Wîyia bwa Akani
7
1 Antû ba Isiraeri ibeethîîrwe batarî eetîgua mantûûni ma into bira biathûrîrîîtwe Mwathani. Muntû eetawa Akani mwana wa Karimi, mwana wa Sabundi,a mwana wa Sera, wa mwîrîga wa Njunda, aathûkia into bimwe bia bira biathûre. Kwoogu Mwathani aathûûra n'antû ba Isiraeri.2 Njosua aatûma antû kuuma Njeriko baathi kûthigaana taûni ya Ai, îra îrî uumîîrooni bwa riûa bwa Betheri, akubî na Bethi-Abeni. Abeera, “Îthiini bûkathigaane nthî.” Nabo antû babu baathi baathigaana Ai. 3 Bagûcooka beera Njosua ûûgû, “Twa mwanka antû bonthe bathi kwithûkîra Ai n'ûntû n'antû baakai barî ku. Menya ûnogia antû bonthe, tûma antû ngiri ciîrî kana ithatû bakamiithûkîre.”
4 Kwoogu antû bara baatûmirwe baarî ta ngiri ithatû, îndî bonthe i beengatiirue n'antû ba Ai. 5 Antû ba Ai beengatiirie Aisiraeri kuuma mwîrîgaani wa taûni mwanka Sebarimu na baûragîra antû mîrongo îthatû na bathanthatû mûtûndûrûkooni. Nabu ûcamba bwa antû ba Isiraeri bwathira na baakua nkoro.
6 Rîru Njosua na akûrû ba Isiraeri baatembûranga nguo ciao na beemincangîria muu biongo biao kwonania kîeba. Na baatiirithia moothiû maao nthîgûrû mbere ya îthandûkû rîa kîrîîkanîro kîa Mwathani baakara oogo mwanka ûgoro. 7 Na Njosua auga, “Itû, Mwathani Mwene Inya, i ka watûreetire rûgongo rwa muuro wa Njorondani ûtûnenkanîra njaraani cia Amori batûthiria? I kaaba tûgîkarire rûgongo rûra rûngî rwa Njorondani. 8 Itû Mwathani, mbuge ata. Aisiraeri i booneetie anthû mîgongo yao! 9 N'ûntû rîra Akanaani na antû bara bangî batwîre nthîgûrû îno bakeegua mantû mama, bagaatûkîîmba na batûthirie batûme riîtwa rîetû rîûra buru aaga nthîgûrû. N'ata ûkaarûtha n'ûntû bwa riîtwa rîaku rîînene?”
10 Mwathani n'we eera Njosua, “Ûkîîra! I mbi n'ûntû wamaama ûtiirithîîtie ûthiû bwaku nthî? 11 Isiraeri n'îyîîtie na baunanga kîrîîkanîro gîakwa kîra ndaarûthire nabo, i bathûkîîtie into bimwe bira biathûre; i baiyîîte, i barongwete, na i babiringanîrîîte na into biao bongwa. 12 Gîku i kîo n'ûntû Aisiraeri bakwîngatua n'anthû baao. Îîndî bo bongwa i batuîkîîte gîntû kîathûre gîa kwînyangua. Na ntiîgua ndî naabi kaîrî, twanga bûkeenyangia into bira bwîbaigîrîîte bira biathûrîîtwe birî bia kwînyangua. 13 Ûkîîra! Îra antû beetherie n'ûntû bwa rûû. Niû Mwathani Ngai wa Isiraeri ndiuga, ‘Into bimwe bira biathûrîîtwe n'ûntû bwa Mwathani i biithîîtwe gatîgatîîni keenu biû Aisiraeri. Bûtiûmba gûtura anthû beenu mwanka rîra bûkaarutaruta into bibu gatîgatîîni keenu.’ 14 N'ûntû bwa ûgu, rûû rûkîîrî bûkaaraûka kûreetwa kîrî niû bûthingateene wa bûra mîîrîga yenu îkari. Na Mwathani n'we agaataara mwîrîga ûra muntû ûra abîtîîtie aumîîte. Mwîrîga ûyu nau nwa mwanka uumîîre na mariiko maa u, na Mwathani oonanie riiko rîra rîrî na mabîtia. Riiko rîru narîo riumîîre, na Mwathani oonanie mûciî ûra ûrî na mabîtia. Kuuma mûciî antû bakeebumîria ûmwe kwa ûmwe. 15 Muntû ûra akaagwatwa na into bibu biathûrîîtwe birî bia kwînyangua akaabîîthua na mwanki, amwe na bionthe bira arî nabio. N'ûntû bwa kuuna kîrîîkanîro kîa Mwathani na n'arûthîîte ûntû bûrî îgi mûno ndeeni ya Isiraeri!”
16 Rûûni rûkîîrî Njosua aaraûka aareeta mîîrîga ya Isiraeri yonthe mbere ya Mwathani. Mwîrîga wa Njunda wathuurwa. 17 Rîru mariiko ma Njunda maareetwa, na riiko rîa Sera rîathuurwa. Rîru riiko rîa Sera rîareetwa mbere ya Mwathani, na mûciî wa Sabundi wathuurwa. 18 Mûthiani, mûciî wa Sabundi wareetwa ûmwe kwa ûmwe, na Mwathani athuura Akani mwana wa Karimi, mwana wa Sabundi, mwana wa Sera, wa mwîrîga wa Njunda. 19 Rîru Njosua eeta Akani amwîra, “Mwan'wakwa kaatha na ûkumie Mwathani Ngai wa Isiraeri na njîra ya kûmbîîra bunthe bûra ûrûthîîte, na ûtikaambithe nwa mbi.”
20 Akani n'we amûcookeria, “I mma mbîyîrîîtie Mwathani Ngai wa Isiraeri: Ûûgû i bu ndûthîîte 21 Kuumania na into bira twataîte indeerirîîrie na ndaathûkia kabuuti kaathongi mûno ga kuuma Mbabironi, ta kiro ciîrî cia fetha, na mûtî wa thaabu wa nkûrûki ya nucu kiro. Ûkabiona bithikîîtwe mûthetuuni îremaani rîakwa ndeeni, na fetha n'yo îrî ruungu.”
22 Kwoogu Njosua aatûma atûmwa bathi gûcûa into bibu. Baathûngîra îremaani na boona into bibu biithîîtwe ku, wa ta bûra Akani augîîte na fetha îrî ruungu rwa into bira bingî. 23 Baathûkia into babiruta îremaani babireeta kîrî Njosua na Aisiraeri bonthe na babianîka agu nthî mbere ya Mwathani. 24 Rîru Njosua na Aisiraeri bonthe baathûkia Akani wa kuuma riiko rîa Sera, fetha, kabuuti, mûtî wa thaabu, aana ba Akani, ng'ombe, mang'ooi, ng'ondu na îrema rîake na bionthe bira aarî nabio, na babireeta kîbondeeni gîa Akori. 25 Njosua aûria Akani, “I mbi n'ûntû watûreetera thîîna îno? Wana woû, Mwathani agakûreetera thîîna ta îno îmunthî.” Na nyuma ya ûgu Aisiraeri bonthe baûraga Akani na antû ba mûciî wake na maiga, na baabîîthia mîîrî yao na mwanki. 26 Baacooka baûmbîîra kîthûûmba kîînene kîa maiga îgûrû rîa mwîrî wake, na noo kîrî kinya îmunthî tûrî. Gîku i kîo n'ûntû bantû agu eetagwa kîbonde gîa Akori.b Kwoogu mûthûûro wa Mwathani wathira.