Njosua 9

Antû ba Ngibeoni beeneeria Aisiraeri

1 Antû bara batûûraga uumîîro bwa riûa bwa Njorondani baarî Aiti, Amori, Akanaani, Aperisi, Aibi, na Anjebusi. Batûûraga nthîgûrû ya irîma na mwaranthî nteere cia îria rîra rînene kwerekanîra na Rebanoni. Rîra anene ba antû babu beegiirue bûra gwakarîkire kîrî Njeriko na Ai, 2 i baagwatanîîre amwe bonthe barûa na Njosua na antû ba Isiraeri.

3 Amwe na ûgu, antû ba Ngibeoni bakwîgua bûra Njosua aarûthanire na taûni ya Njeriko na ya Ai, 4 bo baabanga kûmûrongoia baakara taka baatûmîîtwe kîrî we kaingo beeteethia. Baarûthire ûgu baatûma akiama kîrî Njosua, bakamatithîîtie mang'ooi maao mathango ma nkunia na mathatwa ma ndibei makûrû na maatûrîku marî na iraka. 5 Beekîrîte nguo inteembûkangu, inthiru, iraatû bikûrû bitûrîkangu na biekîrwa iraka. Kinya bakamata irio bigaandu. 6 Rîru baathi Girigari kîrî Njosua ara antû ba Isiraeri baraaraga, bamwîra amwe na antû ba Isiraeri, “Tiû tuumîîte nthîgûrû ya kûraaya mma, gaiga kîrîîkanîro naati.”

7 Antû ba Isiraeri bacookeria antû babu ba Aibi babeera, “N'ata tûûmba kûmenya bûtiumîîte bantû aakubî? N'ûntû ûkeegua buumîîte aakubî, tûtiûmba kwaiga kîrîîkanîro naabi.”

8 Nabo baacookeria Njosua bamwîra, “Tiû tûrî aruti ngûgî baaku.” Îndî Njosua n'we abaûria, “I ka bûrî baaû na i kû buumîîte?”

9 Bamûcookeria bamwîra, “Aruti ngûgî baba baaku baumîîte nthîgûrû ya kûraaya mûno, n'ûntû bwa îgweta rîa Mwathani Ngai wenu. N'ûntû itwîgîîtue mantû mara monthe aarûthire Miisiri, 10 na twegua bûra bunthe aarûthire kîrî anene bara baîrî ba Amori bara baarî uumîîrooni bwa riûa bwa muuro wa Njorondani, na kîrî mûnene Sioni wa Esiboni, na mûnene Ogu wa Mbasani ûra aathanaga Asitarothi. 11 Kwoogu akûrû beetû na bonthe bara batwîre nthîgûrû yetû baatwîrire, ‘Kamataani mîthete yenu n'ûntû bwa rûgendo. Na bûthi bûgakomane nabo, na bûbeere, “Tûrî aruti ngûgî beenu. Ncûûni îîndî, bwaiganîre kîrîîkanîro naati.” ’

12 “Irio bietû i biibi; bira tûrakamatîîte n'ûntû bwa rûgendo. Tûkîbikamata kuuma gwetû mîciî tûûyîîte naaga kwenu, biarî na mwanki, îndî îîndî, ta raitha wone i biigaandu. 13 Mathatwa mama maarî maayerû tûkîmaûyûria ndibei, na îîndî i maakûrû na i maatembûkangu. Nacio nguo cietû na iraatû bietû i biathirîîre njîraani n'ûntû bwa kûthi rûgendo rûraaya.” 14 Kwoogu antû bamwe ba Isiraeri baathûkia biakûrîa bimwe bia antû babu îndî bataatindanîra na kûromba Mwathani abaa ûkûrû. 15 Na Njosua aarûtha kîrîîkanîro gîa ûkiri nabo gîkuuga akaareka batûûre mwoyo; na atongoria ba Isiraeri baarikithia kîrîîkanîro gîku. 16 Îndî nyuma ya ntugû ithatû Aisiraeri bakûrîîkia kwaiga kîrîîkanîro nabo, Aisiraeri beegua atî antû babu baarî atûûri na bataumîîte kûraaya. 17 Aisiraeri baumire agu baathi taûniini cia antû babu na baakinyire kwao ntugû ya ithatû. Mariîtwa ma taûni inu maarî Ngibeoni, Kefira, Beerothi na Kiriathi-Njearimu. 18 Îndî antû ba Isiraeri batikîbaûraga, n'ûntû atongoria baao i baanyuîte muuma bathiîtia na riîtwa rîa Mwathani, Ngai wa Isiraeri. Rîru kîûthûrano kîonthe kîanung'una n'atongoria babu n'ûntû bwa miuma ta înu. 19 Îndî atongoria nabo beera kîûthûrano kîonthe, “Tiû itwagwatanîîre nabo na twanyua muuma twathiîtia na Mwathani Ngai wa Isiraeri, na mwaka agu tûtibaringithia. 20 Na ûûgû i bu tûkaabarûthîra: Tiû tûkaareka batûûre mwoyo, kaingo mûthûûro wa Ngai ûtatûcookera n'ûntû bwa miuma îra twanyuire na twa bathiîtîria twauga tûtibaûria.” 21 Na atongoria ba Isiraeri babeera, “Rekanaani nabo batûûre mwoyo.” Kwoogu baatuîka auni ba nkû na atai ba rûûyî n'ûntû bwa kîrîndî kîonthe kîa aana ba Isiraeri, wa ta bûra atongoria babu baabeerîîte. 22 Njosua abatûmana baaya abaûria, “I mbi n'ûntû bûratweneerie bûkiugaga, ‘Tuumîîte kûraaya mûno na kwenu’ na bûrî atûûri beetû? 23 Îîndî, bûrî baarume, na bamwe beenu bagaatuîka nkombo, auni ba nkû na atai ba rûûyî, n'ûntû bwa Nyomba ya Ngai wakwa.” 24 Antû babu ba Ngibeoni baacookeria Njosua, “Aruti ngûgî baku i beegiirue bûra Mwathani Ngai wenu aathire mûruti ngûgî wake Musa abûe nthî yonthe na athirie antû ba gûntû gûku bonthe baume mbere yenu, kwoogu ûntû bûbu i bwatûmire tûmaka mûno i biû tûkîthûgaanagia bûgatûûraga, na i kîo gîatûmire tûrûtha ûgu. 25 Na îîndî tûrî njaraani cienu, rûthaani bûra bûkwona bûrî bwega na bûbatîîrie meethooni meenu bûgîtûrûthîra bu.” 26 Kwoogu Njosua atarekeeria antû ba Isiraeri babaûraga. 27 Îndî ntugû wenu n'yo Njosua aabatuîkithiirie auni ba nkû na atai ba rûûyî ba kîrîndî gîku kîa aana ba Isiraeri, na ba kîthînjîro kîa Mwathani bantû onthe wa ara akaathuura mwanka îmunthî tûrî.