Njosua 4

Maiga ma mûririkana

1 Rîra mûgongo uunthe wa Aisiraeri warîkiirie kûringa muuro wa Njorondani, Mwathani eera Njosua, 2 “Thuura antû arûme îkûmi na baîrî kuuma kîrî antû, wa ûmwe kuuma wa kîra mwîrîga. 3 Beere booye maiga îkûmi na maîrî kuuma wa ara ongwa athînjîri ba Ngai baarûûngi gatîgatî ka muuro wa Njorondani, na bûmaige bantû ara bûgaakara îmunthî ûtugû.”

4 Kwoogu Njosua eeta antû bara îkûmi na baîrî kuuma kîrî antû ba Isiraeri, bara aathuurîîte wa ûmwe kuuma kîrî kîra mwîrîga wa Isiraeri 5 na abeera, “Îthiini mbere ya îthandûkû rîa kîrîîkanîro kîa Mwathani Ngai wenu gatîgatî ka muuro, na kîra ûmwe wa cienu ooye iiga rîmwe arîkamate na gîturo na wa iiga rîrûgamîrîîte mwîrîga ûmwe kûringana na mîîrîga îkûmi na îîrî ya antû ba Isiraeri. 6 Maiga mama magaatuîka rwano gatigatîîni keenu. Ntugû ikaaya aana beenu bakaabûûria, ‘N'ata maiga mama makwonania?’ 7 Rîru nwa bûbeere, ‘Marîtûririkania atî rûûyî rwa muuro wa Njorondani i rwatigire kûthi mbere ya îthandûkû rîa kîrîîkanîro kîa Mwathani rîra antû ba Isiraeri baringîîre oogo.’ Maiga mama makeegua marî mûririkana kîrî tiû tene na tene.”

8 Kwoogu antû ba Isiraeri baarûthire wa ta bûra Njosua aabeerire. Baathûkiirie maiga îkûmi na maîrî kuuma gatîgatî ka muuro wa Njorondani, wa kîra mwîrîga iiga rîmwe, wa ta bûra Mwathani aathîîte Njosua. Baamakamatire baathi namo wa ara baareere na bamabaanga agu.

9 Kinya Njosua n'athûkiirie maiga mangî îkûmi na maîrî ameenjîra gatîgatî ka muuro wa Njorondani bantû ara athînjîri ba Ngai bara baakamatîîte îthandûkû rîa kîrîîkanîro baarûûngi. Wana îmunthî tûrî nwa wo maiga mamu marî.

10 Athînjîri bara baakamatîîte îthandûkû rîru baarûngamire gatîgatî ka muuro wa Njorondani mwanka rîra mawatho ma Mwathani mara Musa eete Njosua maathingatirwe. Antû baarûtha bûrî mpwî baaringa muuro. 11 Antû bonthe bakûrîîkia kûringa baakinya rûgongo rûra rûûngî, athînjîri nabo baaringa bakamatîîte îthandûkû rîru rîa kîrîîkanîro kîa Mwathani antû bakîonaga. 12 Îgiita rîra bariingaga muuro wa Njorondani antû ba mwîrîga wa Rubeni, na wa Ngandi na nucu ya mwîrîga wa Manase bara baarî na mathaga ma ndûa, i bo baaringire muuro barî mbere ya bara bangî, wa ta bûra Musa aabaathîîte barûthe. 13 Ta antû ngiri mîrongo înna ûgu barî na mathaga ma ndûa i bo baaringire muuro mbere ya Mwathani bathiîte bwa mwaranthî wa Njeriko kaingo barûa. 14 Ntugû înu n'yo Mwathani aûkîîrie Njosua antû ba Isiraeri bakîonaga, nabo bamûtîîya îgiita rîonthe rîra aatûûrire mwoyo wa ta bûra baatîîyaga Musa.

15 Na Mwathani eera Njosua, 16 “Ruta watho athînjîri ba Ngai bara bakamatîîte îthandûkû rîa kîrîîkanîro kîa Mwathani beetie baume Njorondani.” 17 Kwoogu Njosua aatha athînjîri ba Ngai, “Umîraani Njorondani.” 18 Na athînjîri ba Ngai bara bakamatîîte îthandûkû rîa kîrîîkanîro kîa Mwathani bakuumîra kuuma gatîgatî ka muuro ûgu baakinya nthî îmbûmo warîo rûûyî rûru rwacookanîra amwe kaîrî rwaunûka wa bûra ûkûrû.

19 Antû ba Isiraeri baaringire muuro wa Njorondani ntugû ya îkûmi ya mweri wa mbere na baathi baamba marema bantû eetagwa Girigari, uumîîrooni bwa riûa bwa Njeriko. 20 Agu Girigari noogo Njosua eenjîîre maiga mara îkûmi na maîrî mara baarutîîte Njorondani. 21 Rîru Njosua eera antû ba Isiraeri, “Ntugû ikaaya rîra aana beenu bakaûria beethe, ‘N'ata maiga mama makwonania?’ 22 bûbamenyithie atî, ‘Aisiraeri baariingire muuro ûyû wa Njorondani ûrî nthîgûrû îmbûmo îtarî na rûûyî.’ 23 N'ûntû Mwathani Ngai wenu aabwethiirie muuro wa Njorondani mwanka bwaringa wa ta bûra aatûrûthîîre Îria Rîtuune mwanka twaringanîria. 24 Aarûthire ûgu kaingo antû bonthe ba nthîgûrû bamenya atî njara ya Mwathani îrî na inya na kaingo bûgaatîîyaga Mwathani Ngai wenu tene na tene.”