? Ûtimbîîre?” Amunoni amwîra, “Thîîna yakwa, ndîîgua mbendeete Tamari mwarayia ûra baciaranîrîtue na mûruayia Abusaromu.” 5 Njeonandabu amwîra, “Îthi wîbayithie na ûmaame ûrîrî bwaku. Na abaagu aaya gûkûraitha, ûmwîre, ‘Ka mwarayia Tamari aaye aandûmie irio ndîe. Aruge irio bibu nkîonaga, na aambûrîre bio wengwa na njara ciake mbirîe.’ ” 6 Kwoogu Amunoni aamaama, na eebayithia, na mûnene akûûya kûmûraitha, Amunoni amwîra, “Itû aba îtîgîîria mwarayia Tamari aaye aandugîre tûgaate tûûkai nkîonaga, na kaingo aandûmia na njara ciake nturîa.”

7 Rîru Ndaundi aatûmana ntûmwa arî mûciî wake kîrî Tamari, îkiugaga, “Îthi nyomba ya mûruanyûkwe Amunoni, na ûmûrugîre irio.” 8 Kwoogu Tamari auma aathi nyomba ya mûruagina Amunoni, ara mûruagina ûyu aamaami. Tamari aathûkia mûtu, acukaanda, aarûtha tûmîgaate, na atûruga Amunoni akîonaga wengwa. 9 Na Tamari aathûkia karaî, aanenkeeria mûruagina tûmîgaate, îndî mûruagina n'we aarega kûrîa auga, “Antû bonthe i baume aaga bathi ome.” Na bonthe bauma baathi. 10 Rîru i rîo Amunoni eerire Tamari ata rî, “Ndetera irio aaga kanyomba ndeeni, kaingo ûndûmia na njara ciaku ndîa.” Tamari aathûkia tûmîgaate tûra aarugîîte, na airîra mûruagina Amunoni gûku ndeeni. 11 Îndî mwaragina akûmûreetera aakubî arîa, amûkumbata, amwîra, “Itû mwarayia ncû, tûmaame!” 12 Tamari n'we amûcookeria amwîra, “Arî mûruayia, ûtikaambire îgi, n'ûntû ûntû ta bûbu bûtibatîîrue bûrûthwa Isiraeri, tiga kûrûtha waa ta bûbu. 13 I kû nkaagenda na îgi rîrî rîgana ûûgû? Wana kinya woû ûkeegua ûgîtarwa ûrî ûmwe wa biaa bira birî Isiraeri. Na kwoogu îîndî bantû tûrûtha ûgu, itû ngûkwereka kaaba warie na mûnene, n'ûntû atiirega tûgûrana.” 14 Îndî amwe na ûgu, Amunoni ataathikîîria Tamari; na n'ûntû n'aarî na inya nkûrûki, aamûgwatire kwa inya, na aamaama n'we. 15 Na nyuma ya ûgu, Amunoni aacookire aamena Tamari na inya mûno nkûrûki. Kûmûmena kûra aamûmenire, kwanenea gwakûrûka wendo bûra aamwendeete nabu. Na Amunoni amwîra, “Ûkîîra ûthi!” 16 Tamari n'we amwîra, “Arî t'ûgu, mûruayia, n'ûntû mabîtia ma kûmbîngatia i mo makaanenea nkûrûki ya bûbu bûngî wandûthîra.” Îndî amwe na ûgu, Amunoni ataamûthikîîria. 17 Amunoni eeta mûruti ngûgî wake amwîra, “Ruta mûka ûyû aaga ntige kûmwona, na winge mûrango bwega aarîîkia kuumagara.” 18 Kwoogu mûruti ngûgî ûyu aumagarûkia Tamari na ainga mûrango. Mwarî ûyu eekîrîîte nguo yarî na njara indaaya, n'ûntû nguo ta inu i cio ciekagîrwa n'aarî ba mûnene bara bataroomamwa nabo i muntû mûrûme. 19 Tamari n'we eemincangîria muu kîongo, na aatembûranga nguo yake înu yarî na njara indaaya, na aacooka eekîra njara kîongo, aathi akîrîraga na inya wa athiîte woogu. 20 Mûruagina ûra baciaranîrîtue n'we Abusaromu akûmwona amûûria, “I mûruanyûkwe Amunoni akûrûtha ûûgû? Kira woogu mwarayia, i mûruanyûkwe, na ûtigeekîre ûntû bûbu nkoro.” Kwoogu Tamari aakara nyomba ya mûruagina Abusaromu arî na îbooru na kwîthikîîra kûûnene mûno.

21 Mûnene Ndaundi akwîgua mantû mamu monthe, n'aathûûrire mûno. 22 Îndî Abusaromu ataaria na Amunoni bwega kana bûthûûku. Abusaromu amûmena n'ûntû bwa kûgwata mwaragina Tamari.

Abusaromu aûraga Amunoni

23 Nyuma ya mîanka îîrî îkûthira, Abusaromu n'aarî na antû ba kûmwenjera ng'ondu ciake guaya naagu Mbaari-Asori akubî na mwanka wa Eburaimu, na Abusaromu aathookia nthaka cia mûnene kîathooni gîku cionthe. 24 Aathi kîrî mûnene amwîra, “Aba, ndî na kîatho gîa kwenja ng'ondu ciakwa guaya, kwoogu ingûkûûria na gîtîîyo woû na aruti ngûgî baaku bûûye kîathooni gîku.” 25 Mûnene n'we amûcookeria amwîra, “Arî, mwan'wakwa, tûtiiya twinthe, tûûya gûgûtuîkîra mûrigo.” Abusaromu amûkinyîîria, îndî amwe na ûgu ateetîgîîria kûthi, îndî n'aamûthaarimire. 26 Rîru Abusaromu amwîra, “Wegua ûtiithi, îtîgîîria tûthiiyanie na mûruayia Amunoni.” Na mûnene amûûria, “Bûthiiyanie n'we i kî?” 27 Îndî amwe na ûgu, Abusaromu aamûkinyîîrie mwanka mûnene eetîgîîria Amunoni na nthaka ira ingî cia mûnene cionthe ciathi n'we.

28 Rîru Abusaromu aapa aruti ngûgî baake watho abeera, “Bûraithîre, rîra Amunoni akeegua akeneete nkorooni yake mûno n'ûntû bwa ncoobi îra anyuîte, na rîra nkabwîra, ‘Ringaani Amunoni,’ rîru bûmûûrage. Bûtigaakuthûke. Anga twa niû ndabwîra bûmûûrage? Ûmîîriani mûno na bwîgue bûrî na ûcamba.” 29 Kwoogu aruti ngûgî ba Abusaromu baarûthîîre Amunoni wa ta bûra Abusaromu aabaathîîte. Rîru aana ba mûnene bara bangî bonthe baûkîîra, na wa kîra ûmwe waciao aatwa nyûmbû yake na aakuthûka.

30 Wa barî njîraani, Ndaundi aakinywa i ntheto i kuuga, “Abusaromu akûûraga aana ba mûnene bonthe na gûtirî nwa ûmwe aratigara.” 31 Rîru mûnene aûkîîra, na aatembûranga nguo ciake, aamaama nthî, na aruti ngûgî baake bonthe bara baarûngi aakubî n'we, wana bo i baatembûrangire nguo ciao. 32 Îndî Njonandabu mwana wa Simea, mûruagina wa Ndaundi, auga, “Mûnene wakwa tiga kûthûgaania baûragire aana ba nthaka bonthe ba mûnene, n'ûntû n'Amunoni wenka ûkuîte. N'ûntû ûntû bûbu bwaumire kanyuani ka Abusaromu kuuma ntugû îra Amunoni aagwatire mwaragina Tamari. 33 Na n'ûntû bwa ûgu, mwathi wakwa mûnene Ûtikaamake n'ûntû bwa mantû mamu, ûkîthûgaanagia n'aana ba mûnene bonthe bakuîte, na n'Amunoni wenka mûkuû.” 34 Îndî Abusaromu aakuthûka. Na mûthaka ûmwe warî mûkaria wa bantû agu aarûûngi akîraithîîria oona antû baingî beendamîîte kîrîma na njîra îra yaumîîte bwa Oronaimu. 35 Njonandabu eera mûnene Ndaundi, “Raitha wone, i baara aana ba mûnene baayîîte, wa ta bûra nkuugaga, kwoogu gûgûkarîka bu.” 36 Na akîrîîkia kwaria woogu, aana ba mûnene baakinya, na baarîra nainya mûno, wana kinya mûnene na aruti ngûgî baake bonthe baarîra mûno.

37 Ndaundi n'we aakarire akîrîragîra mwana wake ntugû nyuma ya ira îîngî. Îndî Abusaromu aakuthûka, aathi kîrî Tarumai mwana wa Amiundi, ûra aarî mûnene wa Ngesuri, 38 aakara noogo mîanka îthatû. 39 Na nkoro ya mûnene Ndaundi yerîgîîra kûthi kîrî Abusaromu, n'ûntû n'aarî agûkirakirua mantûûni ma gîkuû kîa Amunoni.