Ndaundi aatura Aamoni na Aaramu
(1Karaaya 19:1-19)
10
1 Nyuma ya kagiita mûnene wa Amoni aakua, na mwana wake Anuni aatuîka mûnene bantû aake. 2 N'we Ndaundi auga, “Nkoonia Anuni mwana wa Naasi kîao, wa ta bûra kinya îthe aamboniirie kîao.” Na n'ûntû bwoogu, Ndaundi aatûma atûmwa baathi gûkirakiria Anuni n'ûntû bwa gîkuû kîa îthe. Atûmwa ba Ndaundi baathi baakinya nthîgûrû ya antû ba Amoni. 3 Îndî atongoria ba antû ba Amoni baûria Anuni mûnene mwathi wao ata rî, “Ûrîthûgaania n'ûntû bwa gîtîîyo kîa abaagu gîatûma Ndaundi aatûma atûmwa baba baaya gûgûkirakiria? Anga Ndaundi tika abatûmire kîrî woû baaya boona taûni, bamîthigaana kaingo bamîînyangia?” 4 Kwoogu Anuni aathûkia antû babu ba Ndaundi, abeenja wa kîra ûmwe waciao kîreru kîa rûthea rûmwe. Aacooka aatûrania nguo ciao gatîgatî mwanka matina maao maatigwa nja, abarekeeria baathi bakari bu. 5 Ndaundi akwîgua bûra gwakarîkire, n'aatûmire atûmwa baathi kûbeera bakarakare Njeriko mwanka ireru biao biume, na rîru bacooke n'ûntû i beekîrîîtwe nthoni mûno.6 Antû ba Amoni bakwona bagûtûma bamenwa i Ndaundi, ibaatûmanire na baakombora Aaramu ba kuuma Bethi-Reobu na ba kuuma Soba, acikaarî ba kûthi na magûrû ngiri mîrongo îîrî, na mûnene wa Maaka na antû ngiri îmwe, na antû ba Tobu, antû ngiri îkûmi na ciîrî. 7 Ndaundi akwîgua mantû mamu, n'aatûmire Njoabu na njûûrî yonthe ya acikaarî beerutane bwega barûe nabo. 8 Antû ba Amoni nabo baumagarûka baabanga njûûrî cia ndûa mwîrîgaani wa taûni, na Aaramu ba Soba na ba Reobu, na antû ba Tobu na Maaka, bo baarî bonka kîeniini. 9 Njoabu akwona atî ndûa n'yabangîîtwe mbere na nyuma yake, aataara bamwe ba acikaarî bara beega mûno ba Isiraeri ababaangania kaingo barûa na antû ba Aramu, 10 na Acikaarî babu bangî baatigeere, abagaiga ruungu rwa ûtongoria bwa mûruagina Abisai, na kinya bo ababaangania kaingo barûa na Aamoni. 11 N'we Njoabu eera Abisai ata rî, “Wegua Aaramu bagankîria inya, ûûye ûnteethie, îndî wegua antû ba Amoni bagagûkîria inya, rîru nkaaya gûgûteethia. 12 Ûmîîria, na tûrûe na ûcamba mûno n'ûntû bwa antû beetû, na n'ûntû bwa taûni cia Ngai wetû, na Mwathani aroorûtha bûra akwona kûbatîîrue.”
13 Kwoogu Njoabu na antû bara baarî amwe n'we, bathengaangîîra ndûani baathi kûrûa na antû ba Aramu; nabo Aaramu babu baakuthûka. 14 Na antû ba Amoni bakwona antû ba Aramu baakuthûka, kinya bo baakuthûka Abisai, na baathûngîra taûni. Nyuma ya ûgu Njoabu aacooka aumîîte kûrûa na antû ba Amoni, na aakinya Njerusaremu.
15 Îndî antû ba Aramu bakwona bagûcindwa n'antû ba Isiraeri, i bacookanîîre amwe bonthe. 16 Mûnene Andandeseri n'aatûmanire, na Aaramu bara baarî rûgongo rwa Yufîrîti baareetwa, na baaya Eramu, barî amwe na Sobaki mûtongoria wa njûûrî ya Andandeseri abatongorereetie. 17 Na Ndaundi akwîrwa mantû mamu, aacookanîîria njûûrî ya ndûa ya Isiraeri yonthe amwe, na baaringanîria muuro wa Njorondani baakinya Eramu. Na antû ba Aramu beebangania bongwa kaingo barûa na Ndaundi, na baarûa n'we. 18 Îndî Aaramu baugia bakuthûkîîte Aisiraeri, Ndaundi n'we aûraga Aaramu magana mûgwanja bara baathiithagia nkaarî cia ndûa, na athiithia ba mbaraathi ngiri mîrongo înna. Na aacooka aaguraria Sobaki mûtongoria wa njûûrî yao ya ndûa, na Sobaki aakuîra noogo. 19 Na anene bonthe bara baathagwa ni Andandeseri bakwona bagûcindwa n'antû ba Isiraeri, baarûtha ûkiri na Isiraeri, na baatua kwathagwa i bo. Na n'ûntû bwoogu Aaramu baakuthûka gûteethia antû ba Amoni kaîrî.