Mawatho ma Anasiri
6
1 Mwathani aaria na Musa amwîra, 2 “Îra antû ba Isiraeri ata rî, muntû mûrûme kana mûka akeenda kûthiîtia mûthiîtio wa mwanya wa gûtuîka Mûnasiri eeneenkanîra kîrî Mwathani, 3 atibatîîrue anyua ndibei kana ncoobi. Atibatîîrue kûnyua gîa kûnyua kîra kîrûthîîtwe na ncabiibû kana arîa ncabiibû imbîthî kana irî mbûmithie. 4 Bunka woû arî Mûnasiri, atibatîîrue arîa gîntû kîonthe kiumanîîtie na mûnda wa mîcabiibû, atikaaarîe kinya mpîndî kana makonde ma ncabiibû.5 “Îgiita rîonthe rîra akeegua oogeetwe i mûthiîtio wa gûtuîka mûnasiri, atibatîîrue kûgiita kana kwenja ntundu ciake. Bakeegua boogeetwe i mûthiîtio ûyu îgiita rîonthe rîra beeneenkanîîre kîrî Mwathani na mwanka barekie ntundu ciao ikûre.
6 “Na îgiita rîru eeneenkanîrîîte kîrî Mwathani atibatîîrue akinya akubi na kiimba. 7 Wana kinya gina kana îthe wengwa, kana mûruagina kana mwaragina agakua atibatîîrue atheengeera kiimba eegwatithia mûgiro n'ûntû rwano rwake rwa kwîneenkanîra gwake kîrî Ngai rûrî kîongo gîake. 8 Îgiitaani rîru rîonthe rîa kwîbathûrana na bara bangî n'abatîîrue eeneenkanîra kîrî Mwathani.
9 “Muntû akaaya gûkua nthûti bûra Mûnasiri ataûmba kûrigîîria kûmûtongithia, akeegua arî na mûgiro ntugû mûgwanja na ntugûûni înu ya mûgwanja nabatîîrue eenja ntundu ntugû ya kûthera. 10 Na ntugû ya inyanya areete macea maîrî ma mûciî kana ma kîthaka kîrî mûthînjîri wa Ngai mwîrîgaani wa Îrema rîa Kûrîîkanaga 11 Mûthînjîri wa Ngai akaaruta îcea rîmwe rîrî kîgongwana n'ûntû bwa wîyia na rîru rîngî rîrî kîgongwana gîa kûbîîthua kaingo atherua kuumania na mûgiro wa kûriingithia kiimba. Na ntugû wa înu akaaneenkanîra kîongo gîake kaîrî. 12 Nwa mwanka eeneenkanîre kîrî Mwathani wa îgiita rîa kwîbathûrana na babu bangî na nabatîîrue kûruta gatûrûme ka mwanka ûmwe karî kîgongwana n'ûntû bwa îbîtia. Îgiita rîra rîa mbere rîtiitarwa n'ûntû n'aarî akûgwatwa i mûgiro îgiita rîa kwîbathûrana na bara bangî.
13 “Îgiita rîa kwîbathûrana na bara bangî rîathira, Mûnasiri akaathi mwîrîgaani wa Îrema rîa Kûrîîkanaga 14 arutîre Mwathani nyamû ithatû itarî koothûûku nwa kaniini. Nacio nyamû inu ûkeegua ikari ûûgû; gatûrûme ka mwanka ûmwe karî ga kîgongwana kîra kîbîîthagua, kamwatî ka mwanka ûmwe karî ga kîgongwana n'ûntû bwa wîyia na ntûrûme îrî ya kîgongwana kîa ngwatanîro. 15 Agaacooka arute gîkabû kîûyûri mîgaate îtarî miimbithie. Îno yarî mîgaate îrugîîtwe na mûtu ûkimanîîtue na maguta na tûmîgaate twembembû twakîîtwe maguta. Na i kwarî na biewa bia irio na ndibei.
16 “Mûthînjîri wa Ngai akaaruta into bibu bionthe kîrî Mwathani na arute kîgongwana n'ûntû bwa wîyia na kîgongwana gîa kûbîîthua. 17 Akaarutîra Mwathani ntûrûme îrî kîgongwana kîa ngwatanîro na arute amwe na gîkabû kîa mîgaate, ûntû bûmwe na biewa bia irio na bia ndibei. 18 Agu mwîrîgaani wa Îrema rîa Kûrîîkanaga n'ogo Mûnasiri akeenjera ntundu ciake na acibîîthîe na mwanki ûra ûkûbîîthia kîgongwana kîa ngwatanîro.
19 “Rîru, rîra gîciri gîa ntûrûme gîkeegua gîkûrugîka kîabîa, mûthînjîri akaathûkia kîo, ûntû bûmwe na mûgaate ûmwe ûmûnene na kamûgaate kamwe keembembû, abiaigîîre njaraani cia Mûnasiri. 20 Nyuma ya ûgu mûthînjîri akabiûkîîria mbere ya Mwathani birî biewa bîa mwanya kîrî Mwathani, nabio i biewa biitheru bia mûthînjîri, amwe na kîbara na kûgûrû gwa ntûrûme. Nyama inu i cia mûthînjîri kûringana na watho. Nyuma ya ûgu Mûnasiri nwa anyue ndibei.
21 “Mama i mo mawatho ma Anasiri. Mûnasiri ûra athiîtagia kûrutîra Mwathani nkûrûki ya bûra abatîîrue kûmûrutîra kagiita kara ebathûranîîte na bara bangî nabatîîrue kûûyûria mûthiîtio wake kûrû.”
Ithaarimo bia athînjîri ba Ngai
22 Mwathani aaria na Musa amwîra ata rî, 23 Îra Arûni na nthaka ciake ata rî, Ûûgû i bu bukaathaarimaga antû ba Isiraeri:
24 Mwathani aroobûthaarima
na akabûmenyeera;
25 Mwathani arootûma ûthiû bwake bûbûthararîra
na kûbwonia ûtugi;
26 Mwathani aroobûûndûkîria ûthiû bwake
na akabûnenkera ûkiri.
27 “Wona baagweta riîtwa rîakwa bakîthaarima antû ba Isiraeri naani nkabathaarima.”