Nathani aagondokera Ndaundi
12
1 N'we Mwathani aatûma kîroria Nathani kîrî mûnene Ndaundi. Nathani aathi kîrî Ndaundi amwîra, “I kwarî na antû baîrî baatûîre taûniini îmwe. Ûmwe aarî gîtonga na ûra ûngî aarî nkea. 2 Muntû ûyu gîtonga aarî na ng'ondu na ng'ombe inyingî mûno. 3 Îndî muntû ûyu nkea we ataarî na gîntû nwa kagondu kaniini ga gaatî kara aarî akûgûra. N'we akarera, na gaakûrania amwe n'we na aana baake. Kaarîyanagîra na gakanyunyanîra n'we gîkombeeni kîmwe na gakamaama kîbaraani gîake, gaakari ta mwarî wake. 4 Ntugû îmwe mûgeni ûmwe aakinya mûciî wa muntû ûyu aarî gîtonga, na ateegagua akîenda kûthûkia ng'ondu kana ng'ombe nwa îmwe yake athînjîra mûgeni ûyu aayire kûmûriûngîra. Îndî aarûthire ûûgû, aathûkia kagondu ka muntû ûyu nkea aathînjîra mûgeni ûyu aayire gwake.”5 Ndaundi aathûûra mûno i gîtonga gîku. Na eera Nathani ata rî, “Wa ta bûra Mwathani atûûraga mwoyo, muntû ûra arûthîîte ûûgû abatîîrue akua. 6 Nwa mwanka arîee kagondu gaku maita manna, n'ûntû bwa kûrûtha ûntû ta bûbu, n'ûntû ataarî na kîao.”
7 Nathani eera mûnene Ndaundi, “Muntû ûyu t'ûngî i woû. I bu Mwathani, Ngai wa Isiraeri augîîte, ‘Ndaagûîtûûrîîrie maguta ndagûtuîkithia mûnene wa Isiraeri, na ndagûkûûra wauma inyaani ya Saûrû. 8 Na ndakwaa nyomba ya mwathi waku, na ndakwaa eekûrû ba mwathi waku bakara kîbaraani gîaku, na ndagûtuîkithia mûnene wa Isiraeri na Njunda, na ûkeegua mantû mamu maarî maakai matakûgana, ngîkwongeera mangî ta mamu. 9 I mbi n'ûntû ûbûthiirie kiugo kîa Mwathani, na warûtha mantû mathûûku akîonaga? Waûragithia Uria Mûiti na rûûyiû, na wathûkia mwekûrû wake wamûtuîkithia waku, i kîo wamûûragîîre na rûûyiû rwa antû ba Amoni. 10 Kwoogu îîndî gûtiagaga muntû wa mûciî waku akaûragagwa na rûûyiû, n'ûntû n'ûrambûthiirie, na wathûkia mwekûrû wa Uria Mûiti wamûtuîkithia mûka waku.’ 11 Mwathani ariuga ûûgû, ‘Raitha wone, ngakûretera ûthûûku bûkwîthîre buumanîîtie na mûciî waku wengwa na ngagûtuunya eekûrû baaku ûkîonaga, na mbanenkanîre kîrî muntû ûngî wa akubî naawe, n'we akaamaamaga na eekûrû babu baaku antû bakîonaga. 12 N'ûntû woû warûthire ûntû bûbu na witho, îndî niû nkaaburûtha antû ba Isiraeri bonthe bakîonaga na kûrî mûthenya riûa rîrûûngi.’ ” 13 Ndaundi eera Nathani ata rî, “I mbîyîîtie kîrî Mwathani.” Nathani n'we eera Ndaundi, “Mwathani agûkûrekera ûtiikua i wîyia bûbu. 14 Îndî n'ûntû bwa bûra warûtha ûkwaa anthû ba Mwathani kaanya kaanene ga kwaria mantû maathûûku îgûrû rîake, kaana kara gacierwe, gaku nwa mwanka gagaakua.” 15 Rîru Nathani eenûka gwake.
Nyuma ya ûgu Mwathani aatûma kaana gaku mwekûrû wa Uria aaciarire na Ndaundi, kaayua mûno. 16 Kwoogu Ndaundi aaromba Ngai n'ûntû bwa kaana, na Ndaundi aatîîrîra kûrîa, na wa kîra ûtugû aathûngagîra nyomba yake na akamaama nthîgûrû. 17 Na akûrû ba mûciî wake baarûngamaga rûteere, kaingo bamûûkîîria, îndî n'we akarega gûûkîîra, wana kinya irio ateendaga kûrîyanîra nabo.
18 Ntugû ya mûgwanja kaana gaku gaakua. Na aruti ngûgî baake i baakuthûkaga kûmwîra kaana i gaakuû. Baugire, “Rîra kaana gaku gataarî gagûkua, twamwarîîrie na ataatwîgua. N'ata rîru tûkaamwîranga i gaakuû? Nwa eerûthe ûntû bûtarî bwega wengwa.” 19 Îndî Ndaundi akwona aruti ngûgî baake bakîaranîria na kîoye, aamenya kaana gaku igaakuîte, abaûria, “I ka kaana karî gaakuû?” Bamwîra, “Îî, i gaakuû.” 20 Rîru i rîo Ndaundi aûkîîre nthîgûrû, aathamba, eebaka maguta, aacencia nguo ciake, aathi Nyomba ya Mwathania na amûgonga. Rîru aacooka eenûka gwake, eetia irio. Na akûreterwa, abirîa. 21 Aruti ngûgî baake bamûûria, “I mbi îno warûtha ûûgû? Mbere ya kaana gaka gakua, watîîrîîre kûrîa irio na wakarîrîra, îndî kaana gaku gagûkua, waûkîîra na warîa irio.” 22 Ndaundi abeera, “Yîî, i ndaatîîrîîre kûrîa na ndaarîrîra kaana gaku. Niû ndaathûgaanagia Mwathani akambîgîîrua kîao, na arigîîrie gatigaakue. 23 Aabu îîndî na kaana i gakuîte î, kûrî na gîtûmi ntîîrîra kûrîa irio? Ndaûmba gûkariûkia kaîrî? Niû kûrî ntugû îgaakinya nthi naagu karî, îndî ko, gatikooro kariûka gaancookera kaîrî.”
24 Rîru Ndaundi aakirakiria Bathiseba, mwekûrû wake, na aamaama n'we. Bathiseba aagea nda na aaciara kaana ga kaîyî, na bageeta Soromoni. Mwathani n'endire kaana gaku, 25 na aatûma kîroria Nathani na ntûmwa, aathi ageeta Njendindia,b n'ûntû Mwathani n'aakendire.
26 Kwoogu Njoabu aathi na mbere kûrûa na Raba, taûni îra nene ya antû ba Amoni, na aathûkia taûni înu ya ûnene. 27 Na Njoabu aatûma atûmwa kîrî Ndaundi na ntûmwa îkiugaga, “Nkûrûa na Raba na kinya ndaathûkia kaumo ka rûûyî rwa taûni. 28 Îîndî, thûkia njûûrî yaku ya ndûa îra îtigeere, bwithûkîre taûni înu bûmîtuunyane, wegua t'ûgu mîtuunyane ndî niû ningwa îcooke wîtanîrua na riîtwa rîakwa.” 29 Kwoogu Ndaundi eethîrania acikaarî bara bangî bonthe amwe na baathi Raba, na baarûa na antû ba noogo na bamîtuunyana. 30 N'we Ndaundi aathûkia nthûmbî ya mûnene wao îra yarî kîongo gîake. Na ûrito bwa kîraûni gîku bwarî ta kiro mîrongo îthatû na inya, na ndeeni ya kîraûni gîku kwarî na iiga rîa goro mûno, na gîekîîrwe kîongo kîa Ndaundi. Ndaundi woyu aacooka aareeta into biingî mûno bira biataîtwe kuuma taûni înu. 31 Na aathûkia antû bara baarî taûniini înu, abatuîkithia aruti ngûgî ba mîcumeeno, cururu, mathoka na kinya abatuîkithia antû ba kûruta ngûgî cia kûûmba matubaarî. Ûgu n'wabu aarûthire taûni cionthe cia Aamoni. Ndaundi na njûûrî yake yonthe baacookire Njerusaremu.