Ndaundi aatuîka mûnene wa Isiraeri na Njunda
(1Karaaya 11:1-9; 14:1-7)
5
1 Rîru mîîrîga ya Isiraeri yonthe yaathi kîrî Ndaundi arî Eburoni, bamwîra, “Raitha, tiû tûrî antû baaku ba mûciî ndeeni. 2 Bantû a kagiita kaaraaya rîra Saûrû aarî mûnene wetû, i woû watongoreerie antû ba Isiraeri kûthi ndûani. Na Mwathani akwîra, ‘I woû ûkaarîîthagia antû baakwa ba Isiraeri, na i woû ûgaatuîka mûtongoria wa Isiraeri.’ ” 3 Rîra akûrû bonthe ba Isiraeri baayire kîrî mûnene Ndaundi naagu Eburoni, aiga kîrîîkanîro nabo mbere ya Mwathani, na beetûûrîria Ndaundi maguta bamûtuîkithia mûnene wa Isiraeri. 4 Ndaundi aarî na ûkûrû bwa mîanka mîrongo îthatû akîanjîîria kwathana, na aathanire bantû a mîanka mîrongo înna. 5 Aathanire Njunda kuuma naagu Eburoni mîanka mûgwanja na nucu, na naagu Njerusaremu aatha Isiraeri yonthe na Njunda mîanka mîrongo îthatû na îthatû.6 Mûnene Ndaundi na njûûrî yake ya ndûa i baathiire Njerusaremu baithûkîra Anjebusi bara baatûûraga ku. Anjebusi beera Ndaundi, “Ûtiithûûngîra taûni îno. Kinya ntûngi na bionje nwa babûrigîîrie bûtikaathûngîre ndeeni.” Baathûgaanagia, “Ndaundi atithûngîra aaga ndeni.” 7 Îndî amwe na ûgu, Ndaundi neegwatîîre taûni îra yarî îmbirige na maiga ya Sayuuni, Taûni ya Ndaundi. 8 Na ntugû înu Ndaundi auga, “Ûra wonthe akaarûa na Anjebusi, n'akurie mwîtio na mûtaro wa rûûyî, aithûkîre bionje na ntûngi, bo bara Ndaundi ateendaga akîboona.” Kwoogu kwîrîîtwe ata rî, “Ntûngi na bionje batikoorothûngîra nyomba ya ûnene.” 9 Kwoogu Ndaundi aakara ndeeni ya taûni înu bantû ara airigîrîtwe na rûthingo, na amîîta Taûni ya Ndaundi. Na aaka taûni kûmîthiûrûkîîra, amîanjîîria kuuma Miro amîcookeetie bwa ndeeni. 10 Na Ndaundi aathi na mbere kûgîa inya nkûrûki n'ûntû Mwathani wa Njûûrî n'aarî amwe n'we.
11 Iramu mûnene wa Turo n'aatûmire atûmwa kîrî Ndaundi, amwe na mîtî ya mîthithinda, aacooka amûtûmîra mabundi ma mbaaû na mabundi ma maiga bara baakîîre Ndaundi nyomba ya ûnene. 12 Na Ndaundi aamenya i Mwathani aamûrikithîîtie arî mûnene wa Isiraeri na aûkîîria ûnene bwake n'ûntû bwa antû baake Isiraeri.
13 Nyumaani Ndaundi akuuma Eburoni aathi Njerusaremu, n'aathûkiirie aka bangî ba kwaiga na ba kûgûra, na bamûciarîra aana baingî ba nthaka na ba aarî. 14 Na mama i mo mariîtwa ma aana baake bara aagîîrîîre nabo Njerusaremu: Samua, Sobabu, Nathani, Soromoni, 15 Ibari, Erisua, Nefegi, Njafia, 16 Erisama, Erianda, na Erifereti.
Ndaundi acinda Afirisiti
(1Karaaya 14:8-17)
17 Afirisiti bakwîgua Ndaundi n'eetûrîîrue maguta aatuîkithua mûnene wa Isiraeri, i beetiirie noogo nainya mûno kûmûcwa, îndî Ndaundi n'we n'aarî agûkinyîrwa i mantû mamu na eendama naagu gwakîîtwe na inya gûntû gwa kwîbitha. 18 Rîru Afirisiti i baarî bakûûya baanyagaara kuunthe kîbondeeni kîa Refaimu. 19 Kwoogu Ndaundi aûria ûkûrû kuuma kîrî Mwathani, “Mbîtie nkaithûkîre Afirisiti? Ûkabaneenkanîra kîrî niû?” Mwathani Amûcookeria, “Îthi, n'ûntû na mma nkaanenkanîra Afirisiti kîrî woû.” 20 Kwoogu Ndaundi aathi Mbaari-Perasimu,a na i noogo aabacindîîre. Auga, “Wa ta bûra rûûyî ruunûkaga, Mwathani n'aunûkîrîte anthû baakwa mbere yakwa.” Kwoogu bantû agu eetwa Mbaari-Perasimu. 21 Na Afirisiti baatigire mîbuanaano ya ngai ciao naagu, Ndaundi na antû baake bamîthûkia baathi n'yo.
22 Na Afirisiti baacooka beetia kaîrî, na baanyagaara Kîbondeeni kîa Refaimu. 23 Kwoogu Ndaundi aûria ûkûrû kuuma kîrî Mwathani, Mwathani amwîra, “Ûtigeetie bwa îgûrû cwe, bacîgîîrie bwa nyuma ûbaithûkîre ûbaumîîte bwa mbarî ya mbere naara kûrî na mîtî îra îîtagwa mîporosandi. 24 Na rîra ûkeegua muugio wa makinya îgûrû rîa Mîporosandi înu, îthi na mpwî, n'ûntû gûku i kuuga Mwathani akûthi arî mbere yaku gûtura njûûrî ya Afirisiti.” 25 Kwoogu, Ndaundi aarûtha wa ta bûra Mwathani aamwathîîte, na aatura Afirisiti kuuma Ngeba mwanka Ngeseri.