Kwînyangua gwa taûni ya Ai
8
1 Rîru Mwathani eera Njosua, “Ûtikaamake kana ûkua nkoro. Thûkia njûûrî yonthe bwîtie bûkaithûkîre taûni ya Ai, n'ûntû nkûbwaa mûnene wayo, antû baake, taûni yake, na nthîgûrû yake. 2 Bûkaathiria Ai na mûnene wayo wa ta bûra bwarûthire Njeriko. Îndî nwa bûthûkie into bira bûgataa ku bituîke bienu wana kinya nyamû cia ndîîthia. Bûcîgîîrie taûni înu kuuma bwa nyuma.”3 Kwoogu Njosua na njûûrî yonthe ya Isiraeri beethuuranîra kwithûkîra taûni ya Ai. Aathuura antû ngiri mîrongo îthatû ba ndûa baathi na ûtugû. 4 Abaatha ûûgû: “Îthiini bwîbithe bûcîgîîrie taûni kuuma bwa nyuma na bûtikeegue bûrî kûraaya mûno n'yo. Wa kîra muntû eegue eethuranîrîte. 5 Rîra niû na njûûrî ya ndûa yonthe îra nkeegua ndî n'yo tûkeegua tûrî akubî na taûni înu, antû ba Ai bakauma baaye kûrûa naati ta bûra baarûthire mbereeni, naati tûkaugia tûthi tûbakuthûke. 6 Naati tûkaareka batwîngatie mwanka bonthe baume taûni. N'ûntû bakeebeneeria bauge, ‘Aisiraeri baugîîtie, batûkuthûkîîte ta bûra baarûthire mbereeni.’ 7 Rîru naabi buume ara bûkwîbithîîte buumbuthûkanie nabo na bûthûkie taûni, n'ûntû Mwathani Ngai wenu akamînenkanîra njaraani cienu. 8 Na warîo bwathûkia taûni înu, bûkamîîkîra mwanki. Bûkaarûtha kûringana na kiugo kîa Mwathani. Bûkwîgua?” 9 Kwoogu Njosua abarekeeria baathi. Baathiire baakabîra gatîgatî ka Betheri na Ai mbarî ya ûthwîro bwa riûa bwa Ai. Îndî Njosua we aatigirwe kambîîni aaraara amwe na antû bara baatigirwe.
10 Rûûni rûkîîrî Njosua eethîrania njûûrî yake ya acikaarî amwe. We amwe na atongoria ba Isiraeri baatongoreeria antû baathi bwa Ai. 11 Acikaarî bonthe bara baarî na Njosua baathiire bakinya akubî na taûni înu. Na baamba marema maao rûteere rwa îgûrû rwa Ai, bantû kwarî na kibonde gatîgatî ka ara baarî na taûni înu ya Ai. 12 Njosua aathûkiirie antû ta ngiri itaano abaiga baagiitîra beebithîîte gatîgatî ka Betheri na Ai, mbarî ya ûthwîro bwa riûa bwa taûni înu. 13 Kwoogu baigire njûûrî yonthe ya ndûa rûteere rwa îgûrû rwa taûni înu, na bara bangî baagitîrîîte baigwa ûthwîro bwa riûa bwa taûni wa înu. Njosua wengwa aareere kîbondeeni gîku.
14 Mûnene wa Ai akwona antû ba Isiraeri rûgongo rwa kibonde gîku, we na antû baake bonthe, bara baatûûraga taûniini înu, baraûkire kuuma na mpwî rûûni rûkîîrî baathi beerekerete Araba bakomana na Isiraeri barûa. Îndî bataamenyaga kana i baarî baagitîre nyuma ya taûni înu. 15 Njosua na antû ba Isiraeri beetuîkithia taka baaturwa n'antû babu, na baugia baakuthûka batarîîte bwa rwanda. 16 Kwoogu antû bonthe bara baarî taûni înu ya Ai baîtwa beethîrana amwe kaingo babathingata na rwîro. Nabo beengana na Njosua, na wa bûra beenganîîte n'we nwabu beegagua barî gataaria mma na taûni yao. 17 Na gûtirî muntû nwa ûmwe aatigwa Ai kana Betheri ateenganîîte na antû ba Isiraeri. Baatigire mîrango ya taûni înu îrî mîrugûre na gûtarî muntû wa kûmîkaria na baathi kwîngana na Aisiraeri. 18 Rîru Mwathani eera Njosua ûûgû, “Orootithia îtumo rîru rîrî njaraani yaku ûrîerekerie Ai; n'ûntû ngakwaa yo.” Njosua n'we aarûtha wa ûgu Mwathani aamwîrîîte. 19 Warîo Njosua agûkîîria njara yake, antû bara beebithîîte bagiitîrîîte antû ba Ai, baumbuthûka baaruuya taûni înu. Nthûti îmwe bamîthûkia, na bamîmuuntia mwanki. 20 Antû ba Ai bakîûndûka, boona karongorongo ga ntoogo gagîîtagia îgûrû matuuni kuuma taûni înu, na baaga inya ya gûcwaa bantû a kwîbitha. N'ûntû antû ba Isiraeri bara bakûthûkîîre bwa rwanda, baagarûkire baîngîrana na bara beenganîîte nabo. 21 Rira Njosua na antû ba Isiraeri bonthe bakwona bara bangî beebithîîte bagiitîrîîte bakûgwata taûni ya Ai, na ntoogo n'îetagia îgûrû îkiumaga taûniini înu, i rîo baagarûkire baûraga antû ba Ai. 22 Rîru Aisiraeri bara baarî taûniini înu bauma ku baanjîîria kûûraga anthû, kwoogu antû ba Ai baathûngîra mûtegooni, na bonthe baûragwa. Na gûtirî muntû nwa ûmwe aatigara kana amonyia. 23 Nwa mûnene wa Ai wenka bagwatire arî mwoyo bamwira kîrî Njosua.
24 Antû ba Isiraeri bakûrîîkia kûûraga antû ba Ai bonthe bara baarî kîthakaani na bara baarî rwanda, baacooka taûni baathiria bonthe bara baarî ku. 25 Kwoogu antû arûme na aka ba taûni ya Ai ngiri îkûmi na ciîrî baûragirwe bonthe ntugû înu. 26 Njosua aakarire aûkîîrîîtie îtumo rîake arîorotithîîrîîtie rûteere rwa taûni ya Ai mwanka antû ba Ai bonthe baathirua cwe. 27 Îndî Isiraeri i beekamatîîre nyamû cia ndîîthia na into bira bingî baataîte taûniini îno, wa ta bûra Mwathani aathîîte Njosua. 28 Njosua aabîîthiirie Ai yatuîka kîthûmba kîa muu gîa ntwîre. Na i bu îkari wana îmunthî tûrî. 29 Njosua aacuuriirie mûnene wa Ai mûtîîni îgûrû mwanka ûgoro. Ûgoro riûa rîkîthûa, Njosua aaruta watho abeera mwîrî ûcurûûkue mûtîîni, na wagerwa agu mbere mwîrîgaani wa taûni înu. Baacooka bacuûmbîîra kîthûmba kînene kîa maiga, kîra kîrî oogo mwanka îmunthî tûrî.
Kwerûua gwa Kîrîîkanîro
30 Rîru Njosua aakîra Mwathani Ngai wa Isiraeri kîthînjîro, Kîrîmaani kîa Ebari. 31 Aagîakire kûringana na mawatho mara Musa mûruti ngûgî wa Ngai aandîkire îbukuuni rîa watho: ara maugîîte, “Mbakîraani kîthînjîro kîa maiga matarî macae na mataaro maringithua na îthaga.” Rîru baarutîra Mwathani kîgongwana gîa kûbîîthua agu îgûrû rîakîo na bamûrutîra kîngî gîa ngwatanîro. 32 Rîru aandîka ntheto wa ira ciandîkîîtwe cia watho bûbu bwa Musa maigaani mara maakîîte kîthînjîro, antû ba Isiraeri bakîonaga. 33 Rîru Aisiraeri bonthe, ageni na antû ba noogo, akûrû baao ba ntûûra anene baao na agambithania, bagaanîîtue ikundi biîrî. Gîkundi kîmwe kîarûûngi rungu rwa kîrîma kîa Ngerisimu, na kîra kîngî kîarûûngi rungu rwa kîrîma kîa Ebari. Wa kîra gîkundi gîacûbîîte kîra kîngî, na gatîgatî ga ikundi bibu, kwarûûngi athînjîri ba Ngai ba Arawi bara bakamatîîte îthandûkû rîa kîrîîkanîro kîa Mwathani. Bûbû bunthe bwarûthirwe kûringana na mawatho mara Musa, mûruti ngûgî wa Mwathani, eeyanîîte n'ûntû bwa kûthaarima antû ba Isiraeri. 34 Na Nyumaani, Njosua abathoomera biugo bionthe bia watho, ithaarimo na irumi bionthe bira Musa aandîkîîte îbukuuni rîa watho. 35 Gûtirî watho nwa bûmwe bwandîkîîtwe i Musa bûtathoomerwa antû ba Isiraeri bonthe i Njosua. Bwathoomeerwe arûme, aka, twana, wana kinya ageni bara baatûûraga gatîgatîîni ka antû ba Isiraeri.