Îthandûkû rîa maathana rîairwa Njerusaremu
(1Karaaya 13:1-14; 15:25-16:6, 43)
6
1 Ndaundi kaîrî aacooka eethîrania acikaarî bara beega mûno ba Isiraeri, antû ngiri mîrongo îthatû. 2 Ndaundi na antû bonthe bara aarî nabo beetia taûni ya Baaraa ndeeni ya Njunda, baathi kûgîîra îthandûkû rîa Ngai kuuma noogo, rîra rîîtanîrîtue na riîtwa rîa Mwathani wa Njûûrî ûra akaraga gatîgatî ga akerubi bara barî îgûrû rîa îthandûkû. 3 Na baakamata îthandûkû rîru rîa Ngai na nkaarî înjerû ya ng'ombe, nyuma ya kûrîruta nyomba ya Abinandabu îra yarî karîmaani. Usa na Ayo nthaka cia Abinandabu i bo baatongoreetie nkaarî înu ya ng'ombe, îrî na îthandûkû rîru rîa Ngai, 4 Ayo n'we aarî mbere ya îthandûkû rîru. 5 Ndaundi na antû ba Isiraeri bonthe i baakenagîîra mbere ya Mwathani na inya yao yonthe bakîmûkumia. Baina bakîringaga mîthemba mwanya mwanya ya into bia kwina, t'yo, wandîndî cia ndigi inyingî, inaanda, biempe, tamburini, na kayamba na igamba.6 Bagûkinya rwaraani rwa kûbûûrîra rwa Nakoni ng'ombe ira ciakamatîîte îthandûkû rîa kîrîîkanîro rîa Ngai ciataratara, Usa aataambûrûkia njara arîgwatîîra. 7 Na Mwathani aathûûra ni Usa n'ûntû bwa kûrûtha ûntû bûbu bûtaarî bwega, kwoogu Ngai amûûragîra waagu rûteere rwa îthandûkû rîru rîa Ngai. 8 Ndaundi n'we aathûûra mûno n'ûntû bwa bûra Mwathani aakaanûkiirie Usa na mûthûûro ûgana. Na bantû agu eetagwa Peresi-Usab mwanka îmunthî tûrî. 9 Ntugû înu Ndaundi aamaka mûno i Mwathani na aûria, “N'ata îthandûkû rîrî rîa Mwathani rîûmba kûûya gwakwa?” 10 Kwoogu Ndaundi ateenda gûkamata îthandûkû rîru rîa Mwathani ariira Taûni ya Ndaundi, îndî aarîthûkiirie ariira mûciî kwa Obendi-Endomu, Mûngathi. 11 Îthandûkû rîru rîa Mwathani rîakarire mûciî kwa Obendi-Endomu Mûngathi bantû a mîeri îthatû; na Mwathani aathaarima Obendi-Endomu na mûciî wake unthe.
12 Na mantû mamu imaamenyithiirue mûnene Ndaundi eerwa ata rî, “Mwathani n'athaarimîîte mûciî wa Obendi-Endomu na into bionthe bira arî nabio, n'ûntû bwa îthandûkû rîru rîa Ngai.” Kwoogu Ndaundi aathi aaruta îthandûkû rîru rîa Ngai kwa Obendi-Endomu ariira Taûni ya Ndaundi akeneete. 13 Rîra bara baakamatîîte îthandûkû rîru rîa Mwathani bakûthi bantû a makinya mathanthatû ûgu, Ndaundi n'aarutire kîgongwana gîa ncamba na kayaû kaanoru. 14 Ndaundi n'we aina akîgoyagia arî mbere ya Mwathani na inya yake yonthe, na eekîrîîte nguo ya gatani ya ûthînjîri. 15 Kwoogu Ndaundi na antû ba Isiraeri bonthe beetithiirie îthandûkû rîru rîa Mwathani bakiugagîîria na inya, na bakîringaga rûgoci.
16 Wa îthandûkû rîru rîa Mwathani rîthûngîrîte Taûni ya Ndaundi woogu, Mikari mwarî wa Saûrû aaraithîîria ndîrîcaani, oona mûnene Ndaundi akîthûngûthanga akiinaga mbere ya Mwathani; eegua nkorooni yake amûmena. 17 Nabo baathûngîria îthandûkû rîru rîa Mwathani, na rîaigwa bantû aarîo îremaani rîra Ndaundi aarîrûthîrîîte. Na Ndaundi aaruta igongwana bia kûbîîthua na biewa bia ûkiri mbere ya Mwathani. 18 Ndaundi akûrîîkia kûruta igongwana bibu bia kûbîîthua na bia ngwatanîro, aathaarima antû riîtwani rîa Mwathani wa Njûûrî, 19 na aagaîra antû bonthe, kîrîndî kîonthe gîa Isiraeri, arûme na aka, wa muntû kîng'enyûrû kîa mûgaate na kînuku kîa nyama, na tûkûmbwa twa ncabiibû inyaarie. Rîru antû bonthe baathi, beenûka wa muntû gwake.
20 Na Ndaundi n'aacookire mûciî kûthaarima antû baake. Îndî Mikari mwekûrû wake mwarî wa Saûrû aumagarûka kaingo amûthagaana, na auga na mînyûrûnto ata rî, “N'ata mûnene wa Isiraeri îmunthî eekumithia wengwa, aaruta nguo yake aathi akîonagwa n'aarî bara nkombo cia aruti ngûgî baake, wa ta bûra mwaga nthoni arûthaga!” 21 Ndaundi aacookeria Mikari amwîra, “Ndiinaga nkumithia Mwathani ûra aanthuurire bantû athuura abaagu, na mûciî wake unthe, antuîkithia mûtongoria wa antû baake Isiraeri, antû ba Mwathani. Na kwoogu nkaathi na mbere kwinîra Mwathani. 22 Nkaathi na mbere kwîbira îgi nkûrûki ya ûgu. Woû nwa ûthûgaanie ndî wa mana îndî aarî babu ûkuuga, bo bakanthûkia na gîtîîyo mûno.” 23 Na Mikari mwarî wa Saûrû ataaroogea na mwana mwanka gûkua gwake.