Wîrane bwa Ngai kîrî Ndaundi
(1Karaaya 17:1-15)
7
1 Mûnene Ndaundi aakaraga nyomba yake ya ûnene, na Mwathani n'amûnenkereete ûkiri nyuma ya gûcinda anthû baake bonthe bara baamûthiûrûkîîrîîte, 2 eera kîroria Nathani, “Ta raitha îîndî wone, niû ntûûraga nyomba yakîîtwe na mîthithinda, îndî îthandûkû rîa Ngai rîo rîaigagwa îremaani.” 3 Nathani n'we amwîra, “Îthi ûrûthe bunthe bûra ûkûthûgaania n'ûntû Mwathani arî amwe naawe.”4 Îndî ûtugû wa bûbu kiugo kîa Mwathani gîakinyîra Nathani kîamwîra ata rî,
5 “Îthi wîre mûruti ngûgî wakwa Ndaundi, ‘Ûûgû i bu Mwathani akuuga: Ti woû ûkambakîra nyomba ya gûtûûra. 6 Ntaarotûûra nyomba kuuma ntugû îra ndaarutire antû ba Isiraeri Miisiri mwanka îmunthî. Îndî nwaka ndarathiûrûûkaga ngîtûûraga îremaani. 7 Î bungwa rî, gûntû kunthe kûra mbîrîga kûthi na antû ba Isiraeri, ndaraaro mbûûria mûtongoria wao nwa ûrîkû ûra mbathîîte amenyeere antû baakwa, i kî n'ûntû ataambakîra nyomba ya mîthithinda?’
8 Kwoogu îîndî îthi wîre mûruti ngûgî wakwa Ndaundi ata rî, ‘Mwathani wa Njûûrî ariuga ûûgû, Ndaakûrutire rûriîni watiga kûthingata ng'ondu, ndagûtuîkithia mûtongoria wa antû baakwa Isiraeri. 9 Na wa ara onthe wathiyaga ndeegagua ndî amwe naawe. Na i nthirîîtie anthû baaku bonthe bauma mbere yaku, na ngatûma riîtwa rîaku rîmenyekana, ta mariîtwa ma antû bara barî îgweta mûno nthîgûrû. 10 I ndaathuurîîre antû baakwa ba Isiraeri gûntû kwao na ndabaanda ku kaingo batûûra bantû aago ara batagîtangwa kaîrî. Na antû bara bathûûku batibainyîîria kaîrî ta bûra baarûthaga mbereeni, 11 kuuma kagiitaani gaku ndaathuurire agiiti magamba barûngamîîra antû baakwa Isiraeri. Nkabwaa ûkiri kuumania na anthû baaku bonthe. Na kaîrî Mwathani arîkwîra agaatuîkithia nciarwa ciaku anene. 12 Rîra ntugû ciaku cia mûthia aaga nthîgûrû igaakinya na ûmaame amwe na biûyûûyû biaku, ngaûkîîria ûmwe wa rûrîîyo rwaku, ûra ûkeegua arî mwana waku wengwa, na ngaatûma ûnene bwake bwîgua bûrî na inya. 13 N'we akaambakîra nyomba yakwa, na nkaarikithia ûnene bwake tene na tene. 14 Niû nkeegua nkari ta îthe, n'we eegue akari ta mwan'wakwa. Aarûtha mabîtia, nkamûrûûnga ta bûra aana barûûngagwa na mûthanju n'aciari baao. 15 Îndî ntikoorothiria ngwatanîro yakwa n'we, ta bûra ndamîthiriirie kuuma kîrî Saûrû, ûra ndaarutire kaingo ûtuîka mûnene. 16 Na mûciî waku ûtiithira na nciarwa ciaku igaatûûra irî anene tene na tene.’ ”
17 Kûringana na biugo bibi bionthe, na kûringana na bûra kîoneki gîkî kîonthe gîakari, Nathani n'eerire Ndaundi mantû monthe.
Îromba rîa Ndaundi
(1Karaaya 17:16-27)
18 Rîru mûnene Ndaundi aathûngîra îremaani rîra aigîîte îthandûkû rîa Ngai, aakara mbere ya Mwathani, na auga ata rî,
“Mwathani Mwene Inya, niû ndî ûû, na mûciî wakwa i ka ûrî mbi kaingo ûnkinyithia mwanka agu ndî? 19 Na kîrî woû ûntû bûbû ûrîona taka bûrî bûniini, îî Mwathani Mwene Inya, na kinya waaria mantû makaaya ma mûciî wa mûruti ngûgû waku, bûbû bûrootuîka watho n'ûntû bwa muntû, woû Mwathani Ngai! 20 Na niû Ndaundi rî, n'ata bûngî mbûmba gûkwîra nkûrûki? Woû n'wiyî mûruti ngûgî waku, îî Mwathani Mwene Inya! 21 N'ûntû bwa kiugo gîaku, na kûringana na wendi bwaku, n'ûrûthîîte ûntû bûbû bûneneete ûûgû na watûma bûmenyekana kîrî mûruti ngûgî waku. 22 Kwoogu woû i woû mûnene, îî Mwathani Mwene Inya, n'ûntû gûtirî ûngî akari ta woû, na gûtirî ngai ûngî tatiga woû, kûringana na mara monthe twîgîîtue na matû meetû. 23 I nthîgûrû îîngî îrîkû îgûrû rîa nthî îkari ta antû baaku Isiraeri, bara Ngai aathiire gûkûûra ûkombooni beegua barî antû baake? N'werûthîîre riîtwa rîega rîra wakûûrire antû baaku kuuma Miisiri. Wabaringîîre biama biinene bia kûrigarania na wabakûûra kuuma inyaani ya mîgongo îra îîngî na kuuma kîrî inya ya ngai ciayo. 24 Na warikithia antû baaku Isiraeri, na baatuîka antû baaku tene na tene, naawe, woû Mwathani, watuîka Ngai wao.
25 Na îîndî, Mwathani Ngai, wîrane bûra waigire n'ûntû bwa mûruti ngûgî waku na n'ûntû bwa mûciî wake ûbuaige tene na tene, rûtha wa ta bûra waugire. 26 Na riîtwa rîaku rîgaatûûra rîneneagua tene na tene, na kuugagwe ata rî, ‘Mwathani wa Njûûrî n'we Ngai ûra wathaga Isiraeri.’ Na mûciî wa mûruti ngûgî waku Ndaundi ûkaarikithua mbere yaku. 27 N'ûntû woû, Mwathani Mwene Inya, Ngai wa Isiraeri n'ûnguûrîrîîte bûbû niû mûruti ngûgî waku, ûkiugaga, ‘Ngaatuîkithia nciarwa ciaku anene.’ Kwoogu niû, mûruti ngûgî waku, nkwîgua ndî na ûcamba bwa gûkûromba îromba rîrî. 28 Woû Mwathani Mwene Inya, ûrî Ngai, na biugo biaku i bia mma, na nwîranîîte mantû mama meega kîrî mûruti ngûgî waku. 29 Îîndî îtîgîîria kûthaarima nciarwa cia mûruti ngûgî waku, kaingo îgaakaraga tene na tene irî mbere yaku, n'ûntû woû, Mwathani Mwene Inya, i woû uugîîte ûgu, na mûciî wa mûruti ngûgî waku n'ûthaarimwe tene na tene.”