Ndaundi atuîka mûnene wa Njunda
2
1 Îgiita rîmwe nyumaani, Ndaundi aûria Mwathani ata rî, “Nwa mbîtie taûni îmwe ya taûni cia Njunda?” Mwathani amwîra, “Yîî îtia.” Ndaundi n'we amûûria, “Nthi taûni îrîkû?” Mwathani amwîra, “Îthi Eburoni.” 2 Kwoogu Ndaundi eetia aathi noogo, na eekûrû baake barî baîrî, Ainoamu Mûnjesireeri, na Abigairi ûra aarî mwekûrû wa Nabari Mûkarimeri. 3 Ndaundi nwe aacooka eetithia antû baake noogo bara aakaraga nabo, wa muntû na antû ba mûciî wake, na baatûûra naagu taûniini ira ciarî akubî na Eburoni. 4 Rîru antû ba Njunda baaya Eburoni, na agu noogo beetûûrîîrie Ndaundi maguta aatuîka mûnene wa antû ba Njunda.Ndaundi akwîrwa atî n'antû ba Njabesi-Ngiriandi i baathikire Saûrû, 5 Ndaundi n'aatûmire ntûmwa kîrî bo. Na ntûmwa yaugaga, “Mwathani aroobûthaarima, n'ûntû bwa wega bûra bwarûthîîre Saûrû mwathi wenu, bwamûthika! 6 Îîndî Mwathani aroobwonia wega bûrî na wendo bwa mma! Wana niû nkabûrûthîra mantû meega n'ûntû bwa ûûgû bûrûthîîte. 7 Kwoogu îîndî îgîani na inya, na bûgîe na ûcamba, n'ûntû Saûrû mwathi wenu n'ûmûkuû, na antû ba Njunda i bambîtûûrîrîîtie maguta ntuîka mûnene wao.”
Ndûa gatîgatî ka athiingati ba Ndaundi na athiingati ba Saûrû
8 Îîndî Abuneri mwana wa Neri, mûtongoria wa njûûrî ya Saûrû, aarî akûthûkia Isibosethi mwana wa Saûrû, amûringia muuro wa Njorondani amwira naagu Maanaimu, 9 na amûtuîkithia mûnene wa Ngiriandi, Asuuri na Njesireeri na kinya Efuraimu na wa Benjameni na ûgu i ta kuuga Isiraeri yonthe. 10 Isibosethi mwana wa Saûrû aarî na ûkûrû bwa mîanka mîrongo înna akîanjîîria gûtuîka mûnene wa Isiraeri. Na aathanire bantû a mîanka îîrî. Îndî rûrîîyo rwa Njunda rwathingatire Ndaundi. 11 Na kagiita kara Ndaundi aathire rûrîîyo rwa Njunda arî mûnene naagu Eburoni i mîanka mûgwanja na nucu.
12 Abuneri mwana wa Neri na acikaarî ba Isibosethi mwana wa Saûrû, baumire Maanaimu baathi Ngibeoni. 13 Na Njoabu mwana wa Seruya na acikaarî ba Ndaundi, baumire Eburoni baakomana nabo akubî na kîria kîa Ngibeoni, na baakara nthî. Gîkundi kîmwe giakara rûteere rûmwe rwa kîria na kîra kîngî rûteere rûra rûûngî rwa kîria wa gîku. 14 Abuneri eera Njoabu ata rî, “Nthaka imwe iciûkîîre icindane kûrûa tûkîonaga.” Njoabu n'we eetîgîîria auga, “Yîî. Ka irûe” 15 Kwoogu antû îkûmi na baîrî ba kuuma mwîrîgaani wa Benjameni ba Isibosethi mwana wa Saûrû, baarûa na antû îkûmi na baîrî ba Ndaundi. 16 Nabo baakuumbatana biongo muntû na ûra ûngî, baamuntana mbaru na mpiû muntû na ûra ûngî, na baakuîra waagu. Kwoogu bantû agu eetwa Erikathi Asurimua îra îrî Ngibeoni.
17 Na nyuma ya ûgu i kwarî ndûa îînene mûno ntugû înu, na Abuneri na antû ba Isiraeri baakîrua inya na baaturwa n'acikaarî ba Ndaundi. 18 Na nthaka ithatû cia Seruya ciarî oogo. Nabo baarî: Njoabu, Abisai na Asaeri. Asaeri aarî rwîro ta nthwariga. 19 Asaeri wooyu eenganire na Abuneri augîîtie rwîro atakûûndûka bwa ûrîo kana bwa ûmotho. 20 Rîru Abuneri aûndûka nyuma, na akûmwona, amûûria, “I woû Asaeri?” N'we Asaeri amûcookeria amwîra, “I niû.” 21 Abuneri amwîra, “Ûndûka bwa njara ya ûrîo kana ya ûmotho, wîngane na nthaka îmwe na ûmîtuunye into bira îrî nabio.” Îndî amwe na ûgu Asaeri ataatindanîra. Aathiire na mbere kwîngana na Abuneri. 22 Abuneri kaîrî eera Asaeri ata rî, “Tiga kwîngana naani; i mbi îîndî n'ûntû ûkwenda nkûûraga? Ndaarûtha ûgu rî, ngoota gûkomania meetho na mûruanyûkwe Njoabu?” 23 Îndî amwe na ûgu Asaeri ataacooka, nwaka aathiire na mbere kwîngana na Abuneri. Kwoogu Abuneri aûndûkania n'we amûmuunta ngûûra ya îtumo nda rîaungurukania bwa mûgongo, aagwa na aakuîra waagu aarî. Na antû bonthe bara baayaga ara Asaeri aagûîte na aakua, baarûngamaga waagu. 24 Îndî Njoabu na Abisai bakwona bûra mantû makari, banjîîria kwîngana na Abuneri, na riûa rîrî akubî kûthûa, baakinya karîmaani ka Ama, kara keerekereete bwa Ngia njîraani ya kûthi bwa rwanda rwa Ngibeoni. 25 Nabo antû ba mwîrîga wa Benjameni beethîrana amwe nyuma ya Abuneri, na baarûtha gîkundi kîmwe, na baarûngama karîmaani kûra îgûrû. 26 Rîru Abuneri eeta Njoabu amûûria ata rî, “I ka tûgaatûûra kûûragana mwanka gûtarî rîo? I ka ûtaiyî mûthiani wa mantû mama gûkaagea na ûrûrû? N'ûkaathûkia îgiita rîgana ata ûtagûkaania antû baaku batiga kwîngana na aruagina?” 27 Njoabu auga, “Wa ta bûra Mwathani atûûraga mwoyo, ûkeegua tika waaria, antû baakwa barîîyaga kûthi na mbere kwîngatia aruagina ûtugû bunthe.” 28 Kwoogu Njoabu aaringa rûgoci, na antû bonthe baarûngama, baatiga kwîngana na antû ba Isiraeri, na bataarûa kaîrî.
29 Abuneri na antû baake, baaraara kûthi na ûtugû bunthe baakûrûkîîra kîguuruuni kîa Njorondani, baaringa muuro wa Njorondani, baathi na mbere na rûgendo rwao mathaa ma rûkîîrîb monthe mwanka baakinya Maanaimu. 30 Njoabu agûtiga kwîngana na Abuneri, n'eethîraniirie antû baake bonthe amwe, na acikaarî ba Ndaundi îkûmi na kenda na Asaeri bataarî oogo. 31 Antû ba Ndaundi baarî bakûûraga antû magana mathatû ma mîrongo îthanthatû ba Abuneri, kuuma mwîrîgaani wa Benjameni. 32 Njoabu na antû baake baathûkia mwîrî wa Asaeri, na bauthika nthikooni ya îthe, îra yarî Bethireemu. Rîru baaraara kûthi ûtugû bunthe na magûrû, baakinya Eburoni rware rûgîtema.