Ngûgî cia Akoathi ba mwîrîga wa Arawi
4
1 Mwathani aaria na Musa na Arûni abeera, 2 “Taraani Arawi ba mûciî wa Koathi kîîmariiko na kîîmîciî mwanya na Arawi bara bangî, 3 ba ûkûrû bwa gatîgatî ka mîanka mîrongo îthatû mwanka mîrongo îtaano, bara baûmba kûthûngîra kûruta ngûgî Îrema rîa Kûrîîkanaga. 4 Înu n'yo ngûgî ya mwîrîga wa Koathi Îremaani rîa kûrîîkanaga: kûmenyeera into bira bitheru mûno.5 “Kagiita ga gûkûûra nthaama gaakinya, Arûni na nthaka ciake bakaathûûngagîra îremaani rîa kûrîîkanaga, bagacuurûûkia gîtambaa kîra gîcuuragua mbere ya îthandûkû rîa maathana ma kîrîîkanîro bagakunîkîra îthandûkû rîru nakîo. 6 Bacooke barîkunîkîre na rûûo rwa nyamû ira nene cia îria, bacooke baare gîtambaa kîa mburuu îgûrû. Rîru bathûûngîrie itugî bira bitûmagîrwa gûkamata îthandûkû.
7 “Bakaara gîtambaa kîa mburuu îgûrû ya meetha ya mîgaate îra îrutagîrwa Mwathani, na bacooke batûûgîîrie îgûrû rîayo, thaani, mbakûri, na njaagi ya kûnyuîra ndibei. Na mûgaate ûbatîîrue wîgagua ûrî agu îgûrû rîa meetha rîonthe. 8 Bagaakunîkîra into bibu na gîtambaa gîîtuune, na îgûrû rîakîo bakunîkîre na rûûo rwa nyamû ira nene cia îria, rîru bathûûngîrie itugî bira bitûmagîrwa kûmîkamata.
9 “Bagaakunîkîra gîtugî gîa taa, taa cia kîo, into bia kûganaanîria ntaambi, itaararû na into bira biîkagîrwa maguta ma mîceituuni. 10 Bakoogania into bibu bionthe na rûûo rwa nyamû ira nene cia îria, bacooke babiaigîîre îgûrû rîa îtaratî rîra bikamatagwa narîo.”
11 “Rîru bacooke bakunîkîre kîthînjîro kîa thaabu gîa kûbîîthîria macoco na gîtambaa kîa mburuu. Îgûrû rîa gîtambaa gîku bakunîkîre na rûûo rwa nyamû ira nene cia îria, rîru bathûûngîrie itugî bira bitûmagîrwa gûgîkamata.
12 “Bakeethîrania into bionthe bira bitûmagîrwa bantû ara atheru babikunîkanie na gîtambaa kîa mburuu, bacooke babikunîkîre na rûûo rwa nyamû ira nene cia îria, rîru babiaigîîre îgûrû ria îtaratî rîra bikamatagwa narîo.”
13 Bakaaruta muu ûra ûrî kîthînjîrooni kîa igongwana, na bagîkunîkîre na gîtambaa kîa rangi ya ûkûyû. 14 Na baigîîre, îgûrû rîa kîthînjîro gîku, into bionthe bira bitûmagîrwa ngûgîîni cia kîo. Into bibu n'amwe na ngîo, ûma cia kûgwata nyama, iciko bira binene na mbakûri. Rîru bakunîkîre agu îgûrû na rûûo rwa nyamû ira nene cia îria, rîru bacooke bathûûngîrie itugî bira kîthînjîro gîakamatagwa nabio.
15 Kagiita ga gûkûûra nthaama gaakinya, antû ba mwîrîga wa Koathi bakaayaga gûkamata into bibu nyuma ya Arûni na nthaka ciake babikunîkîra. Antû babu ba mwîrîga wa Koathi batibatîîrue batonga into bibu bitheru. Babitonga i bagaakua. Ino i cio ngûgî ira mwîrîga wa Koathi ûkaarutaga rîra rîonthe Îrema rîa Kûrîîkanaga rîkaathaamagua.
16 “Eriasari nthaka ya Arûni n'we akaarûgamagîîra îrema rîonthe, na maguta ma gwîkîra taani, na macoco, na kîgongwana kîa irio, na maguta ma gwîtûûrîria antû, na gîntû kîngî kîonthe kîa îrema kîra kîneenkanîrîtwe kîrî Mwathani.”
17 Mwathani aaria na Musa na Arûni abeera, 18 “Bûtikaareke antû ba mwîrîga wa Koathi baaya kûthirua gatîgatî ka Arawi 19 na njîra ya kûthengeera into bira bitheru mûno. Bûbatîîrue bûbarûthîra ûûgû: Arûni na nthaka ciake babatîîrue bathi îremaani na booneeria woora muntû ngûgî yake na gîntû kîra agaakamataga. 20 Îndî muntû wa mwîrîga wa Koathi atibatîîrue aathûûngîra îremaani araitha into bira bitheru, wana kinya kere, aaya gûkua.”
Ngûgî cia mwîrîga wa Ngerisoni wa Arawi
21 Mwathani aaria na Musa amwîra 22 “Tara Arawi ba mwîrîga wa Ngerisoni, kîîmariiko na kîîmîciî. 23 Tara antû arûme bonthe ba kuuma ûkûrû bwa mîanka mîrongo îthatû mwanka mîanka mîrongo îtaano, bara baûmba kûruta ngûgî Îrema rîa Kûrîîkanaga. 24 Ngûgî yao îkeegua îrî ya gûkamata into bibi: 25 îrema, kîguo gîa gûkunîka ndeeni na ome, rûûo rwa nyamû îra nene ya îria rûra rwîgagua rwimbîîte îrema, gîtambaa kîra gîcuuragua mwîrîgaani wa îrema, 26 itambaa na mîkanda ya kîarago, itambaa bira bitûmagîrwa kwinga mîîrîga ya kîarago, na into bingî bira bitûmagîrwa amwe na bibu. I bo bakaarutaga ngûgî cionthe ciîgiî into bibu. 27 Musa na Arûni bagaatigaga boona antû ba mwîrîga wa Ngerisoni bakûruta ngûgî na baakamata into bira Arûni na nthaka ciake babeera bakamate. 28 Inu i cio ngûgî cia mwîrîga wa Ngerisoni Îremaani rîa Kûrîîkanaga. Bakairutaga barûgamîîrîtwe n'Ithamarû nthaka ya mûthînjîri Ngai Arûni.”
Ngûgî cia mwîrîga wa Merari
29 Mwathani aaria na Musa amwîra, “Tara Arawi ba mwîrîga wa Merari, kîîmariiko na kîîmîciî. 30 Tara antû arûme bonthe kuuma ûkûrû bwa mîanka mîrongo îthatû mwanka mîanka mîrongo îtaano, bara baûmba kûruta ngûgî Îrema rîa Kûrîîkanaga 31 Ngûgî yao îîgiî îrema rîru yarî kûmenyeera itugî bira biagwete îrema, mata maayo, ikona bia gûtiira itugî, ûrîrî bwa ruungu, na twinto tûngî tûra tûthiiyanagia na into bibu, 32 na itugî na ûrîrî bwa ruungu, na tûtugî na mîkanda ya kîarago na twinto tûngî tûra tûtûmagîrwa ngûgîîni înu. Woora muntû akeegagua akîmenyeera gîntû kîna. 33 Inu i cio ngûgî cia antû ba mwîrîga wa Merari Îremaani rîa Kûrîîkanaga. Bakaarutaga ngûgî inu barûgamîîrîîtwe n'Ithamarû mwana wa Arûni mûthînjîri wa Ngai.”
Gûtarwa gwa antû ba mwîrîga wa Arawi
34 Kwoogu Musa, Arûni na atongoria ba antû ba Isiraeri i baatarire antû ba mwîrîga wa Koathi kîîmîîrîga na kîîmîciî. 35 Antû arûme bonthe kuuma ûkûrû bwa mîanka mîrongo îthatû mwanka mîanka mîrongo îtaano, bara baûmba kûruta ngûgî îremaani rîa kûrîîkanaga, 36 batarîîtwe kîîmîciî baarî antû ngiri ciîrî cia magana mûgwanja ma mîrongo îtaano. 37 Ûgu i bu antû ba mwîrîga wa Koathi baagana bara baarutaga ngûgî Îremaani rîa Kûrîîkanaga. Musa na Arûni baabatarire kûringana na bûra Mwathani aathîîte Musa.
38 Antû ba mwîrîga wa Ngerisoni baatarirwe kîîmariiko na kîîmîciî. 39 Antû arûme bonthe ba kuuma ûkûrû bwa mîanka mîrongo îthatû mwanka mîanka mîrongo îtaano, bara baathiiyaga kûruta ngûgî Îremaani rîa Kûrîîkanaga 40 Baatarirwe kîîmîîrîga na kîîmîciî na baarî antû ngiri ciîrî cia magana mathanthatû ma mîrongo îthatû. 41 Ûgu i bu antû ba mîîrîga ya Ngerisoni baagana bara baathiiyaga kûruta ngûgî Îremaani rîa Kûrîîkanaga. Musa na Arûni baabatarire kûringana na bûra Mwathani aabaathîîte.
42 Antû ba mwîrîga wa Merari nabo baatarirwe kîîmariiko na kîîmîciî 43 Antû arûme bonthe kuuma ûkûrû bwa mîanka mîrongo îthatû mwanka mîanka mîrongo îtaano, bara baûmba kûruta ngûgî îremaani rîa kûrîîkanaga, 44 baatarîîtwe kîîmîîrîga na baarî antû ngiri ithatû cia magana maîrî. 45 Ûgu i bu antû ba mîîrîga ya Merari baagana. Musa na Arûni baabatarire kûringana na bûra Mwathani aathîîte Musa.
46 Kwoogu Musa, Arûni na atongoria ba Isiraeri baatara Arawi bonthe kîîmîîrîga na kîîmîciî. 47 Antû arûme bonthe ba kuuma ûkûrû bwa mîanka mîrongo îthatû mwanka mîanka mîrongo îtaano, bara baûmba kûruta ngûgî Îremaani rîa Kûrîîkanaga na bakarîkamata, 48 baarî antû ngiri inyanya cia magana mataano ma mîrongo înaana. 49 Na kûringana na bûra Mwathani augîîte gûkûrûkîîra Musa, woora muntû n'agaîrîîrwe ngûgî îra akaarutaga na gîntû kîra agaakamataga. Kwoogu bonthe i baatarirwe kûringana na bûra Mwathani aathîîte Musa.