Ûtheru kambîîni
5
1 Mwathani aaria na Musa amwîra ata rî, 2 “Îra antû ba Isiraeri barutarute kambîîni muntû wonthe arî na mûtigiri, kana akûrua nthakame kana muntû ûgwatithîîtue mûgiro i gûtongithia kiimba, baume gatîgatî kaao. 3 Îngatiani antû babu barî na mûgiro bonthe giria bakaagwatithia gîkaro kîra ntûûraga na antû baakwa mûgiro. 4 Aisiraeri baathîkîîre watho bûbû wa ta bûra Mwathani aathîîte Musa na beengatia antû ba mîthemba înu yonthe kuuma gatîgatî kaao.”Îrîi rîa muntû abîtîîtie
5 Mwathani aaria na Musa amwîra, 6 “Îra antû ba Isiraeri ata rî, muntû akaaya kwîgua ti mwîtîgua kîrî Mwathani na akabîtîria muntû ûra ûngî, 7 muntû ûyu abatîîrue kuumbûra wîyia bwake na arîe îrîi rîûyûri na oongeere gacuncî kamwe kuuma kîrî itaano ka îrîi rîru, kîrî muntû ûra abîtîrîîtie. 8 Îndî ûkaaya kwîgua muntû ûyu mûbîtîrie n'akuîte na gûtirî muntû wa mûciî wake arî oogo ûra aûmba kûneenkerwa îrîi rîru, îrîi rîru rîkairwa kîrî Mwathani rîthi na mûthînjîri wa Ngai. Na akaaruta ntûrûme n'ûntû bwa kûtherua kuumania na wîyia bwake. 9 Na rî, maruta monthe ma mwanya mara antû ba Isiraeri bakaarutagîra Mwathani magaatuîkaga ma mûthînjîri wa Ngai ûra airîrwa maruta mamu. 10 Woora mûthînjîri wa Ngai, akaathiiyaga na into bira bianeenkanîrwa kîrî we.”
Mantû meegiî aka bara batarî eetîgua
11 Rîru Mwathani aaria na Musa amwîra ata rî, 12 “Îra antû ba Isiraeri, mûka wa muntû akaaya kuumagara agatuîka ti mwîtîgua kîrî mwene, 13 akamaama na muntû mûrûme ûngî mûrûmûûe atakûmenya na wîyia bwake bûkarega kûmenyekana n'ûntû gûtirî na mûnkûûyî na atiragwatwa akîrûtha ûntû bûbu, 14 kana ûkaaya kwîgua muntû n'akwîgua mwekûrû wake rûriitho, wana waaya kwîgua mûka ûyu atithûûngîîrîîte, 15 gûkari ta ûgu, muntû ûyu abatîîrue aira mwekûrû wake kîrî mûthînjîri wa Ngai. Abatîîrue athi na gîcuncî gîa îkûmi kîa ndebe ya mûtu wa sayiri, îndî atigaacuîkîre maguta kana eekîra macoco, n'ûntû i maruta ma irio ma muntû mûrûme ûra akwîbûûga mwekûrû wake na akwenda ûmma bwîbuumîria.
16 “Mûthînjîri wa Ngai akaareeta mûka ûyu mbere amûrûngamie mbere ya Mwathani. 17 Mûthînjîri ageekîra rûûyî rûûtheru mbakûriini ya yîûmba acooke aakûre mûthetu ûra ûrî nthî ndeeni ya Îrema rîa Kûrîîkanaga acuîkîre rûûyîîni rûru. 18 Nyuma ya mûthînjîri wa Ngai kûrûngamia mûka ûyu mbere ya Mwathani, akaatharûria ntundu cia mûka ûyu na aigîîre kîewa kîra kîa mûtu njaraani cia mûka ûyu. N'we mûthînjîri akaagwatîîra mbakûri îra îrî na rûûyî rûru rwa gana rûra rwarî na inya ya kûreeta kîrumi. 19 Rîru mûthînjîri akeera mûka ûyu athiîtie mûthiîtio ûra mûthînjîri akaamwîra, ‘Wegua gûtirî muntû mûrûme aamaama naawe, na wegua ûtaathûkîra ûthi mantûûni marî mûgiro ûrî wathooni bwa mûkûrû waku, menya ûthûûkua i kîrumi kîa rûûyî rûrû rwa gana. 20 Îndî wegua nwathûkîrîîte, wana ûrî wathooni bwa mûkûrû waku, na wegua nwîbîkîrîîte mûgiro na muntû mûrûme ûngî tatiga mûkûrû waku n'amaamîîte naawe. 21 Wegua n'ûgu Mwathani arootuîkithia riîtwa rîaku ta kîrumi gatîgatî ga antû beenu. Arootûma waaga aana na nda yaku îkaimba. 22 Rûûyî rûrû rûreetaga kîrumi rûroothûûngîra nda yaku na gûtûma nda yaku iimba na kîero gîaku kîbooba.’
“Nwe mwekûrû ûyu ageetîgîîria auge, ‘Kûrookara woogu.’
23 “Rîru mûthînjîri wa Ngai akaandîka irumi bibu nkondeeni, rîru acooke athaambîrie maandîko mamu mbakûriini îra îrî na rûûyî rûrî na gana. 24 Mbere mûthînjîri wa Ngai anyuithia mûka ûyu rûûyî rûru rûrî na inya ya kûreeta ûrûrû bûûnene, 25 mûthînjîri akaathûkia kîewa kîa mûtu kîra kîrî njaraani cia mûka ûyu, akîgwatîîre agîkînenkanîra kîrî Mwathani, rîru akîrutîre agu kîthînjîrooni. 26 Akaarûma rwî rûmwe rwa mûtu ûyu ûrî gacuncî ga kûrûngamîîra kîgongwana na acubîîthîrie agu kîthînjîrooni. Mûthiani mûthînjîri akeera mûka ûyu anyue rûûyî rûru. 27 Wegua n'athûûngîîrîîte, rûûyî rûru rûgaatûma eegua ûrûrû bûûnene mûno, nda yake îkaimba na kîero gîake gîkaabooba. Riîtwa rîake rîgaatuîka kîrumi gatîgatî ga antû baao. 28 Îndî wegua atithûûngîîrîîte, gûtirî bu agaakara na akaûmba kûgea na twana.
29 “Bûbu i bu watho bwîgiî rûriitho rwa muntû mûrûme ruumanîîtie na kûthûûngîîra kwa mwekûrû wake, 30 kana rîra muntû atagwîtîgia mwekûrû wake. Mûka ta ûyu akaarûngamaga mbere ya Mwathani n'we mûthînjîri akaarûtha mantû mara mabatîîrue kûrûthwa monthe. 31 Mûrûme atiîgua arî na mabîtia, îndî mûka wegua abîtîîtie nwa mwanka akaagwata îkaanûkia rîa wîyia bwake.”