Bûra antû beebangîîte kîîmîîrîga
2
1 Mwathani aarîria Musa na Arûni abeera, 2 “Antû ba Isiraeri baabatîîrue kwamba marema maao wa muntû gîkuundiini gîake ruungu rwa kîbeendeera gîake na rwano rwa mwîrîga wao. Bagaatûûraga bathiûrûkîîrîîte Îrema rîa Kûrîîkanaga.3 “Mbarî ya umîîro bwa riûa, inoogo gîkundi kîa mwîrîga wa Njunda gîgaatûûra ruungu rwa kîbeendeera kîao. Mûtongoria wa antû ba Njunda i Naasoni mwana wa Aminandabu. 4 Gîkundi gîake i gîa antû ngiri mîrongo mûgwanja na inya cia magana mathanthatû. 5 Mwîrîga wa Isakaari nau ûgaatûûra ûthingatîîrîîte na mwîrîga wa Njunda. Mûtongoria wa antû ba Isakaari i Nethaneri mwana wa Suari. 6 Gîkundi gîake i gîa antû ngiri mîrongo îtaano na inya na magana mana. 7 Mwîrîga wa Saburoni nau nuu ûkaathingatîîra. Mûtongoria wa antû ba Seburuni ni Eriabu mwana wa Eroni. 8 Gîkundi gîake i gîa antû ngiri mîrongo îtaano na mûgwanja cia magana mana. 9 Antû bonthe bara baaneenkeerwe ûtûûro kambîîni ya Njunda kûringana na ikundi biao n'antû ngiri îgana rîa mîrongo înaana na ithanthatû na magana mana, na i bo bakaumagarûka barî gîkundi kîa mbere.
10 “Mbarî ya naiti i noogo gîkuundi kîa Rubeni gîgaatûûrîîra, ruungu rwa kîbeendeera kîao. Mûtongoria wa Rubeni ni Erisuri mwana wa Sendeuri. 11 Gîkundi gîake i gîa antû ngiri mîrongo îna na ithanthatû cia magana mataano. 12 Mwîrîga wa Simioni nau ûgaatûûra ûkaranîîrîîte na mwîrîga wa Rubeni. Mûtongoria wau i Serumieri mwana wa Surisandai. 13 Gîkundi gîake i gîa antû ngiri mîrongo îtaano na kenda cia magana mathatû. 14 Mwîrîga wa Ngandi n'uu ûkaathiingatîîra. Mûtongoria wau n'Eriasabu mwana wa Reueri. 15 Gîkundi gîake i gîa antû ngiri mîrongo îna na itaano cia magana mathanthatû ma mîrongo îtaano. 16 Antû bonthe bara baaneenkeerwe ûtûûro rûteere rwa kambî ya Rubeni kûringana na ikundi biao n'antû ngiri îgana rîa mîrongo îtaano na îmwe cia magana mana ma mîrongo îtaano na i bo bakaumagarûka barî gîkundi kîa biîrî.
17 “Rîru Îrema rîa Kûrîîkanaga rîkaumagarûkaga rîrî gatîgatî ga ikundi bia mbere biîrî na biîrî bia mûthia amwe na kambî ya Arawi barî gatîgatî ga antû babu bangî. Bakaathiiyaga beebaangîîte wa ta bûra beebaangîîte kambîîni, woora muntû ruungu rwa kîbeendeera gîake.
18 “Gîkundi gîa kambî ya Eburaimu gîkeegua kîrî rûteere rwa ûthwîro bwa riûa ruungu rwa kîbeendeera kîao. Mûtongoria wa antû babu n'Erisama mwana wa Amiundi. 19 Gîkundi gîake gîkeegua kîrî na antû ngiri mîrongo îna na magana mataano. 20 Mwîrîga wa Manase nuu ûkaathingatîîra. Mûtongoria wa antû ba Manase i Ngamarieri mwana wa Pendasuri. 21 Gîkundi gîake i gîa antû ngiri mîrongo îthatû na ciîrî na magana maîrî. 22 Mwîrîga wa Benjameni nuu ûkaathiingatîîra agu angî. Mûtongoria wa antû ba Benjameni i Abindani mwana wa Ngindioni. 23 Gîkundi gîake i gîa antû ngiri mîrongo îthatû na itaano na magana mana. 24 Antû bonthe bara baaneenkeerwe ûtûûro kambîîni ya Eburaimu kûringana na ikundi biao n'antû ngiri îgana rîmwe rîa inyanya cia îgana rîmwe. Na i bo bakaumagarûka barî ba gîkundi kîa bithatû.
25 “Gîkundi gîa kambî ya Ndani gîkeegua kîrî mbarî ya n'egûrû, ruungu rwa kîbeendeera kîao. Mûtongoria wa antû ba Ndani i Ayeseri mwana wa Amisandaî. 26 Gîkundi gîake i gîa antû ngiri mîrongo îthanthatû na ciîrî na magana mûgwanja. 27 Mwîrîga wa Aseri nau nuu ûkaathingata mwîrîga wa Ndani. Mûtongoria wa antû ba Aseri i Pagieri mwana wa Okirani. 28 Gîkundi gîake i gîa antû ngiri mîrongo îna na îmwe na magana mataano. 29 Mwîrîga wa Nabutarî nuu ûkaathiingatîîra agu angî. Mûtongoria wa antû ba Nabutarî n'Aira mwana wa Enani. 30 Gîkuundi gîake i gîa antû ngiri mîrongo îtaano na ithatû na magana mana. 31 Antû bonthe bara baaneenkeerwe ûtûûro kambîîni ya Ndani kûringana na ikundi biao n'antû ngiri îgana rîmwe rîa mîrongo îtaano na mûgwanja cia magana mathanthatû, na i bo bakaumagarûka barî ba mûthia ruungu rwa ibendeera biao.”
32 Antû bonthe ba Isiraeri bagûtarwa kûringana na kîîmîciî na gî ikundi baarî antû ngiri magana mathanthatû ma ithatû cia magana mataano ma mîrongo îtaano. 33 Îndî Arawi, wa ta bûra Mwathani eerîîte Musa, bataataranîrua na Aisiraeri bara bangî. 34 Kwoogu antû ba Isiraeri i baarûthire mantû monthe mara Mwathani eerîîte Musa. Rîra baamba marema maao kana rîra bathiîte woora muntû eegagua arî ruungu rwa kîbeendeera gîake kûringana na mwîrîga na mûciî wake.