NJOSUA
Ngai aanenkera Njosua mawatho
1
1 Nyuma ya mûruti ngûgî wa Mwathani Musa agûkua, Mwathani eera Njosua mwana wa Nuni ûra aarî mûteetheeria wa Musa. 2 “Mûruti ngûgî wakwa Musa n'ûmûkuû. Îîndî îthuuranîre wou na antû ba Isiraeri bûriinge muuro wa Njorondani bûkinye nthîgûrû îra nthiîte kûbûnenkera. 3 Wa ara onthe bûgaakinya na magûrû meenu, nkabûnenkera oogo atuîke eenu wa ta bûra ndeeranîîre Musa. 4 Mwanka wenu ûkanjîîria kuuma ng'arûûni mwanka Rebanoni îno, na kuuma muurooni ûra mûnene wa Yufîrîti mbarî ya uumîîro bwa riûa, gûkûrûkîîra nthî ya Aiti mwanka îriani rîa Menditarîniani mbarî ya ûthwîro bwa riûa. 5 Gûtirî muntû akaûmba kûrûngama kîînyume naawe ntugûûni cionthe cia mwoyo waku. Wa ta bûra ndaarî na Musa, nwa ta bu nkeegua ndî amwe naawe. Ntikûrekeeria kana ngûtiganîria. 6 Îgua ûrî na inya na ûcamba, n'ûntû I woû ûgatongoreeria antû baba bakathûkie rûgai rwa nthî îra ndeeranîîre biûyûûyû biao atî nkabaneenkera. 7 Îgua ûrî na inya na ûcamba mûno. Ûmenyeere kwathîkîra mawatho monthe mara mûruti ngûgî wakwa Musa aakwere. Ûtikamatiganîrie ûthi bwa ûrîo kana bwa ûmotho, kaingo ûkaûmbana kunthe kûra ûkaathi. 8 Ûtikaareke îbuku rîrî rîa mawatho riuma kanyuani gaaku. Rîthûgaanagîrie mûthenya na ûtugû, kaingo ûûmba kûrûtha bunthe bûra bwandîkîîtwe ku. Rîru ûgakaraga bwega na ûkîûmbanaga. 9 Ntirakwatha? Wîgue ûrî na inya na ûcamba. Ûtikaaguaye, ûtigaakue nkoro, i kwîthîrwa Mwathani Ngai wenu akeegua arî amwe naabi wa ara onthe bûkaathi.”Njosua aathuuranîra antû
10 Rîru Njosua aatha atongoria ba antû ûûgû, 11 “Kûrûkîîraani kambîîni bûthi bûkîîraga antû ûûgû: ‘Thuuranîraani irio bia kûbûgana n'ûntû bantû a ntugû ithatû ciiyîîte tûkaaringa muuro wa Njorondani tûkinye nthîgûrû îra Mwathani Ngai wetû akûbûnenkera îtuîka yenu.’ ” 12 Njosua eerire antû ba mwîrîga wa Rubeni na wa Ngandi na nucu ya mwîrîga wa Manase ata rî, 13 “Ririkanaani bûra Musa, mûruti ngûgî wa Mwathani aabwîrire atî, Mwathani Ngai wenu n'akûbwaa kûnogoka na akûbûnenkera nthîgûrû îno îra îrî umîîro bwa riûa bwa muuro gwa Njorondani. 14 Eekûrû beenu, aana beenu, na nyamû cienu cia ndîîthia bagaatigwa rûgongo rûrû rwa muuro. Îndî acikaarî, bara barî na mîrigo ya ndûa, i bo bakaaringa muuro bathiiyage barî mbere batongorereetie aruanyûkwe. Tetheeriani aruanyûkwe 15 mwanka begwatîre nthîgûrû îra îrî ûthwîro bwa riûa bwa muuro wa Njorondani ara Mwathani akûbaa kînogoko wa ta bûra aabwere. Aaga noogo Mwathani Ngai wenu aabeere. Nyuma ya ûgu, bûcooke nthîgûrû yenu, îra Musa mûruti ngûgî wa Mwathani aabwere uumîîroni bwa riûa bwa muuro wa Njorondani.”
16 Rîru baacookeria Njosua bamwîra, “Tûkaarûtha bunthe bûra watwîra na wa ara onthe ûgaatûtûma tûkaathi. 17 Tûgakwathîkîra, wa ta bûra twathîkagîra Musa. Mwathani Ngai waku arookaraga naawe wa ta bûra aakaraga na Musa! 18 Muntû wonthe ûra agaakûûmîria kîongo na arege kwathîkîra mîgambo yaku, na bûra ûûmba kûbeera, i ka akaûragwa. Bunka îgua ûrî na inya na ûcamba!”