Kûûragwa kwa Isibosethi
4
1 Rîra Isibosethi mwana wa Saûrû, eegiirue Abuneri agûkuîra Eburoni, ûcamba bwake bunthe bwathira, na antû ba Isiraeri bonthe baamaka. 2 Isibosethi mwana wa Saûrû aarî na antû baîrî bara baarî atongoria ba njûûrî ira ciaithûkaga. Ûmwe eetagwa Mbaana na ûra ûngî n'we eetagwa Rekabu, nabo baarî aana ba Rimoni wa mwîrîga wa Benjameni wa kuuma Beerothi n'ûntû Beerothi yataragwa îrî ya Benjameni. 3 N'ûntû antû bara baatûûraga Beerothi mbere, i baarî bakûthaamîra gûku Gitaimu ara kinya îmunthî tûrî batûûraga barî ageni.4 Njonathani mwana wa Saûrû n'aarî na mwana aarî ûmwonju magûrû. Mwana ûyu aarî na ûkûrû bwa mîanka îtaano rîra ntheto cia Saûrû na Njonathani ciabakinyîîre kuuma Njesireeri. Mûmenyeeri wake amûthûkia, aakuthûka n'we. Akuthûkîîte na mpwî, mwana ûyu aamonyoka aagwa nthî, aatuîka kîthua. Na riîtwa rîake eetagwa Mefibosethi.
5 Na aana ba Rimoni Mûbeerothi, tabo Rekabu na Mbaana, baathiire baakinya nyomba kwa Isibosethi mûthenya gatî mwathû waarîîte, nwe anogokeete. 6 Na ata rî, mwekûrû ûra aakaragia mwîrango wa nyomba n'ataaraga ngano, n'we aanjîîria kûng'onta na aamaama. Kwoogu Rekabu na mûruagina Mbaana beeceekeeria mpoora.a 7 Bakûthûngîra nyomba warîra Isibosethi amaami ûrîrî bwake kanyombaani kara aamaamaga, bamûmunta bamûûraga na bamûgiita kîongo. Baathûkia kîongo gîake, baaraara kûthi na njîra ya kîguuru kîa Njorondani ûtugû bunthe. 8 Baanenkanîra kîongo gîku kîrî mûnene Ndaundi naagu Eburoni. Na bamwîra, “I gîîkî kîongo kîa Isibosethi mwana wa Saûrû, mûnthû waku, ûra aacwaga gûkûûraga. Îmunthî Mwathani akûrîanîria mwathi mûnene wakwa kîrî Saûrû na nciarwa ciake.” 9 Îndî Ndaundi aacookeria Rekabu na mûruagina Mbaana aana ba Rimoni Mûbeerothi ata rî, “Wa ta bûra Mwathani atûûraga mwoyo ûra ambonokeetie ûgwatiini bunthe, 10 rîra muntû ûmwe aambîîrire, ‘Saûrû n'ûmûkuû,’ akîthûgaanagia i mantû meega akûmbîîra, ndamûgwatire ndamûûragîra Sikiragi, kîrî ta kîewa kîra ndaamwere n'ûntû bwa ntheto ira aandetereete. 11 Îîndî ûtiîgua kûrî nkûrûki, rîra antû bara bathûûku baûragîîte muntû ûmwega amaami ûrîrî bwake nyomba yake wengwa! N'ata îîndî ntakîrîia nthakame yake îra bwetûûrire na mbûthirie buume nthîgûrû îno?” 12 Kwoogu Ndaundi aaruta watho antû baake baûraga Rekabu na Mbaana, na babagiitanga njara na magûrû meene, na babacuuria rûteere rwa kîria naagu Eburoni. Îndî kîongo gîa Isibosethi kîo, baakîthûkiirie na bakîthika nthikooni ya Abuneri naagu Eburoni.