Arawi
3
1 Ino i cio nciarwa cia Arûni na Musa, kagiitaani kara Mwathani aariirie na Musa kîrîmaani gîa Sinai, 2 Arûni n'aarî na nthaka ino inya: Nandabu, arî gîtûra îria, Abiu, Eriasari na Ithamarû. 3 Mamu i mo mariîtwa ma nthaka cia Arûni bara baatûûrîîrue maguta na baathûrwa batuîka athînjîri. 4 Îndî Mwathani aûragîra Nandabu na Abiu rwanda rwa Sinai rîra baarutîîre Mwathani kîgongwana na njîra îtaagîrîîte. Na n'ûntû Nandabu ataarî na nthaka, n'Eriasari wenka na Ithamarû baarutaga ngûgî ya athînjîri barî na îthe Arûni.5 Mwathani aaria na Musa amwîra, 6 “Ûreetere Arûni mwîrîga wa Arawi bamûteethagîîrie. 7 Bakaarutaga ngûgî ciake na cia antû bonthe Îremaani rîa Kûrîîkanaga 8 Bakaamenyagîîra into bionthe bira birî ndeeni ya Îrema rîa Kûrîîkanaga na barute ngûgî n'ûntû bwa antû ba Isiraeri. 9 Naawe ûkaanenkera Arûni na nthaka ciake Arawi batuîke i bo bakaabateethagîîria kuuma kîrî antû ba Isiraeri bonthe. 10 Îthuura Arûni na nthaka ciake barutage ngûgî cia ûthînjîri; muntû ûngî ûra akaathi akubî na kîthînjîro i ka akaûragwa.”
11 Mwathani aacooka eera Musa ata rî, 12 “I nthûkîîtie Arawi bonthe baatuîka baakwa bantûûni a itûra îria bionthe bia antû arûme ba Isiraeri. Arawi i baakwa, 13 n'ûntû itûra îria bionthe i biakwa. Rîra ndaûragire itûra îria bionthe bia Miisiri, indeebathûrîîre itûra îria bionthe bia Isiraeri biatuîka biakwa, biîgue birî bia antû kana bia nyamû. Bigaatuîka biakwa. I niû Mwathani.”
Gûtarwa kwa Arawi
14 Mwathani aaria na Musa barî rwanda rwa Sinai amwîra, 15 “Îîndî tara Arawi kûringana na mîciî na mîîrîga. Ûtare kîra muntû mûrûme wa ûkûrû bwa kuuma mweri ûmwe na kûthi mbere.” 16 Kwoogu Musa abatara wa ta bûra aathîîtwe i kiugo kîa Mwathani.
17 Rawi aarî na nthaka ithatû na mariîtwa maao i:
Ngerisoni, Koathi na Merari.
18 Mama i mo mariîtwa ma mîîrîga ya Ngerisoni:
Ribuni na Simei.
19 Mîîrîga ya Koathi n'yo ni:
Amuramu, Isaarî, Eburoni na Usieri.
20 Mîîrîga ya Merari n'yo i:
Maari na Musi. Îno n'yo mîîrîga ya Arawi kûringana na mîciî yao.
21 Mwîrîga wa Ngerisoni warî na mîciî ya Ribuni na Simei. 22 Antû bonthe ba ûkûrû bwa mweri ûmwe na kûthi mbere bara baatarirwe baarî ngiri mûgwanja cia magana mataano. 23 Mwîrîga wa Ngerisoni wabatîîrue ûtûûrîîra mbarî ya ûthwîro bwa riûa, nthioro ya îrema. 24 Mûtongoria wa mîciî ya Ngerisoni aarî Eriasabu mwana wa Raeri. 25 Ngûgî ya mwîrîga wa Ngerisoni yarî ya kûmenyeera gîntû kîra gîakunîkagîra îrema naara ndeeni na ome, gîtambaa kîra gîacuuragua mwîrîgaani wa îrema, 26 itambaa bira biairigîrîîte kîarago, gîtambaa kîra gîcuuragua mwîrîgaani wa kîarago, na into bionthe biîgiî gûtûmîrwa gwa into bibu.
27 Mwîrîga wa Koathi warî na mîciî ya Amuramu, Aisaarî, Aeburoni na Ausieri. 28 Antû bonthe ba ûkûrû bwa mweri ûmwe na kûthi mbere bara baatarirwe baarî ngiri inyanya cia magana mathanthatû. 29 Mwîrîga ûyû wa Koathi wabatîîrue ûtûûrîîra mbarî ya naiti ya îrema. 30 Mûtongoria wa mîciî ya Koathi aarî Erisafani mwana wa Usieri. 31 Ngûgî ya mwîrîga ûyu yarî ya kûmenyeera îthandûkû rîa maathana ma kîrîîkanîro, meetha, gîtugî gîa taa, ithînjîro, into bira athînjîri batûmagîra, gîtambaa kîra gîcuuragua Bantû ara Atheru Mûno, na mantû monthe meegiî gûtûmîrwa gwa into bibu. 32 Mûtongoria ûra mûnene wa Arawi aarî Eriasari mwana wa Arûni ûra mûthînjîri wa Ngai.
33 Mwîrîga wa Merari warî na mîciî ya Maari na Musi: înu n'yo mîîrîga ya Merari. 34 Antû bonthe ba ûkûrû bwa mweri ûmwe na kûthi mbere bara baatarirwe baarî ngiri ithanthatû cia magana maîrî. 35 Mwîrîga ûyu waabatîîrue ûtûûra mbarî ya neegûrû ya Îrema rîa Kûrîîkanaga Mûtongoria wa mwîrîga wa Merari aarî Surieri mwana wa Abiairi. 36 Ngûgî ya mwîrîga ûyu wa Merari yarî kûmenyeera itugî bira biagwete îrema, mata maarîo, ikona bia gûtiira itugî, ûrîrî bwa ruungu, na twinto tûngî tûra tûthiiyanagia na into bibu, 37 amwe na itugî bia kîarago amwe na ûrîrî bwa bio, tûtugî na mîkanda.
38 Musa na Arûni na nthaka ciake babatîîrue batûûra mbarî ya uumîîro bwa riûa bwa îrema ria kûrîîkanaga, na n'yo ngarûko ya mbere ya Îrema rîa Kûrîîkanaga i bo babatîîrue kûmenyeera Îrema rîa Kûrîîkanaga bantûûni a antû ba Isiraeri. Muntû ûngî ûra akaathi akubî na Îrema abatîîrue aûragwa. 39 Arawi bara baatarirwe wa ta bûra Mwathani eerire Musa na Arûni, kûringana na mîîrîga yao, ba kuuma ûkûrû bwa mweri ûmwe na kûthi na mbere baarî antû ngiri mîrongo îîrî na ciîrî.
40 Mwathani aaria na Musa amwîra, “Tara itûra îria bia antû arûme bionthe bia Isiraeri bia kuuma ûkûrû bwa mweri ûmwe na kûthi mbere na wandîke mariîtwa maao. 41 Nthûkîria Arawi bantû a itûra îria bia antû ba Isiraeri na ûûnthûkîrie nyamû cia ndîîthia cia Arawi bantû a itûra îria bia nyamû cia ndîîthia cia Aisiraeri. I niû Mwathani.” 42 Kwoogu Musa aatara itûra îria bia antû arûme bonthe ba Isiraeri wa ta bûra Mwathani aamwîrîîte. 43 Itûra îria bionthe bia arûme bia Isiraeri bia ûkûrû bwa mweri ûmwe na kûthi mbere i biatarirwe na mariîtwa maao maandîkwa. Bo bonthe baarî antû ngiri mîrongo îîrî na ciîrî cia magana mûgwanja ma mîrongo îthatû na bathatû.
44 Mwathani aaria na Musa amwîra, 45 “Thûkia Arawi bantû a itûra îria bia Isiraeri, na nyamû cia ndîîthia cia Arawi bantû a nyamû cia ndîîthia cia Aisiraeri. Arawi bakeegua barî baakwa. I niû Mwathani. 46 N'ûntû itûra îria bia Isiraeri i bikwingîîra Arawi na antû magana maîrî ma mîrongo mûgwanja na bathatû nwa mwanka bûgaakûûra antû babu bagûkûrûkîîria. 47 Woora muntû akaareagîrwa sekeri itaano kûringana na kîthimi kîa Nyomba ya Ngai, n'ûntû bwa kûmûkûûra. 48 Ûneenkere Arûni na nthaka ciake mbia inu cia gûkûûra antû bara bakûrûkîîrîîtie.”
49 Kwoogu Musa eethîrania mbia inu cia gûkûûra antû babu kuuma kîrî antû bara baakûrûkîîrîîtie mûtari wa Arawi. 50 Kuuma kîrî itûra îria bia Isiraeri eethîranirie sekeri ngiri îmwe ya magana mathatû ma mîrongo îthanthatû na itaano kûringana na kîthimi kîra gîîtîgîîrîîtue gîa sekeri ya Nyomba ya Ngai. 51 Na Musa aaneenkera Arûni na nthaka ciake mbia inu cia gûkûûra antû, wa ta bûra Mwathani aathîîte Musa.