2 SAMWERI
Ndaundi aamenya gûkua gwa Saûrû na Njonathani
1
1 Nyuma ya gûkua gwa Saûrû, Ndaundi n'we eegua agûcooka kuuma kûthiria Aamareki, aakara Sikiragi ntugû ciîrî. 2 Ntugû ya ithatû, muntû ûmwe aaya kuuma kambîîni ya Saûrû. Muntû ûyu aateembûrangîîte nguo ciake na n'aarî na tîîri kîongo. Akûûya kîrî Ndaundi amûturîria maru akîmûtîîya. 3 Ndaundi amûûria, “Uumîîte kû?” N'we amûcookeria amwîra, “I ndatoorooka kuuma kambîîni ya Isiraeri.” 4 Ndaundi amûûria, “N'ata mantû marakari? Ta mbîîra.” N'we amûcookeria amwîra, “Antû i baakuthûkire ndûa, na mwanka agu, antû baingî i baakuû, na kinya Saûrû na mwana wake Njonathani i baakuû.” 5 Rîru Ndaundi aûria mûthaka ûyu wamwîrire mantû mamu, “N'ata ûkûmenya Saûrû na mwana wake Njonathani i baakuû?” 6 Mûthaka ûyu amûcookeria amwîra, “Ndaraarî agu kîrîmaani kîa Ngiriboa, ndoona Saûrû eetirîkanîîtie na îtumo rîake, nacio nkaarî cia mbaraathi cia ndûa i ciarî ikûmûgwatagwata. 7 Na akûûndûka araitha nyuma yake, aambona aambîta. Naani ndeetîga, ‘Yîî.’ 8 N'we aambûûria, ‘I woû ûû?’ Ndamûcookeria ndamwîra, ‘Niû ndî Mûamareki.’ 9 N'we ambîîra, ‘Ncû aaga ûmbûrage, n'ûntû ndî na thîîna îmbîî kinya wegua wana îîndî ndî mwoyo.’ 10 Kwoogu ndaathi kîrî we ndamûûraga, n'ûntû i ndaarî nkwona na mma ationoka nyuma ya akûgwa; na ndaathûkia nthûmbî îra yarî kîongo gîake, na mbangiri îra yarî njara yake, na into bibu i bio bibi ndakûretera mûnene mwathi wakwa.”11 Bakwîgua ûgu, Ndaundi amwe na antû baake bonthe baathûkia nguo ciao baciteembûranga; 12 n'ûntû bwa kîeba, na baarîra na baatîîrîra kûrîa irio mwanka ûgoro. Baarûthire ûgu n'ûntû bwa Saûrû na Njonathani mwana wake na n'ûntû bwa Isiraeri antû ba Mwathani, n'ûntû antû baingî i baûragîîrwe ndûani.
13 Rîru Ndaundi aûria mûthaka woyu wamwere ntheto inu ata rî, “Uumîîte kû?” N'we amûcookeria amwîra, “Niû ndî mûgeni, Mûamareki îndî ntûûraga nthîgûrû yenu.” 14 Ndaundi amûûria, “N'ata ûûmîîrie bûgana watambûrûkia njara waûraga mwîtûûrîrua maguta wa Mwathani?” 15 Rîru Ndaundi eeta nthaka îmwe amîîra, “Mûûrage.” Na nthaka înu yaamuunta Mûamareki ûyu na rûûyiû yamûûraga. 16 Na mbere anyaarûka, Ndaundi amwîra, “Ûrocookerwa i nthakame yaku wengwa, n'ûntû i woû wengwa wekûyîîra na kanyua gaaku wauga, ‘I mbûragire mwîtûûrîrua maguta wa Mwathani.’ ”
Ndaundi aarîra n'ûntû bwa Saûrû na Njonathani
17 Ndaundi n'aarîrîîre Saûrû na mwana wake Njonathani akiinaga rwîmbo rwa kîrîro 18 aruîta rwîmbo rwa ûta na auga antû ba Njunda barutanwe ru, ta bûra kwandîkîîtwe îbukuuni rîa Njasari. Augire,
19 “Atongoria baaku bara barî ûkumio woû Isiraeri i baûragîrîîtwe gûntû gwaku kûra gûkîîru!
Ncamba ira irî inya n'igwîte!
20 Bûtikauge mantû mamu Ngathi,
kana bûmamenyithania njîraani cia Asikeroni,
bûûya gûkenia aka ba Afirisiti,
kana aarî ba bara batataanagwa bakûngûîra.
21 Biû irîma bia Ngiriboa,
bûtikoorogea maame
kana buurîrwa i mbura,
kana maciara ma mînda îmînoru.
N'ûntû noogo rong'o cia ncamba ira îrî inya itugutîîtue,
rong'o cia Saûrû îtiakwa maguta kaîrî.
22 Ûta bwa Njonathani i bwarî na inya
na rûûyiû rwa Saûrû i rwarûthaga mantû maanene.
I beetûûraga nthakame ya anthû baao
na bakamunta mîîrî ya ncamba irî na inya.
23 Saûrû na Njonathani, i beendeene na i baathongi,
ûtûûrooni bwao, wana gîkuûni kîao bataatigithanua.
Baarî mpwî nkûrûki ya ndiiû,
baarî inya nkûrûki ya cimba.
24 Biû aka ba Isiraeri, rîrîraani Saûrû,
we ûra aabwîkîîre nguo intuune mûno na inthongi,
ûra aagemiirie nguo cienu na tûnyamû twa thaabu.
25 N'ata bara barî inya bagwîte ndûani gatîgatî!
Njonathani aûragîrîîtwe îgûrû gûntû gwaku kûra gûûkîîru.
26 Ndî na kwîthikîîra n'ûntû bwaku, mûruayia Njonathani;
indarakwendeete mûno.
Wendo bwaku kîrî niû bwarî bwa kûrigaria,
bwa kûrigaria nkûrûki ya bwa aka.
27 Ncamba ira irî inya irî nthî!
Into biao bia ndûa biatuîka bia mana!”