Ndaundi aateethia mûciî wa Saûrû
9
1 Ntugû îmwe Ndaundi aûria, “Kûrî muntû nwa ûmwe wa mûciî wa Saûrû ûtigeere, ûra mbûûmba kwonia kîao n'ûntû bwa Njonathani?” 2 Na kwegua i kwarî na mûruti ngûgî ûmwe wa mûciî wa Saûrû eetagwa Siba. Siba eerwa n'athi kîrî Ndaundi. Agûkinya mûnene amûûria, “I woû Siba?” Siba n'we amûcookeria amwîra, “Yîî i niû, mûnene.” 3 Na mûnene amûûria, “Mwanka agu rî, gûtirî muntû nwa ûmwe ûtigeere wa mûciî wa Saûrû, kaingo mmwonia wega bwa Ngai?” Siba eera mûnene, “Kûrî na mwana wa Njonathani ûrî oogo, n'we n'ûmwonju magûrû monthe.” 4 Mûnene amûûria, “Arîkû we?” Siba eera mûnene, “Arî mûciî kwa muntû eetagwa Makiri mwana wa Amieri, bantû eetagwa Rondebari.” 5 Rîru mûnene Ndaundi aatûmana mwana ûyu aagîîrwa mûciî kwa Makiri mwana wa Amieri, naagu Rondebari. 6 Mefibosethi, mwana wa Njonathani, ûyûûe wa Saûrû, agûkinya, aakuamîîria mbere ya mûnene mwanka ûthiû bwatongithia nthîgûrû akîmûtîîya. Na Ndaundi auga, “Mefibosethi!” N'we Mefibosethi aacookia, “Yîî i niû, mûnene.” 7 Ndaundi n'we amwîra, “Ûtigaakuthûke, na mma ngakwonia kîao n'ûntû bwa abaagu Njonathani, na ngagûcookeria kîthaka kîa ûyûûgu Saûrû kîonthe, naawe ûkaarîîyaga irio meethaani yakwa magiita monthe.” 8 Mefibosethi aaturia maru kaîrî na auga, “Niû twaka ndî mûkûûrani na kurû înkuû, aba! I mbi n'ûntû ûkûnthûkia bwega ûûgû?”9 Rîru mûnene eeta Siba, ûra aarî mûruti ngûgî wa Saûrû amwîra, “Into bionthe bira biarî bia Saûrû na bia mûciî wake unthe nkûbinenkanîra kîrî Mefibosethi ûyûûe wa mwathi waku. 10 Woû na aana baaku amwe na aruti ngûgî baaku i biû bûkaamûrîmagîra mûnda wake na bûmwînûkagîrie maketha, kaingo ûyûûe wa mwathi waku eegua arî na irio bia kûrîa. Îndî Mefibosethi ûyûûe wa mwathi waku we, akaarîîyaga irio meethaani yakwa rîonthe.” Siba aarî na aana îkûmi na bataano ba antû arûme na aruti ngûgî mîrongo îîrî. 11 Siba aacookeria mûnene amwîra, “Aba, ûrî mûnene, mwathi wakwa, bunthe bûra ûkambîîra ndûthe, mûruti ngûgî waku akaarûtha.” Kwoogu Mefibosethi we aarîîyagîra meethaani ya Ndaundi taka aarî ûmwe wa aana ba mûnene. 12 Na Mefibosethi n'aarî na mwana ûmûniini eetagwa Mika. Na antû bonthe bara baakaraga mûciî wa Siba baatuîkire aruti ngûgî ba Mefibosethi. 13 Kwoogu n'ûntû Mefibosethi n'aarî ûmwonju magûrû monthe, aatûûra Njerusaremu, akîrîîyaga irio meethaani ya mûnene magiita monthe.