3
1 I kwarî na ndûa îgiita rîîraaya gatîgatî ga antû ba Saûrû na antû ba Ndaundi, na wathani bwa Ndaundi bwathi na mbere kûgîa inya nkûrûki, na inya ya mûciî wa Saûrû yathi na mbere kûthira.Aana ba Ndaundi bara aaciarîîre Eburoni
2 Baba i bo aana bara Ndaundi aagîîre nabo arî Eburoni.
Amunoni aarî kîîmbere gîake, na aaciarirwe i mwekûrû eetagwa Ainoamu Mûnjesireeri.
3 Na wa baîrî eetagwa Kîreabu wa mwekûrû eetagwa Abigairi ûra aarî mwekûrû wa Nabari Mûkarimeri.
Wa bathatû n'we aarî Abusaromu, ûra aacierwe i Maaka mwarî wa Tarumai mûnene wa Ngesuri.
4 Na wa bana eetagwa Andoniya na gina eetagwa Agithi.
Na wa bataano i Sefatia na gina eetagwa Abitari.
5 Wa bathanthatû aarî Ithireamu wa mwekûrû ûra eetagwa Egira.
Babu i bo aana ba Ndaundi bara baaciarîîrwe Eburoni.
Abuneri aabanga kûthi kîrî Ndaundi
6 Gwakarîkire ata rî, rîra kwegiirue kûrî na ndûa gatîgatî ka athingati ba Saûrû na ba Ndaundi, Abuneri aathi na mbere kûgîa inya nkûrûki gatîgatî ka athingati ba Saûrû. 7 Saûrû n'aarî na mûka wa kwaiga, eetagwa Risipa, mwarî wa Aya. Na Isibosethi aûria Abuneri ata rî, “I mbi n'ûntû ûrakarire na mûka ûyu wa baaba wa kwaiga?” 8 Biugo bibu bia Isibosethi i biatûmire Abuneri athûûra mûno. Na amûûria, “N'ûkûthûgaania nwa nkunyanîre Saûrû? I ka ûkûthûgaania ndîtûmîkîra Njunda? Kuuma wo kîambîrîria mbîthîrîîtwe ndî mwîtîgua kîrî rûrîîyo rwa abaagu Saûrû, kinya kîrî aruagina, na acoore baake. Na kaîrî woû wengwa, Isibosethi, ntaakûnenkanîra njaraani cia Ndaundi. Îndî îmunthî woû ûrîntarîra mabîtia n'ûntû bwa mûka ûyû. 9 Ngai aroompa îkaanûkia, wegua ntiirûthîra Ndaundi bûra Mwathani aamûthiîtîîrie amwîra, 10 akaaruta ûnene buume kîrî mûciî wa Saûrû, na arûûngamie gîtî kîa ûnene kîa Ndaundi aathe Isiraeri na Njunda, kuuma Ndani mwanka Beeriseba.” 11 Na Isibosethi ataaria na Abuneri kaîrî n'ûntû n'aamûkuthûkire. 12 Abuneri aatûma atûmwa kîrî Ndaundi, ûra kagiitaani gaku aarî Eburoni, baathi na ntûmwa îkûûria ata rî, “Nthîgûrû îno n'yaû îîndî? Aiga kîrîîkanîro naani, naani ngagûteethia kûreeta Isiraeri yonthe rûteere rwaku.” 13 Ndaundi auga, “I bwega, nkaiga kîrîîkanîro naawe, îndî kûrî ûntû bûmwe nkeenda ûrûtha; nabu i bûbû, ûtiimbona na meetho, twanga ûkaaya na Mikari, mwarî wa Saûrû ûkîîya kûûmbona.” 14 Ndaundi n'we aatûma atûmwa kîrî Isibosethi mwana wa Saûrû na ntûmwa îkiugaga, “Ncookeria mwekûrû wakwa Mikari, ûra ndaagûrire ndaraayia nkonde îgana cia aîyî ba Afirisiti.” 15 Kwoogu Isibosethi aatûma antû, aatuunyana Mikari kîrî mûkûrû wake ûra eetagwa Paritieri mwana wa Raisi. 16 Paritieri mûkûrû wake aathingatana n'we mwanka taûni ya Baurimu, akîmûrîragîra wa athiîte. Rîru Abuneri amwîra, “Na ûgacooka.” Paritieri aacooka.
17 Abuneri aathi kîrî akûrû ba Isiraeri abeera, “Bantû a kagiita kaaraaya mma gakûrûkîîte, bûtûûraga gûcwaa Ndaundi atuîka mûnene wenu. 18 Kwoogu îîndî bûrî na kaanya ga kûrûtha ûgu, n'ûntû Mwathani n'aigire wîrane na Ndaundi auga, ‘Nkoonokia antû baakwa ba Isiraeri na njara ya mûruti ngûgî wakwa Ndaundi abarute njaraani cia Afirisiti, na kuuma njaraani cia anthû bara bangî bonthe.’ ” 19 Abuneri aaria kinya na antû ba mwîrîga wa Benjameni, na rîru aathi Eburoni kwîra Ndaundi bûra antû bonthe ba Isiraeri na ba Benjameni boonire bûrî bwega kûrûtha. 20 Abuneri agîkinya kîrî Ndaundi naagu Eburoni aarî na antû mîrongo îîrî, Ndaundi n'we n'aarugithîrîîtie Abuneri amwe na antû bara aarî nabo kîatho. 21 Abuneri eera Ndaundi ata rî, “Îîndî kandîîthuuranîre nthi nkeethîranie Aisiraeri bonthe baaye kîrî woû mûnene mwathi wakwa, kaingo barîîkanîra kîrîîkanîro naawe, na kaingo ûkaathaga bara bonthe ûkeenda woû wengwa.” Kwoogu Ndaundi eetîgîîria Abuneri aathi na ûkiri.
Njoabu aûraga Abuneri
22 Nyuma ya kagiita gaakai acikaarî ba Ndaundi barî amwe na Njoabu baaya baumîîte gûtaa na bareeta into biingî mûno bira baataîte. Îndî Abuneri bataarî amwe na Ndaundi naagu Eburoni, n'ûntû Ndaundi n'aarî akûmwîtîgîîria aathi na ûkiri. 23 Njoabu amwe na njûûrî yonthe ya ndûa îra yarî amwe n'we bagûkinya, Njoabu eerirwe, “Abuneri mwana wa Neri aayire kîrî mûnene, na mûnene amûrekeeria aathi na ûkiri.” 24 Rîru Njoabu aathi kîrî mûnene amûûria, “N'ata warûtha? Abuneri akûûya kîrî woû rî, i mbi n'ûntû ûmûrekiirie aathi? Îîndî nathiire. 25 Woû ûtiramenya kana Abuneri mwana wa Neri n'aayire gûkweneeria, athigaana amenya mîthiîre yaku na bunthe bûra ûrûthaga aaga.”
26 Njoabu akuuma kîrî Ndaundi, aatûmire atûmwa baathingata Abuneri, na bamûgwatagwata agîkinya kîthimaani gîa Sira bamûcookeria oogo. Îndî Ndaundi ataiyî mantû mamu. 27 Abuneri agûcooka Eburoni, Njoabu amûthûkia amwira gateere ka mwîrîga wa taûni înu taka eendaga baarîria noogo barî bonka. Na agu noogo aamuntîîre Abuneri nda aakua n'ûntû bwa kûûraga mûruagina Asaeri.
28 Nyumaani, Ndaundi akwîgua ûgu, augire, “Niû na antû baakwa bara mbathaga tûtirî na mabîtia tene na tene mbere ya Mwathani n'ûntû bwa gîkuû kîa Abuneri mwana wa Neri. 29 Ûntû bûbû bûroocooka kîongo kîa Njoabu, na mûciî wake, na kaîrî mûciî wa Njoabu gûtikaage muntû akûrua nthakame, kana arî na mûtigiri, kana muntû athuaga, kana kwaga muntû ûmûûrage na rûûyiû, kana muntû ûkwaga irio.” 30 Kwoogu Njoabu na mûruagina Abisai i baûragire Abuneri, n'ûntû bwa bûra Abuneri aûragire mûruagina eetagwa Asaeri ndûani naagu Ngibeoni.
31 Rîru Ndaundi eera Njoabu na antû bara aarî nabo ata rî, “Tembûrangaani nguo cienu, na bwîkîre nguo cia nkunia. Bûthi bûrî mbere ya mwîrî wa Abuneri bûkîrîraga.” Kwoogu mûnene Ndaundi aathi arî nyuma ya îtaratî rîra rîakamatîîte mwîrî wa Abuneri. 32 Abuneri aathikirwe naagu Eburoni, na mûnene Ndaundi augîîria nainya, aarîrîra agu mbere ya nthiko ya Abuneri. Na antû bonthe baarîra. 33 Mûnene Ndaundi aina rwîmbo rûrû n'ûntû bwa kûrîrîra Abuneri akiugaga,
“N'waka Abuneri wakua ta kîaa mma?
34 Na twaka wathaîkîîtwe njara,
kana magûrû maaku moogwa na nyororo,
ûkuire ta muntû ûmûûrage n'antû baathûûku.”
Na antû bonthe bamûrîrîra kaîrî. 35 Na antû bonthe baaya gûkaîrîîria Ndaundi arîa irio kûrî mûthenya; îndî Ndaundi n'we aathiîtia akiugaga, “Ngai arombûraga wegua nkaarûma mûgaate, kana gîntû kîngî riûa rîtirathûa!” 36 Na antû bonthe boona bûra mûnene aarûthire, na baakeneera, wata bûra baakenagîîra mantû monthe mara mûnene aarûthaga. 37 Kwoogu ntugû înu n'yo antû bonthe ba Isiraeri baamenyire gûtaarî kwenda kwa mûnene Abuneri mwana wa Neri aûragwa. 38 Mûnene n'we eera aruti ngûgî baake ata rî, “I ka bûtaiyî, mûtongoria ûmûnene n'ûmûûrage îmunthî nthîgûrû ya Isiraeri? 39 Îmunthî ndî kîonje, wana kinya ûkeegua ndî mûnene mwîtûûrîrua maguta, antû baba baîrî aana ba Seruya i ba gûnkîria inya, ntikûûmba kûbaatha. Mwathani aroorîithia mûthûûkia kûringana na ûthûûku bwake.”