Njosua aromba Ngai riûa rîrûngama
10
1 Mûnene Andoni Sendeki wa Njerusaremu eegua atî Njosua n'atunyanire taûni ya Ai, na aamînyangia cwe, na aûraga mûnene wa noogo wa ta bûra aarûthire Njeriko na mûnene wayo, na atî antû ba Ngibeoni i baarûthire kîrîîkanîro gîa ûkiri na antû ba Isiraeri na n'atûûri baao. 2 We na antû baake baamakire mûno bakwîgua ûgu n'ûntû Ngibeoni yarî taûni îînene na yakari ta taûni îmwe ya ira ciakaragwa n'anene, na kaîrî n'yo yarî nene kîrî Ai, na antû ba noogo bonthe baarî ncamba indito cia ndûa. 3 Kwoogu, Andoni Sendeki mûnene wa Njerusaremu aatûmana kîrî Oamu mûnene wa Eburoni, na kîrî Piramu mûnene wa Njarimuthi, na kîrî Njafia mûnene wa Rakisi na kîrî Ndebiri mûnene wa Egironi. Akiugaga, 4 “Ncûûni bûnteethie tûkarûe na Ngibeoni, n'ûntû antû ba noogo i barîîkanîîre kîrîîkanîro gîa ûkiri na Njosua na antû ba Isiraeri.”5 Rîru anene babu bataano ba Amori, nabo baarî mûnene wa Njerusaremu, mûnene wa Eburoni, mûnene wa Njarimuthi, mûnene wa Rakisi, na mûnene wa Egironi, beeringanîra amwe bonthe baakîîmba Ngibeoni na barûa n'yo. 6 Antû ba Ngibeoni baatûma atûmwa kîrî Njosua arî kambîîni îra yarî Girigari. Bauga, “Ûtigaatiganîrie aruti ngûgî baaku, ncû aaga na mpwî, ûtûteethie tûtikaûragwe! N'ûntû anene ba Amori bonthe bara batwîre nthî ya irîma i baayire na acikaarî baao gûtuithûkîra.”
7 Kwoogu Njosua aumire Girigari eetia noogo, we amwe na acikaarî bonthe bara baarî ncamba irî inya cia ndûa. 8 Mwathani n'we eera Njosua, “Ûtikaabakuthûke, n'ûntû imbanenkanîrîte njaraani ciaku. Na gûtirî nwa ûmwe waciao akaûmîîria kûrûûngama mbere yaku.”
9 Njosua na antû baake ba ndûa baareere kûthi na ûtugû kuuma Girigari na nthûti îmwe baumbuthûra njûûrî ya acikaarî ya Aamori. 10 Mwathani abarigicania mbere ya Aisiraeri. Aisiraeri baûraga baingî mûno naagu Ngibeoni, na beengatia bara bangî babeerekereetie mworoncooni wa Bethi-Oroni, na babaûraga mwanka babakinyithia Aseka na Makenda. 11 Wa bûra antû ba Amori baugîîtie na barabara îra yaumîîte bwa Bethi-Oroni bakuthûkîîte Aisiraeri, Mwathani n'we aabathiriirie na kûbaurithîria mbura ya ncûgû. Mbura înu yathiire mbere na kûbaurîra mwanka baakinya Aseka. Mbura înu n'yo yaûragire anthû baingî nkûrûki ya bara baûragirwe n'antû ba Isiraeri.
12 Rîru Njosua aaromba Mwathani ntugû wa înu Mwathani aateethiirie antû ba Isiraeri baatura antû ba Amori. N'we augire ûûgû mbere ya antû ba Isiraeri,
“Ka riûa rîrûngame ki îgûrû rîa Ngibeoni,
na mweri ûrûngame îgûrû rîa kibonde kîa Aiyaroni.”
13 Kwoogu riûa rîarûngama na mweri na uu ûtenyeenya mwanka rîra mûgongo ûyu waaturire anthû baao. Anga ûntû bûbû bûtiandîkîîtwe îbukuuni rîa Njasarû? Ara augîîte, “Narîo riûa rîarûngamire gatîgatî ka matu, na rîteegua rîrî na mpwî cia kûthûa akubî mûthenya unthe.” 14 Gûtaaro kwîgua kûrî na ntugû ta înu kaîrî îra Mwathani eegîîrue maromba ma muntû na njîra ta înu. Na mma Mwathani n'aarwîrîîre Isiraeri.
15 Nyuma ya ûgu, Njosua na antû bonthe ba Isiraeri i baacookire kambîîni naagu Girigari.
Njosua agwata anene Bataano ba Amori
16 Anene babu bataano baugiirie baakuthûka, na beebitha îkurunguuni naagu Makenda. 17 Na Njosua n'eerirwe atî anene babu bataano i bethîîrwe beebithîîte îkurunguuni naagu Makenda. 18 Njosua auga, “Ingiritiani maiga mara manene bûkunîke mûromo wa îkurungu rîru namo, na bûbange antû ba kûrîkaria. 19 Îndî biû bwingwa bûtikaarûngame oogo, thingatanaani na anthû beenu, na bûbaûrage bûrî nyuma yao, bûtikaabareke bathûngîra taûniini ciao, n'ûntû Mwathani Ngai wenu n'abanenkanîrîte njaraani cienu.” 20 Kwoogu Njosua na antû ba Isiraeri baûraga anthû baao nainya mûno, îndî bamwe baao bara baatigarire baathûngîra taûniini ciao ira mbirigîre na nthingo. 21 Njûûrî yonthe ya acikaarî n'yacookire kîrî Njosua îrî mayîîga kambîîni yao îra yarî Makenda, na nyuma ya ûgu gûtirî we aaria ûntû nwa bûrîkû kîînyume na Isiraeri.
22 Rîru Njosua auga, “Kunûraani mûromo wa îkurungu, na bûrute anene babu bataano îkurunguuni bûndetere bo aaga.” 23 Nabo baarûthire wa bûra beerirwe, baarutire anene babu barî bataano îkurunguuni babaira kîrî we. Nabo baarî, mûnene wa Njerusaremu, mûnene wa Eburoni, mûnene wa Njarimuthi, mûnene wa Rakisi, na mûnene wa Egironi. 24 Rîra acikaarî ba Isiraeri baarutire anene babu babaira kîrî Njosua, Njosua aatûmanire kîrî antû ba Isiraeri bonthe, na eera anene bara batongorereetie njûûrî ya ndûa bara aathiire nabo, “Ncûûni akubî, kinyithiani mbayo cienu nkingooni cia anene baba.” Na baarûtha woogu. 25 Njosua abeera, “Bûtikaamake kana bûkua nkoro îguani bûrî na inya na bûrî na ûcamba, n'ûntû ûûgû i bu Mwathani athiîte kûrûtha kîrî anthû beenu bonthe.” 26 Na nyuma ya ûgu Njosua aûraga anene babu barî bataano na abacuuria mîtîîni îtaano woogu. Na baatigirwe bacuuri mîtîîni mwanka ûgoro. 27 Riûa rîkîthwa, Njosua aaruta watho mîîrî înu ya anene îcurûûkue mîtîîni îgûrû, na yagerwa îkurunguuni rîra beebithîîte na baakunîkîra mûromo wa îkurungu rîru na maiga manene, na nwa woo marî kinya îmunthî tûrî.
Taûni cia naiti ciacindwa
28 Ntugû wa înu n'yo Njosua aagwatire taûni ya Makenda amîthiria cwe. Aûragire antû baayo bonthe na mûnene mwene. Gûtirî muntû nwa ûmwe wa taûni înu aatigwa arî mwoyo. Aûragire mûnene wa Makenda wa ta bûra aûragire mûnene wa Njeriko.
29 Rîru Njosua na antû ba Isiraeri bonthe bara aarî nabo baumire Makenda, baathi Ribuna, na aithûkîra antû ba Ribuna. 30 Mwathani aaneenkanîra kinya taûni înu ya Ribuna amwe na mûnene wayo njaraani cia Isiraeri. Na baûraga antû ba taûni înu bonthe na gûtirî nwa ûmwe aatigara. Rîru aacooka aûraga mûnene wa Ribuna wa ta bûra aarûthire mûnene wa Njeriko.
31 Nyuma ya ûgu, Njosua na antû ba Isiraeri bonthe bara aarî nabo baakûrûka kuuma Ribuna baathi Rakisi bamîkîîmba na baarûa n'yo. 32 Mwathani n'we aanenkanîra Rakisi njaraani cia Aisiraeri. Na Njosua amîthûkia ntugû ya ciîrî. Taûni înu na muntû wonthe ûra aarî ku, bonthe aabaûragire wa ta bûra aarûthire naagu Ribuna.
33 Îgiitaani rîru Rakisi yagwatagwa, mûnene Oramu wa Ngeseri aarî agûkinya ku na njûûrî yake ya ndûa gûtetheeria Rakisi. Îndî acikaarî ba Njosua nabo baûraga mûnene Oramu na baathiria acikaarî baake bonthe na gûtirî nwa ûmwe aamonyia.
34 Kuuma agu Njosua na acikaarî babu ba Isiraeri baathi bwa Egironi na bamîgwata. 35 Baamîgwatire ntugû wa înu, na wa ta bûra kwarûthirwe Rakisi, baûragire muntû wonthe ûra aarî taûni înu.
36 Rîru Njosua amwe na antû ba Isiraeri bonthe bara aarî nabo bakuuma Egironi, baathiire baakinya Eburoni. Na baarûa n'yo, 37 bamîtura bamîthûkia. Baûraga mûnene wayo na bonthe bara baarî ku amwe na anene ba ntûûra ira ciarî akubî. Na gûtirî muntû nwa ûmwe watigwa ku arî mwoyo, wa ta bûra aarûthîîte Egironi.
38 Rîru Njosua, na Aisiraeri bonthe bara aarî nabo, baagarûkîra Ndebiri na baarûa n'yo, 39 na amîthûkia amwe na mûnene wayo na ntûûra ciayo cionthe, na baatemanga antû na mpiû, na baûraga muntû wonthe ûra aarî ku; na gûtirî we aatigara; wa ta bûra aarûthîîte Eburoni na Ribuna na mûnene wayo, nwabu aarûthire Ndebiri na mûnene wayo.
40 Kwoogu Njosua n'aacindire nthîgûrû înu yonthe. Aatura anene bara batwîre nteere cia irîma, Negebu, mwaranthî wa irîma uumîîroni bwa riûa, wana bara baatwîre nthî îmbûmo rûteere rwa naiti. Gûtirî muntû nwa ûmwe aatigara, bonthe i baûragirwe. Bûbû i bu Mwathani Ngai wa Isiraeri aathanîîte. 41 Njosua aabacindire kuuma Kandesi-Barinea mwanka Gasa, na nthîgûrû yonthe ya Ngoseni, mwanka Ngibeoni. 42 Njosua aaturire anene babu bonthe na nthîgûrû ciao îgiita rîmwe, n'ûntû Mwathani Ngai wa Isiraeri, n'we aarwîrîîre Isiraeri. 43 Nyuma ya ûgu, Njosua na antû ba Isiraeri bonthe bara aarî nabo, bacooka kambîîni yao Girigari.