Ndaundi aathûngîîra na Bathiseba
11
1 Warî mwanjîîrioni wa mwanka,a îgiita rîra anene bathiiyaga ndûani, Ndaundi aatûmire Njoabu, na atongoria baake na njûûrî yonthe ya Isiraeri îrî amwe nwe, na baacinda Aamoni nainya mûno, na baakîîmba taûni ya Raba. Îndî Ndaundi we aatigirwe Njerusaremu.2 Ntugû îmwe ûgoro, Ndaundi aûkîîra kuuma ûrîrî bwake, eetia rûûgûrû kanyombaani ka mûnene. Arî waagu, agîcûûba oona mwekûrû ûmwe ûmûthongi mûno akîthaamba. 3 Ndaundi aatûmana akîendaga kûmenya mantû ma mwekûrû ûyu. Mûtûmwa agûcooka eera mûnene ata rî, “Mwekûrû ûyu eetagwa Bathiseba, mwarî wa Eriamu na i mwekûrû wa Uria Mûiti.” 4 Kwoogu Ndaundi aatûma atûmwa baathi kûmûretera Bathiseba. Baathi bamûthûkia, bamûretera, na Ndaundi aamaama n'we. Bathiseba n'aarî akûthiria kwîtheria kagiitaani gaku kuumania na nyambura ciake. Rîru eenûka gwake. 5 Nyumaani, Bathiseba aamenya n'aarî na nda na aatûmana kîrî Ndaundi amwîra, “Ndî ûmûrito.”
6 Kwoogu Ndaundi aatûmana kîrî Njoabu amwîra, “Ntûmîra Mûiti ûra wîtagwa Uria.” Njoabu n'we aarûtha woogu eerîîtwe. 7 Uria agûkinya, Ndaundi aamûûriirie wegua Njoabu na njûûrî ya acikaarî i baarî beega, na bûra ndûa yathiîte na mbere. 8 Rîru Ndaundi eera Uria ata rî, “Înûka mûciî ûkanogokange.” Uria auma kwa mûnene aathi, na nyumaani aathingatua kîewa kuuma kwa mûnene. 9 Îndî Uria ateenûka. Aaraarire mwîrîgaani wa kwa mûnene amwe na araaria bonthe ba mûnene mwathi wake. 10 Ndaundi akwîrwa Uria ateenûka, aamûûriirie, “Anga ûtaathiire kagiita kaaraaya? Abu î, i mbi îragiriirie wînûka?” 11 Uria aacookeria Ndaundi amwîra, “Îthandûkû rîa Ngai na njûûrî ya Isiraeri na Njunda barîkara maremaani, na mwathi wakwa na aruti ngûgî ba mûtongoria wakwa barî kambîîni naagu kîthakaani. N'ata nkîûmba kwînûka, nkarîa irio na nkanyua na nkamaama na mwekûrû wakwa? Wa ta bûra ûtûûraga mwoyo, ntirûtha ûgu!” 12 Rîru i rîo Ndaundi eerire Uria ata rî, “Kinya îmunthî raara aaga, na rûû ngakûrekeeria ûthi.” Kwoogu Uria aakara Njerusaremu ntugû înu. Rûûni, 13 Ndaundi aathookia Uria baarîa na baanyua n'we, na aatûma aatogoona i ncoobi, na ûgoro Uria aathi kîmaamooni gîake aamaama amwe na araaria ba mûnene mwathi wake, îndî ateenûka mûciî wake.
14 Rûûni rûkîîrî Ndaundi aandîkîra Njoabu baarûa, aatûma Uria n'yo amwirîra na njara. 15 Baarûani Ndaundi aandîkîîte ûûgû, “Aigaani Uria mûstarîîni wa mbere ara ndûa îmatîrîîte, na bûcooke buume agu mbere yake, atigwe kaingo aringwa akua.” 16 Na îgiita rîra Njoabu aaraûraga taûni înu, aigire Uria bantû ara aamenyaga i kwarî na ncamba cia acikaarî cia anthû baao. 17 Na antû ba taûni baumagarûka na baarûa na Njoabu, na antû bamwe ba njûûrî ya ndûa ya Ndaundi baagwa. Kinya Uria ûyu Mûiti wana we aakua.
18 Rîru Njoabu aatûmana na eera Ndaundi mantû monthe meegiî ndûa; 19 na agîtûma mûtûmwa amwatha amwîra, “Warîîkia kwîra mûnene mantû monthe ma ndûa, 20 nwa agwatwe i mûthûûro. Na agakûûria, ‘I mbi n'ûntû bwathiire aakubî na taûni înu kaingo bûrûa? I ka bûtiraiyî bakaarathana na mîgwî batweete rûthingooni rwa taûni kûra îgûrû? 21 N'ûû waûragire Abimereki mwana wa Njerubesethi?b Anga ti mwekûrû ûmwe wamwarûkîîrie iiga rîa kûthia kuuma rûthingooni kûra îgûrû, kaingo n'we akuîra Thebesi? I mbi îndî n'ûntû bûrathiire aakubî na rûthiingo?’ Mûnene akaaya gûkûûria ûgu, mwîre, ‘Mûruti ngûgî waku Uria Mûiti kinya we n'ûmûkuû.’ ”
22 Kwoogu mûtûmwa aathi, aakinya kîrî Ndaundi amwîra mara monthe Njoabu aamûtûmîîte namo amwîra. 23 Mûtûmwa eera Ndaundi ata rî, “Antû ba taûni înu i batûkîriirie inya, nabo baayire batuithûkîra ngûndûûni întheri, îndî naati twabatindîka bwa nyuma mwanka twabakinyithia mwîrîgaani wa taûni înu. 24 Rîru antû bara baiyî kûrathana na mîgwî, baaratha antû baaku kuuma rûthingooni îgûrû, na aruti ngûgî baaku bamwe i bakuîte, na mûruti ngûgî waku Uria Mûiti kinya we n'ûmûkuû.” 25 Ndaundi n'we eera mûtûmwa ûyu ata rî, “Ûûgû i bu ûkeera Njoabu, ‘Ûtigaakue nkoro i mantû mama, n'ûntû rûûyîû rûrîrîa ûyû na rûkarîa ûra ûngî. Rûa nainya mwanka ûgwate taûni înu.’ Ûmwîre ûgu kaingo ûmûûmîîria.”