Kûûmbana kwa Ndaundi ndûani
(1Karaaya 18:1-17)
8
1 Nyuma ya kagiita mma, Ndaundi aarûa na Afirisiti abacinda na aatua kûbaatha, na abatuunya taûni yao îra yetagwa Methegi-ama.a 2 Aacooka aatura antû ba Moabu. Rîru aathana acikaarî bamaame nthîgûrû mûtûrûtûrû, rîru abathima na rûrigi. Aathima ithimi biîrî bia mûtûrûtûrû ûyu na rûrigi rûru, babu bakaûragwa, aathima kîthimi kîmwe babu bagatigwa barî mwoyo. Na antû ba Moabu baatua kwathagwa i Ndaundi bakîmûrutagîra ûgooti. 3 Ndaundi aacinda kinya Andandeseri mwana wa Reobu, mûnene wa Soba, wa arî njîraani athiîte kûriûkia wathani bwake rûteere rwa muuro wa Yufîrîti. 4 Ndaundi n'we amûtuunya antû ngiri îmwe na magana mûgwanja bara baathiiyaga bakamatîîtwe i mbaraathi, na acikaarî ngiri mîrongo îîrî bara baathiiyaga na magûrû, na mbaraathi ciao cionthe cia nkaarî cia ndûa, Ndaundi aigiitanga mîkunu ciatua kûthua. Îndî n'aatigariirie mbaraathi îgana cia gûkururia nkaarî cia ndûa. 5 Na Aaramu ba kuuma Ndamasiki bakûûya gûteetheeria Andandeseri mûnene wa Soba, Ndaundi aabaûragire ngiri mîrongo îîrî na ciîrî. 6 Na nyuma ya ûgu Ndaundi aaka kambî cia acikaarî nthîgûrû ya Aramu, na Aaramu baatuîka aruti ngûgî baake na baatua kûmûrutagîra ûgooti. Na Mwathani n'eyaga Ndaundi ûûmbani wa ara onthe aathiiyaga. 7 Ndaundi aathûkia rong'o cia thaabu ira ciarî cia aruti ngûgî ba Andandeseri, na aciira Njerusaremu. 8 Na mûnene Ndaundi n'aathûkiirie kîthimi kîînene kîa rûthuku kuuma bwa Mbeta na Mberothai, taûni cia Andandeseri. 9 Tou mûnene wa Amathi akwîgua Ndaundi n'acindire njûûrî yonthe ya Andandeseri, 10 N'aatûmire mwana wake Njoramu kîrî mûnene Ndaundi, amûkeethia na amûkumîîria n'ûntû bwa kûrûa na Andandeseri na amûcinda. N'ûntû magiita maingî Andandeseri baakaraga bakîrûaga na Tou. Njoramu n'aayire na biewa bia fetha, thaabu na bia rûthuku aaretera Ndaundi. 11 Mûnene Ndaundi n'aathûrire into bibi bionthe kinya bio kîrî Mwathani amwe na fetha na thaabu îra aathûrîîte kuuma mîgongo yonthe îra aarî agûcinda, 12 kuuma Aramu,b Moabu, Amoni, Afirisiti, na Aamareki, na bira biataîtwe kuuma kwa Andandeseri mwana wa Reobu, mûnene wa Soba.13 Ndaundi n'agîîre îgweta nyuma ya agûcooka kuuma naara aarî akûûraga antû ba Endomu ngiri îkûmi na inyanya kîbondeeni kîa Mwonyo. 14 Rîru aarûtha kambî cia acikaarî gûku Endomu kunthe, na antû ba Endomu bonthe baatuîka aruti ngûgî ba Ndaundi. Na Mwathani n'eyaga Ndaundi kûûmbana wa ara onthe aathiiyaga.
Atongoria ba thirikaarî ya Ndaundi
15 Ndaundi aathana Isiraeri yonthe, akîrûthaga bûra bwarî bwa mma na bûra kûbatîîrue kîrî antû baake bonthe. 16 Njoabu mwana wa Seruya aarî mûtongoria wa njûûrî ya acikaarî; na Njeosafati mwana wa Airundi n'we aarî mûririkanania. 17 Sandoki mwana wa Aitubu na Aimereki mwana wa Abiathari babu baarî athînjîri ba Ngai; na Seraya n'we aarî mwandîki. 18 Na Benaya, mwana wa Njeoyanda, n'we aarûngamîrîîte Akerethi na Aperethi; nabo aana ba Ndaundi baarî athînjîri ba Ngai.