Raabu oonokia athigaani
2
1 Rîru Njosua mwana wa Nuni aatûma gîîciri athigaani baîrî kuuma Sitimu.a Abeera, “Îthiini bûthigaane nthîgûrû ya Kanaani na mûno mûno taûni ya Njeriko.” Kwoogu baathi bathûngîra nyomba ya îrwaya rîetawa Raabu baakara ku.2 Îndî mûnene wa Njeriko n'eerirwe, “Kûrî Aisiraeri baraayîre ûtugû bûbû kûthigaana nthîgûrû yetû.” 3 Kwoogu mûnene wa Njeriko aatûma antû baake kîrî Raabu akiugaga, “Ruta antû arûme bara baraayire na baathûûngîra nyomba yaku, n'ûntû baayîîte kûthigaana nthîgûrû yonthe.”
4 Îndî mwekûrû ûyu n'we n'aarî akûthûkia antû arûme babu baîrî abaitha. Auga, “Yii, antû arûme babu i baraayire gwakwa, îndî twaka ndaramenyaga naara baraumîîte. 5 Ûgoro na kairiri, mathaa ma kwinga mîîrîga ya taûni, îrîo antû arûme babu barathiire. Ntikûmenya barathiire njîra îrîkû. Bathingateeni na mpwî bwaûmba kûbagwatagwata.” 6 Îndî we n'arî akûbathûkia abaitha rûûgûrû rwa nyomba na abakunîkîra na rûûa rûra aarîîte rûûgûrû rwa nyomba. 7 Kwoogu antû ba mûnene baumagarûka beengana na athigaani bathiîte na njîra îra îthiiyaga iriingîrooni bia muuro wa Njorondani. Antû babu beenganîîte na athigaani bakuuma, mîîrîga ya taûni yaingwa. 8 Mbere ya athigaani babu bamaama, Raabu eetia naagu rûûgûrû, 9 abeera, “Imbiyî Mwathani n'abwete nthîgûrû îno, na twinthe bara tûrî gûkû itûkûbûkuthûka. Kîra muntû n'akwinaina n'ûguaya n'ûntû bwenu. 10 Itwegiirue bûra Mwathani aabwethiirie Îria Rîtuune bûgûkinya oogo rîra bwaumîîte Miisiri, na nwa twegiirue bûra bwarûthire Sioni na Ogu na anene bara baîrî ba Amoabu uumîîrooni bwa riûa bwa Njorondani bara bwathiriirie cwe. 11 Tûkwîgua mantû mamu, nkoro cietû ciaûyûrwa n'ûguaya, na wegua gûtirî nwa ûmwe wacietû ûbweteera. N'ûntû Mwathani Ngai wenu n'we wathanaga îgûrû na nthîgûrû. 12 Rîru îîndî, thiîtiani na Mwathani bûmbîîre bûkaambîgîîrua kîao amwe na aciari baakwa, wa ta bûra ndabûrûthîra. Mboniani rwano rwa mma 13 atî, bûtiûraga baaba na taata, aruayia na aarayia na bara barî baao bonthe na atî bûgatwonokia kuumania na gîkuû.” 14 Bamûcookeria, “Warega kuumbûra mantû mara tûkûrûtha tûgakûrûthîra bwega na njîra îra îrî ya wîtîgîka, Mwathani atwa nthîgûrû îno. Twarega kûrûtha ûûgû i kaaba tûkue.” 15 N'ûntû nyomba ya Raabu yarî îgûrû rûthingoni rwa taûni înu, abakinyûkîîria na mûkanda ndîrîcaani. Aabanenkeerie mûkanda abooneeria ndirica baakinyûka. 16 Abeera, “Îthiini îîndî bûkeebithe kîrîmaani. Bûkare ku bantû a ntugû ithatû mwanka rîra bara bakaaya bakîbûcwaga bagacooka, rîru naabi bwîthiîre.” 17 Athigaani bamwîra ata rî, “Tûticookwa i muuma ûra watûrîîthia, 18 tatiga naawe rîra tûkathûngîra nthîgûrû îno, wîgue ûrûthîîte mantû mama: Wîgue wogeereete mûkanda ûyû mûtuune ndîrîcaani îra watûgûrûkîîria, wîgue ûreteete nyûkwe na abaagu, aruanyûkwe na mûciî wenu uunthe nyomba yaku. 19 Ûkaaya kwîgua kûrî we akauma nyomba yaku athi na njîra, na aûragwe mamu makeegua marî mabîtia maake na muuma îtitûcooka. Îndî ûra n'we akaringithua arî nyomba, nthakame yake îgatûcooka. 20 Amwe na ûgu, naawe watûkunyanîra, tûtiaiga wîrane bwetû na muuma îno îtitûcooka.” 21 Raabu abeera, “Nkaarûtha woogu bwambîîra.” Rîru aacooka abaumagarûkia nja na baathi. Na aakundîkîîra mûkanda ûmûtuune ndîrîcaani. 22 Athigaani bauma beetia kîrîmaani baakara noogo ntugû ithatû. Antû bara baatûmîîtwe i mûnene bathi kûbacwa, baathiûrûûkire barabaraani cionthe baanoga. Na bacooka maara mpî. 23 Rîru athigaani babu baagûrûka kîrîmaani, baaringa muuro wa Njorondani, na baathi beera Njosua mwana wa Nuni mantû monthe bûra maakarîkire. 24 Beera Njosua ata rî, “Na mma Mwathani n'atwete nthîgûrû îno yonthe yatuîka yetû, n'ûntû antû bara barî ku i bakwinaina n'ûguaya n'ûntû bwetû.”