13
Utuny Ye̱su̱ zo̱o̱ cik nuyak waginnek
1 Ma baling ize ojon i̱i̱te̱ni̱ wa Kwo̱o̱r wa Va̱rda̱ngi̱nto̱, a̱gga̱ Ye̱su̱ niko ming i̱ki̱ya̱ i̱i̱ ci okko enne okko ta̱mu̱-kenga ngati Batinne. Irez enne odohize ol waginnek lo̱o̱ta̱ ko̱, i̱ye̱le̱k zin enne nogo rezinet cinne nogo oroot.
2 Baling anyaktta ol á̱há̱t ci ja̱ti̱nu̱, i̱tto̱ da̱ lo̱rye̱nti̱ zinin ci Judas Iskariyot wa een ngerrti Si̱mo̱ne̱ ci atin okko adawa Ye̱su̱. 3 A̱gga̱ Ye̱su̱ niko ming aarik Batinne kaal do̱o̱k azzin ciginnek, a̱gga̱ bo̱do̱k a̱kku̱ enne ba̱li̱ye̱ ngati Ta̱mu̱ta̱dde̱no̱, kar bo̱do̱k ki̱mi̱re̱ kuk ngati Ta̱mu̱ta̱dde̱no̱. 4 Itinga zin enne je̱e̱na̱ ngati adaine, kar zin kaara ru̱u̱m wa atadizek gooni eliye cinne ko̱, kar zin ku̱lu̱ce̱k ru̱u̱m wa ka̱vu̱cvu̱ca̱ne̱ maam eliya ko̱ arut. 5 Bali vu̱rrta̱, u̱du̱te̱k zin enne maam u̱gge̱ illac kar zin kutuny nuyak waginnek zo̱o̱, kar zin ku̱vu̱vu̱ca̱n maam zoone cigge̱k kodoit ru̱u̱me̱ wanai a̱lu̱ce̱k enne barak ke̱.
6 Uk zin ngati Si̱mo̱ne̱ Peturu, i̱jji̱n zin nonno, a̱nne̱k ne, “Manyi, okko i̱nna̱ u̱u̱nyi̱ zo̱o̱ cigannik bu̱k?”
7 O̱bo̱de̱k zin Ye̱su̱ nonno, izek ne, “Iróng zoz necu i̱zzo̱ oo cunne, okko atin i̱nna̱ a̱gga̱ vu̱rrta̱.”
8 O̱bo̱de̱k bo̱do̱k Peturu nonno, a̱nne̱k ne, “A̱zze̱ to, iróng i̱nna̱ u̱u̱nyi̱ zo̱o̱ cigannik udut.”
O̱bo̱de̱k zin Ye̱su̱ nonno izek ne, “Ming iróng anna ku̱u̱nyi̱ zo̱o̱ cugunnek, iróng i̱nna̱ e̱e̱ni̱ demezeyait cinanni.”
9 Abariz zin bo̱do̱k Si̱mo̱ne̱ Peturu, ize ne, “Manyi, ma zin u̱u̱nyi̱ zo̱o̱ cigannik do̱, tuny oo ki azzin bu̱k.”
10 Izek zin Ye̱su̱ nonno ne, “Ming arane e̱e̱ti̱ ubunna nonno ele, orong kutunyce zoona do̱. A̱zi̱ze̱ ele cinne do̱o̱k, a̱zi̱ze̱ e̱le̱tti̱ cuggo̱k, anyak orgene cunno̱ng e̱e̱t ci iróng ele cinne a̱zi̱ze̱.” 11 A̱du̱wa̱ Ye̱su̱ zoz necu niko ko̱ ma̱rri̱t enne a̱gga̱ e̱e̱t ci okko atin adawa nonno ku̱ru̱we̱ ka̱da̱k.
12 Baling edeca enne tunyenet nogo zo̱o̱, i̱ti̱i̱me̱k ru̱u̱m kar zin ki̱mi̱re̱ kuk ka̱vvu̱ ngin wanai ninne ke̱. I̱jji̱n zin nogo, izek ne “A̱gga̱yyu̱ ungec ci gi̱i̱ ci kogonikkung ko̱?” 13 Kar zin bo̱do̱k kize ne, “Awuyyang a̱nne̱kka̱ng ne ‘De̱me̱zo̱i̱t’ ki ‘Manyi,’ ilemnyyu ming awuyyang niko ko̱. 14 Icinnet, ke̱e̱ni̱ De̱me̱zo̱i̱t ki Manyi cunno̱ng kutunya zo̱o̱ cuggo̱k, abunna ming u̱u̱nyyu̱ zo̱o̱ cik gonogginnu ki bali anna ke̱. 15 Ki̱ye̱le̱u̱ng zin anna i̱ge̱t gool ci ogonnu kaal, abunna ming ogonnu ki bali anna ke̱. 16 Ka̱du̱wa̱kku̱ng zoz wa een de̱de̱, i̱llo̱i̱ du̱ca̱i̱t ci a̱ddi̱ki̱re̱ ngati e̱e̱t wa a̱li̱ngli̱ngo̱ni̱k enne, iróng bo̱do̱k e̱e̱ti̱ wa een to̱ni̱a̱t ommog e̱e̱t wa i̱tto̱n nonno. 17 I̱yo̱ko̱ a̱gga̱yyu̱ zoz necu ko̱, atalninnu atin niga oroot, a̱ma̱yu̱kku̱ng atin Ta̱mu̱ta̱dde̱n ming u̱tu̱gu̱zzu̱ zoz necu.”
U̱du̱wa̱ Ye̱su̱ e̱e̱t ci atin okko adawa nonno
18 Izek zin Ye̱su̱ nogo ne, “Iróng zoz necu akati i̱ge̱t do̱o̱k, ka̱gga̱ ol balik katahala ke̱. Ogone zin zoz necu kar zoz bali e̱he̱rye̱ warage ci Ta̱mu̱ta̱dde̱no̱ ke̱ kakat mo̱o̱le̱t, azi ne, ‘Adawanna e̱e̱ti̱ ci kozola á̱há̱t bu̱k.’
19 “Ka̱du̱wa̱kku̱ng zoz necu i̱yo̱ko̱ ming ngen ki̱tta̱; ming okko i̱nna̱ abunna ming kelemnana annit de̱de̱ icu. 20 Ka̱du̱wa̱kku̱ng zoz ci een de̱de̱, ming elem e̱e̱ti̱ e̱e̱t ci ki̱tto̱nna̱ anna, elemnya annita, ming elemnya e̱e̱ti̱ imma annita, elemi enne bu̱k e̱e̱t bali i̱tto̱na̱na̱ annita bu̱k.”
A̱du̱wa̱ Ye̱su̱ zoz ci okko akati nonno
(Ma̱te̱yo̱ 21:1-11; Marko 11:1-11; Lu̱ka̱ 19:28-40)
21 Baling u̱du̱wa̱ Ye̱su̱ zoz necu, icirit nonno zinin oroot kar zin kiborak nogo zoz neci, izek ne, “Ka̱du̱wa̱kku̱ng zoz wa een de̱de̱, okko atidic e̱e̱ti̱ imma ngatinno̱ng adawanna annita.”
22 Egelemit zin nuyaha ciginnek e̱le̱tti̱, iróng a̱gga̱ ngene ucca ngatinne̱ng ci arruk enne ko̱. 23 I̱ti̱re̱ da̱ nuyaiti co̱de̱ wagon irez Ye̱su̱ oroot ko̱ ojonun ki nonno. 24 Uuv Si̱mo̱ne̱ Peturu nuyait neci i̱ti̱re̱ ngati okko ki Ye̱su̱ ke̱, kar zin kizek ne, “Ji̱n da̱ Ye̱su̱ arruk enne ngene?”
25 Utuhuwe zin demezyaiti neci kar ki̱jji̱n Ye̱su̱, a̱nne̱k ne, “Manyi, ngene ci atin okko adawannin?”
26 O̱bo̱de̱k zin Ye̱su̱ nogo, izek ne, “Een e̱e̱ti̱ neci e̱e̱t ci okko atidic anna kanyike á̱há̱t ci ku̱du̱ta̱ne̱ya̱ balang.” Baling u̱du̱ta̱ne̱k enne á̱há̱t neci, kar zin kanyik Judas Iskariyot wa een ngerrti Si̱mo̱ne̱. 27 Baling a̱gga̱ma̱ Judasi á̱há̱t ngati Ye̱su̱, i̱tto̱ zin Sitania nonno. Izek zin Ye̱su̱ nonno ne, “Tu̱gu̱ zoz ci okko i̱nna̱ ogoni ko̱ ataman.” 28 I̱llo̱i̱ e̱e̱t imma olle ne̱k adakce ki Ye̱su̱ ci a̱gga̱ nya ming a̱du̱wa̱k enne Judas zoz necu ko̱. 29 I̱no̱n uggak ngatinne̱ng eci Judasi a̱gga̱m o̱bo̱n ci o̱ro̱bi̱ya̱u̱, a̱nne̱k i̱yo̱ko̱ Ye̱su̱ nonno ne, “Tuwa da̱i̱ne̱t cik kwo̱o̱ra̱k,” icima anyik kanyik o̱ro̱bi̱ya̱ u̱gge̱ ol cik amati. 30 Baling a̱gga̱ma̱ Judasi á̱há̱t ngati Ye̱su̱, uk zin reena, imma da̱ looci ize ba̱a̱li̱n.
U̱du̱wa̱ Ye̱su̱ zoz ci okko atin Peturu amikzene nonno
31 Baling uk Judasi reena, ize zin Ye̱su̱ ne, “U̱bu̱lte̱ zara cik Ngerrti E̱e̱to̱, kar zin bo̱do̱k di̱ngdi̱ngo̱ni̱ ci Ta̱mu̱ta̱dde̱no̱ ki̱ye̱la̱i̱ ngatinne. 32 Ming i̱ye̱la̱i̱ di̱ngdi̱ngo̱ni̱ ci Ta̱mu̱ta̱dde̱no̱ ngatinani, okko atin Ta̱mu̱ta̱dde̱n i̱ye̱la̱ di̱ngdi̱ngo̱n ci Ngerinne eliye cinne e̱co̱de̱ niko.”
33 Emena Ye̱su̱ zoza de kar kizek nogo ne, “Dooli, kaavtte arrak ki i̱ge̱t do̱yo̱i̱t. Orongnyang atin, ki bali ming ka̱du̱wa̱k olli Yo̱u̱do̱ ke̱, ka̱du̱wa̱kku̱ng i̱ge̱t bu̱k: ‘Iróng niga azucannu nginti kokkoye anna.’”
34 Kar bo̱do̱k Ye̱su̱ kize ne, “Ka̱a̱nyyu̱ng i̱yo̱ko̱ ti̱lo̱wi̱ne̱t ci een jor ci azi ne, irezto e̱le̱tti̱ niga do̱o̱k, ki baling kirezzung anna i̱ge̱t ke̱. 35 Ming irezonnu niga do̱o̱k e̱le̱tti̱, ovvo atin ol a̱gga̱ ming e̱e̱ggi̱nnu̱ niga nuyak cigannik.”
U̱du̱wa̱ Peturu zoz cinne
(Ma̱te̱yo̱ 26:31-35; Marko 14:27-31; Lu̱ka̱ 22:31-34)
36 I̱jji̱n zin Si̱mo̱ne̱ Peturu nonno, izek ne, “Manyi, okko dim i̱nna̱ nga?”
O̱bo̱de̱k zin Ye̱su̱ nonno, izek ne, “Iróng atin i̱nna̱ anuwanna annit rok nginti kokkoye ko̱ i̱yo̱ko̱ niko, okko atin i̱nna̱ a̱kku̱nni̱ vu̱rrta̱.”
37 I̱jji̱n zin bo̱do̱k Peturu Ye̱su̱ de, “Manyi, nya ming iróng kanuyi i̱yo̱ko̱ niko? Ka̱da̱i̱ atin zo̱ze̱ cunne.”
38 O̱bo̱de̱k zin Ye̱su̱ nonno, “A̱da̱i̱ wo̱ye̱ atin i̱nna̱ de̱de̱ zo̱ze̱ cinanni? Ka̱du̱wa̱ki̱ zoz ci een de̱de̱, ming a̱jji̱nni̱ atin ol i̱nne̱ta̱ zoz cinanni eteza atin i̱nna̱ lak i̱i̱yo̱ ming ngen tuulici korok!”