5
1 Rîra anene bonthe ba Amori bara baarî ûthwîrooni bwa riûa bwa muuro wa Njorondani, na anene bonthe ba Kanaani bara baatwîre îkumbo rîa Menditarîniani beegiirue bûra Mwathani aabwethiirie muuro wa Njorondani kaingo Aisiraeri baringa, baagwatirwe n'ûguaya na ûcamba bwao bwathira n'ûntû bwa Aisiraeri.Ntaano ira ciarî Girigari
2 Kagiitani gaku Mwathani eera Njosua, “Îîrûthîre tûyiû twa nkengeecû cia maiga, ûtaane aana ba Isiraeri kaîrî.” 3 Kwoogu Njosua eerûthîra tûyiû twa nkengeecû cia maiga na aataanîra aana ba Isiraeri Ngibea Aararothi.a 4 Na gîtûmi gîa kûrûtha ûgu i gîkî: Antû arûme bonthe bara baumire Miisiri bara bakîûmba kûthi ndûani, ibaarî bagûkuîra rwanda nyuma ya kuuma Miisiri. 5 Bara bonthe baumire Miisiri i baarî bataane, îndî bara baaciarîîrwe rwanda nyuma ya kuuma Miisiri, i bo bataarî bataane. 6 Aisiraeri bariûngire gûku rwanda mîanka mîrongo înna, mwanka rîra antû arûme bonthe bara baarî na ûkûrû bwa kûrûa bakiuma Miisiri baakuire. N'ûntû bwa kûrega kwathîkîra Mwathani, na Mwathani n'we aathiîtia auga atiireka bakinya nthîgûrû îra eeranîîte akanenkera beethe. Nthîgûrû înu yarî înoru mûno, yaûyûrîîte îria na ûkî. 7 Kwoogu Njosua n'arî agûkûria aana ba kûthûkia twanya twa beethe. Na baba i bo aataanire n'ûntû bataatanîrîtwe njîraani.
8 Nyuma ya ntaano cia antû ba Isiraeri yonthe ikûthira, baakarire agu baambîte marema mwanka ntaane ciora.
9 Rîru Mwathani eera Njosua, “Îmunthî nkûthiria îgi rîa Miisiri kîrî biû.” Na gîku i kîo gîtûmi bantû agu eetirwe Girigari mwanka îmunthî.
10 Aisiraeri wa barî Girigari mwaranthî wa Njeriko, ibaakûngwîre kîatho gîa Pasaka. 11 Na rûûni nyuma ya Pasaka, ntugû inu yongwa, baarîa rûciaro rwa maketha ma nthîgûrû ya Kanaani. Na baaruga mîgaate îtaarî na ndawa ya kwimbithia na ngano înkarange. 12 Kuuma ntugû înu baarîîre irio bia gûntû gûku, irio bira bietagwa mana biatiga kwonekana. Barîîyaga irio bira baakethaga naagu Kanaani.
Mûtongoria wa njûûrî ya Mwathani
13 Njosua wa arî akubî gûkinya taûni ya Njeriko, akûraitha oona muntû arûûngi mbere yake na rûûyiû agwete na njara. Njosua aathi kîrî we amûûria, “Woû ûrî ûmwe wetû kana ûrî mûnthû?”
14 Muntû ûyu amûcookeria, “Ntirî ûmwe wa babu. Niû ndî mûtongoria wa njûûrî ya Mwathani.” Rîru Njosua aagwa nthî na ûthiû akîmûtîîya, amûûria, “I ntûmwa mbi mwathi wakwa arî n'yo kîrî mûruti ngûgî wake?”
15 Mûnene ûyu wa njûûrî ya Mwathani amûcookeria, “Ruta iraatû biaku, n'ûntû bantû aaga ûkinyîîte n'atheru.” Na Njosua aarûtha wa bûra eerirwe arûthe.