Njosua 3

Aisiraeri baaringa muuro wa Njorondani

1 Rûkîîrî tene Njosua na antû bonthe ba Isiraeri bauma Sitimu baathi Njorondani ara baakarire mbere bariinga rûgongo rûra rûngî. 2 Nyuma ya ntugû ithatû, atongoria baakûrûkîîra gatîgatî ga kambî ara antû bambîîte marema maao 3 bakîeyaga antû mawatho bakîbeeraga, “Rîra bûkoona îthandûkû rîa kîrîîkanîro kîa Mwathani Ngai wenu rîkamatîîwe n'athînjîri bara Arawi, buume bûrîthiingate. 4 Rîru i rîo bûkaamenya njîra îra bûkaathi n'ûntû bûtaaro bûkinya noogo kaîrî. Îndî bûthi bûrî gataaria mma ta kîromita îmwe ûgu bûtikaathi akubî narîo.”

5 Njosua eera antû, “Îîtherieni, n'ûntû rûû Mwathani akaarûtha mantû ma kûrigaria gatîgatîîni keenu.” 6 Njosua eera athînjîri ba Ngai, “Thûkiani îthandûkû rîa kîrîîkanîro bûtongoreerie antû.” Kwoogu barîthûkia baathi barî mbere.

7 Mwathani eera Njosua, “Îmunthî nkanjîîria gûgûkîîria na mbonie antû bonthe ba Isiraeri bamenye ndî amwe naawe wa ta bûra ndaarî na Musa. 8 Naawe wîre athînjîri ba Ngai bara bakamataga îthandûkû rîa kîrîîkanîro, ‘Bwakinya rûgombeeni rwa muuro wa Njorondani bûthi bûrûngame muurooni.’ ”

9 Rîru Njosua eera antû ba Isiraeri, “Ncûûni aaga bwîgue biugo bia Mwathani Ngai wenu.” 10 Ûûgû i bu bûkaamenya Ngai ûra atûûraga mwoyo arî gatîgatîîni keenu. Na mma akeengatia mbere yenu Akanaani, Aiti, Aibi, Aperisi, Angirigasi, Amori na Anjebusi. 11 Ta raithaani, îthandûkû rîa kîrîîkanîro rîa Mwathani wa nthîgûrû yonthe, rîkabûtongoreeria mwanka bûringe Muuro wa Njorondani. 12 Îîndî, thuuraani antû îkûmi na baîrî ba mîîrîga ya Isiraeri, wa mwîrîga uume muntû ûmwe. 13 Rîra athînjîri ba Mwathani bara bakamataga îthandûkû rîa kîrîîkanîro kîa Mwathani Mwene Inya, Mwathani wa nthîgûrû yonthe bagaakinyithia magûrû maao rûûyîîni ûgu, rûûyî rwa Njorondani i rûkarûngama rûtige kûthi. Na rûûyî rûra rwîndamaga ruumîîte bwa îgûrû i ru rûkarûngama rwîbûûmbe kîthûûmba.

14 Rîra antû baumire kambîîni kaingo bariinga muuro wa Njorondani, athînjîri ba Ngai nabo bara baakamatîîte îthandûkû rîa kîrîîkanîro baathi batongoretie. 15 Kwarî îgiita rîa maketha, na muuro wa Njorondani wayîîte ûkaunûka. Warîo athînjîri ba Ngai bagûkinyithia mbayo ciao rûûyîîni ûgu, 16 rûûyî rûra rwaumîîte mbarî ya bwa îgûrû rwatiga kwîndama. Rwaûmba kîthûûmba taûniini ya Andamu îra îrî akubî na taûni ya Sarethani. Rûûyî rûra rwendamaga mwanka Îria rîtarî Mwoyo naru rwatiga kwîndama cwe. Kwoogu antû baaringa beerekerete taûni ya Njeriko. 17 Athînjîri ba Mwathani bara baakamataga îthandûkû rîa kîrîîkanîro kîa Mwathani, baarûngama beerikîîtie bantû atarî na rûûyî gatîgatî ka muuro wa Njorondani. Na mwanka antû bonthe ba Isiraeri barîîkia kûringa muuro wa Njorondani.