21
I̱ye̱le̱k Ye̱su̱ demezeyyak waginnek een turgerem ele
1 Bali vu̱rrta̱, i̱ye̱le̱k Ye̱su̱ ele bo̱do̱k nuyak waginnek liile ci een Tiberias. Ogon zin da̱ bali zoz neci ke̱te̱: 2 Aavtte ol ciko to Si̱mo̱ne̱ wa een Peturu, Tomas wa een cuudenit, Nataniyal wa a̱kku̱ o̱rge̱ ci een Kena, Ga̱li̱li̱ya̱, ki logoz wak Zebedi, ki nuyak u̱gge̱ rama, arume nege do̱o̱k nga̱to̱de̱. 3 Izek zin Si̱mo̱ne̱ wa een Peturu nogo ne, “Kokko anna gga̱mi̱ne̱t u̱lu̱g.”
O̱bo̱dde̱k zin nege nonno, a̱nne̱k ne, “Korkor bu̱k ki i̱nne̱ta̱.” Oot zin reena kar zin ko̱tto̱di̱t i̱bo̱, imma ba̱a̱li̱n neci ngen ka̱gga̱mi̱t u̱lu̱g u̱gge̱.
4 Imma nge̱rre̱t ri̱ri̱wo̱na̱, ibil Ye̱su̱ liil ti̱ti̱ma̱, abarik nuyaha iróng a̱gga̱ ming een Ye̱su̱ neci.
5 Utu zin Ye̱su̱ nogo, izek ne, “Gonogga, ngen a̱gga̱mi̱t u̱lu̱g u̱gge̱?”
O̱bo̱dde̱k nege Ye̱su̱, a̱nne̱k ne, “I̱i̱ny.”
6 Izek Ye̱su̱ nogo ne, “Okollttek imutuk o̱to̱n ci a̱zzo̱ amudannu atidic u̱lu̱g u̱gge̱.” Baling ujukttek imutuk neci, a̱gga̱mi̱t u̱lu̱g cik meelek giir, iróng nege ngen uule kar kodongtek i̱bo̱ eci anyak u̱lu̱g cik meelek giir.
7 Kar zin nuyaiti wa irez Ye̱su̱ izek Peturu ne, “Manyi nenen ci aanyyet ka̱gga̱mi̱t u̱lu̱g ne̱ko̱” Baling izik Si̱mo̱ne̱ wa een Peturu zoz ci azi ne, Manyi nenen ci aanyyet ka̱gga̱mi̱t u̱lu̱g ne̱ko̱ niko, uburucek ele ru̱u̱ma̱ni̱ balik aara enne ke̱ ngati a̱gga̱me̱ u̱lu̱g kar zin kulucai i̱bo̱wa̱ ki̱tto̱ maam a̱kku̱nna̱k Ye̱su̱. 8 Ize ojon i̱bo̱ ki liil ti̱ti̱m, ovvo nuyaha wak aavtte i̱bo̱wa̱ ko̱ a̱gu̱ru̱t imutuk anyak u̱lu̱g cik meelek giir.
9 Baling uluccak nege liil ti̱ti̱m, edenyca gwo̱o̱ ci alanyit zolomone anyak u̱lu̱gi̱t ci i̱va̱de̱ ki umunet.
10 Izek zin Ye̱su̱ nogo ne, “Anyaktta u̱lu̱g u̱gge̱ ne̱k a̱gga̱ma̱nnu̱ ko̱.”
11 Itinga Si̱mo̱ne̱ Peturu i̱ba̱ kar kunguwa imutuk liil ti̱ti̱m. Anyak u̱lu̱g cik meelek abize ne ṯoc. Abarik ngen u̱lu̱ga̱ cik meelek giir morototo, orong zin imutui ettede. 12 Izek zin Ye̱su̱ nogo ne, “I̱vi̱ta̱ kadakto.” A̱zze̱ zin nuyahe ne̱ko̱ imma ci a̱jji̱n nonno zoz ci azi ne, “I̱nne̱t ngene?” A̱gga̱ nege een enne Manyi.
13 I̱ki̱ya̱ Ye̱su̱ idima umune ki u̱lu̱gi̱t kar zin kanyik nogo kadait. 14 I̱ye̱le̱k Ye̱su̱ ele cinne nuyak waginnek lak i̱i̱yo̱, baling itinga enne daiza.
I̱lo̱ti̱k Ye̱su̱ Peturu li̱ngli̱ngo̱n
15 Baling udutet Ye̱su̱ ki nuyak ciginnek da̱i̱nte̱, izek enne Si̱mo̱ne̱ Peturu ne, “Si̱mo̱ne̱ ngerrti Joni, ireza i̱nna̱ annita oroot kommog ol ne̱k ireza annit ko̱?”
Azi zong Si̱mo̱ne̱ ne, “I̱i̱ny Manyi, a̱gga̱ i̱nna̱ ming kirezin.”
Izek zin Ye̱su̱ nonno ne, “Tam nyoo cigannik ko̱ ju̱rru̱m.”
16 I̱jji̱n zin Ye̱su̱ nonno lak ram, a̱nne̱k ne, “Si̱mo̱ne̱ ngerrti Joni, ireza i̱nna̱ annita?” O̱bo̱de̱k zin Si̱mo̱ne̱ Ye̱su̱, a̱nne̱k ne, “I̱i̱ny Manyi, a̱gga̱ i̱nna̱ ming kirezin.”
Izek zin Ye̱su̱ nonno ne, “Zuute zin ol cigannik ko̱ ju̱rru̱m.”
17 I̱jji̱n zin bo̱do̱k Ye̱su̱ Si̱mo̱ne̱ lak i̱i̱yo̱ de, izek ne, “Si̱mo̱ne̱ ngerrti Joni, ireza i̱ye̱ i̱nna̱ annita?”
Omoze Peturu oroot eci i̱jji̱n Ye̱su̱ nonno lak i̱i̱yo̱ ming irez enne nonno. Izek zin enne Ye̱su̱ ne, “Manyi, a̱gga̱ i̱nna̱ kaal do̱o̱k. A̱gga̱ i̱nna̱ ming kirezin.”
Izek zin Ye̱su̱ nonno ne, “Zuute zin ol cigannik ko̱. 18 Ka̱du̱wa̱ki̱ anna i̱nne̱t zoz ci een de̱de̱: Baling ngen e̱e̱ni̱ i̱nna̱ idica, aburcek i̱nna̱ ele ru̱u̱m kar bit ngati orongi i̱nna̱. Imma i̱yo̱ko̱ ming ize ma̱ti̱yo̱c, a̱gga̱mnyi̱ ol azzin. Aburceki e̱e̱ti̱ imma i̱nne̱t ru̱u̱ma̱ni̱, kar zin kuyi ngati iróng i̱nna̱ orongi bite.” 19 U̱du̱wa̱ Ye̱su̱ zoz necu abunna i̱ye̱la̱ daiz ci Peturu ming a̱di̱ngdi̱nga̱n Ta̱mu̱ta̱dde̱n. Kar zin kizek nonno ne, “Nuwan!”
20 Uukce Peturu ki vu̱rru̱t, edenya nuyait wa Ye̱su̱ zinino ming annu nogo. Een enne bali aavtte ki Ye̱su̱ ojonun da̱i̱nte̱, kar zin ki̱jji̱n Ye̱su̱, “Manyi, ngene ci okko utennin?” 21 Baling icin Peturu demezeyait neci, kar zin ki̱jji̱n Ye̱su̱, “Manyi, ma e̱e̱ti̱ ci anuyyet ko̱?”
22 O̱bo̱de̱k Ye̱su̱ Peturu, “Ming korongi nonno kurug zee koboda anna, nya ci a̱u̱ce̱ zinine cunne? Abunna ming anuyan.”
23 Uzuca zoz gotonogget wak a̱tu̱we̱ azi ne iróng nuyaiti wa irez Ye̱su̱ ko̱ a̱da̱i̱. Ma̱i̱je̱ Ye̱su̱ ngen kize ne iróng enne a̱da̱i̱; azi abarik ne, “Ming korongi anna nonno kurug kobodak anna lo̱o̱c, nya ci gerze ngatinno̱ng?”
24 Nuyait neci ele ci a̱du̱wa̱k gonoggi zoz neci. Eteherek enne kaal ne̱ke̱ do̱o̱k lo̱o̱c. Ka̱gga̱ naga een zoz cinne de̱de̱.
25 U̱tu̱gu̱ Ye̱su̱ kaal cik meelek giir, weda keteherit kaal ne̱k u̱du̱wa̱ enne ke̱ do̱o̱k lo̱o̱c, i̱llo̱i̱ weda nginti eleno ki bu̱wa̱nni̱.