Njosua 6

Kûgwa kwa Njeriko

1 Mîrango ya Njeriko n'yaingîîtwe bwega n'ûntû bwa Aisiraeri. Na gûtirî we akîthûngîra ndeeni kana auma ome. 2 Mwathani eera Njosua, “Ngûkwa Njeriko njarani ciaku, amwe na mûnene wayo, na ncamba ciayo ira irî inya. 3 Woû amwe na acikaarî baaku bûkaathiûrûûkaga taûni înu rîmwe wa ntugû, bantû a ntugû ithanthatû. 4 Na athînjîri ba Ngai mûgwanja, bathûkie ngoci mûgwanja bathi bacikamatîîte batongorereetie îthandûkû rîru rîa kîrîîkanîro. Na ntugû ya mûgwanja, bûthiûrûûke taûni înu maita mûgwanja, athînjîri bakîringaga ngoci. 5 Rîra bûkeegua athînjîri babu ba Ngai baaringa ngoci nainya, naabi bweegua ngoci ikîringwa, antû bonthe bakurure nainya mûno, na rûthingo rwa taûni înu rûgaaturana nthî waagu mpu. Rîru njûûrî ya ndûa yonthe îthûngîre taûni.”

6 Kwoogu Njosua mwana wa Nuni eeta athînjîri ba Ngai amwe abeera, “Thûkiani îthandûkû rîa kîrîîkanîro, na bûthuure athînjîri mûgwanja bathi barî mbere yarîo. Athînjîri babu wa kîra ûmwe waciao eegue akamatîîte rûgoci.” 7 Nyuma ya ûgu eeta antû abeera, “Kûrûkaani bûthi bûkathiûrûûke taûni, na bara barî na mîrigo ya ndûa i bo bakaathi barî mbere batongorereetie îthandûkû rîru rîa Mwathani.”

8 Njosua akûrîîkia kwarîria antû, athînjîri bara mûgwanja ba Ngai bara baakamatîîte ngoci mûgwanja mbere ya Mwathani baathi barî mbere bagîciriingaga. Na athînjîri bara baakamatîîte îthandûkû rîa kîrîîkanîro bathingatîîrîîte. 9 Na antû bara baîbogeete mathaga ma ndûa baatongoreeria athînjîri ba Ngai bara baaringaga ngoci, bathingatwa n'athînjîri ba Ngai bara baakamatîîte îthandûkû rîa Mwathani, rîru baumwa nyuma i njûûrî îîngî yarî na mathaga ma ndûa. 10 Îndî Njosua n'aarî akwatha antû abeera, “Bûtigaakurure nkururo cia ndûa kana bûkîîria tûyû twenu kana bwaria mwanka ntugû îra nkabwîra buugîîrie.” 11 Kwoogu îthandûkû rîru rîa kîrîîkanîro rîakamatirwe rîathiûrûûkua taûni înu rîmwe akî ntugû înu, rîru wa muntû aacooka kambîîni kûraara noogo.

12 Rûûni rûkîîrî Njosua aûkîîra, na athînjîri babu ba Ngai baathûkia îthandûkû rîa Mwathani. 13 Athînjîri bara mûgwanja ba Ngai bara baarî na ngoci mûgwanja baatongoria, baathi barî mbere ya îthandûkû rîa Mwathani bakîringaga ngoci. Antû bara baîbogeete mîrigo ya ndûa babatongoreeria na bara baarî nyuma baathingata îthandûkû rîru rîa Mwathani, wa ngoci ikîringagwa. 14 Ntugû ya ciîrî baathiûrûûka taûni înu rîmwe akî baacooka kambîîni. Baarûthire ûgu bantû a ntugû ithanthatû.

15 Ntugû ya mûgwanja antû ba Isiraeri baûkire rûkîîrî rware rûgîtema, baathiûrûûka taûni înu maita mûgwanja wa ta bûra barûthaga, îndî nwa ntugû înu baamîthiûrûkire maita mûgwanja. 16 Îthiûrûûka rîa mûgwanja, athînjîri ba Ngai baaringa ngoci nainya, Njosua abeera, “Ugîîriani na inya! n'ûntû Mwathani akûbwa taûni îno. 17 Taûni îno na into bira birî ku bionthe i biathûrîrîtwe Mwathani biînyaangua. Nwa Raabu mûka ûra mûmaraaya na antû bara barî amwe n'we nyomba yake bagaatigwa barî mwoyo n'ûntû bwa kwitha athigaani bara twatûmîîte. 18 Îndî biû, bûtikaathûkie gîntû nwa kîmwe kîrî bira biathûrîîtwe biînyangua, na wegua t'ûgu biû bwingwa bûkenyangua cwe na bûkareeta kînyamaara Isiraeri yonthe. 19 Îndî fetha na thaabu cionthe, na into bira birûthîîtwe na gîkama kana îthaga i biitheru bia Mwathani na nwa mwanka biirwe kîgîînaani gîake.” 20 Antû bakwîgua tûyû twa ngoci ikîringwa, baugîîria na inya mûno, bûra kwaûmbîkanaga. Na rûthingo rwa Njeriko rwaturana nthî rwaragana, na Aisiraeri baaruuya taûni înu na nteere cionthe bamîgwata.

21 Bakûthûngîra ku, beenyangiirie gîntû kîonthe, na baûraga arûme na aka, aana anyi na akûrû, ng'ombe, ng'ondu, na mang'ooi.

Njosua oonokia Raabu

22 Rîru Njosua eera athigaani bara baîrî, “Îthiini nyomba ya îrwaya rîra rîa mûka bûmûrute nja amwe na antû baao bonthe wa ta bûra bwaigire wîrane n'we.” 23 Kwoogu athigaani babu baathi baaruta Raabu nja, îthe na gina, aruagina, na antû baao bonthe bara baarî gwake. Baumagarûkiirie antû ba mûciî wa ba Raabu bonthe na babaiga ome akubî na kambî ya Isiraeri. 24 Rîru Aisiraeri baabîîthia taûni înu na bionthe bira biarî ku. Îndî baiga fetha na thaabu cionka na into bira biarûthîîtwe na gîkama, kana bia îthaga kîgîînaani kîa Nyomba ya Mwathani. 25 Kwoogu Njosua n'aateethiirie Raabu mûmaraaya amwe n'antû ba mûciî wao bara aarî nabo nyomba gwake batikaûragwe, n'ûntû bwa kwitha antû bara Njosua aatûmîîte naagu Njeriko barî athigaani. Wana îmunthî tûrî Raabu nwa atûûraga kîrî antû ba Isiraeri.

26 Kagiitani gaku Njosua anyuithia antû babu muuma abeera, “Muntû ûra akaro aaka taûni îno ya Njeriko kaîrî aroogwatwa i kîrumi kîa Mwathani. Araûra kîîmbere gîake gîa kaîyî gîkaûra, akînjîra mûcingi wa gwaka taûni înu. Araûra kîremangita gîake gîa kaîyî gîkaûra, akîînjîra mîîrîga yayo.”

27 Kwoogu Mwathani aarî amwe na Njosua na nkuma yake n'yaiyîkeene nthîgûrû înu yonthe.