20
I̱zzi̱ Ye̱su̱ iloma to
(Ma̱te̱yo̱ 28:1-10; Marko 16:1-8; Lu̱ka̱ 24:1-12)
1 Ma̱i̱je̱ nge̱rre̱t ri̱ri̱wo̱na̱ i̱i̱te̱ne̱ wa een oo biranoca, uk da̱ Ma̱ri̱ya̱ Magadalina ngi̱lo̱me̱ ci Ye̱su̱, kar zin kuk kumuda bee bali tatuge ci ngi̱lo̱ma̱ ke̱ i̱zzi̱ to. 2 I̱vi̱r zin enne uk ngato Si̱mo̱ne̱ Peturu ki nuyait wa irez Ye̱su̱ oroot kar zin kizek ne, “O̱o̱tte̱ ol uggak ele ci Manyi ngi̱lo̱ma̱ ngamani, iróng zin bu̱k ka̱gga̱yya̱ arike ucca nonno i̱ni̱n!”
3 I̱yi̱he̱t Peturu ki nuyait imma oot ki ngi̱lo̱m. 4 A̱vi̱r nege do̱o̱k, imma nuyaiti imma ijaar ciko Peturu kar kuzuca ngi̱lo̱m oowa. 5 Ibil zin enne kar ki̱vo̱n ngi̱lo̱m ci Ye̱su̱, edenya abarik ru̱u̱m bali a̱lu̱ce̱k ol Ye̱su̱ ke̱ do̱ ming a̱tta̱dde̱ nginati, ngen zin enne kuk ecito. 6 Imma vu̱rrte̱ cinne, uzuca Si̱mo̱ne̱ Peturu bali ijaar enne ke̱, i̱tto̱ uk ngi̱lo̱ma̱ ecito. Icin ru̱u̱ma̱ni̱ balik a̱lu̱ce̱k ol nonno ke̱ ming aavtte ngi̱lo̱ma̱, 7 ki ru̱u̱m bali a̱lu̱ce̱k ol oo ci Ye̱su̱ ke̱, ming aave nginati. A̱lu̱ce̱ ru̱u̱m neci do̱, engero ki ru̱u̱m co̱de̱ ke̱. 8 I̱tto̱ zin nuyaiti bu̱k ngi̱lo̱m neci, icin enne bu̱k ming i̱zzi̱ Ye̱su̱ to, kar zin elema zoz neci niko. 9 Ngen zin bu̱k nege ka̱gga̱c zoz wa e̱he̱rye̱ warage ci Ta̱mu̱ta̱dde̱no̱ azi ne, ingazi atin Ye̱su̱ daiza.
10 I̱me̱rte̱ zin nuyaha oot ce̱e̱zi̱ne̱ cigge̱k.
I̱ye̱le̱k Ye̱su̱ Ma̱ri̱ya̱ Magadalina ele
(Marko 16:9-11)
11 Ma̱i̱je̱ Ma̱ri̱ya̱ ibil ngi̱lo̱me̱ neci reena kar zin ku̱tu̱lu̱. Baling ngen enne a̱lu̱, u̱lu̱le̱ kar zin ki̱vo̱n ngi̱lo̱m, 12 icin zin anjilonya ram cik Ta̱mu̱ta̱dde̱no̱ aburuc ru̱u̱ma̱ni̱ cik voorik, aavtte ngin bali abahek ol Ye̱su̱ ke̱. Okko anjilo co̱de̱ aave o̱to̱ne̱ ci oou imma co̱de̱ aave o̱to̱ne̱ ci zoonu.
13 I̱jji̱nne̱t zin nege Ma̱ri̱ya̱ izettek ne, “Ngaa cu, a̱lu̱ nya?”
O̱bo̱de̱k Ma̱ri̱ya̱ nogo izek ne, “O̱o̱tte̱ ol uggak Manyi wananni, iróng zin bu̱k ka̱gga̱ oot aartik i̱ni̱n.” 14 Baling u̱du̱wa̱ zoz necu utuhuwe kar zin kicin Ye̱su̱ ming abile nginati, ngen zin enne bu̱k ka̱gga̱ ming een Ye̱su̱ neci.
15 Izek zin Ye̱su̱ nonno ne, “Ngaa cu, a̱lu̱ nya? Orongi dim ette i̱nna̱ ngene?”
I̱no̱n Ma̱ri̱ya̱ ize ne een i̱yo̱ko̱ e̱e̱ti̱ neci kozozona ko̱ manyi arata neci, izek ne, “Ming ette uwe ele cinne ngamani, du̱wa̱ka̱ nginti arike i̱nna̱, kar kuk kidima.”
16 Izek zin Ye̱su̱ nonno ne, “Ma̱ri̱ya̱!” Utuhuwek zin Ma̱ri̱ya̱ nonno kar zin kegereng zo̱ze̱ ci ol cik e̱e̱ggi̱n Aramaik kize ne, “Rabboni” Azi Te̱nne̱tte̱ ne, “De̱me̱zo̱i̱t!”
17 Izek Ye̱su̱ nonno ne, “Ma odoknonikan, ngen zin bu̱k anna ki̱mi̱re̱ kuk ngati Baba. Bit abarik ngati gotonogga kar zin izek ne, ka̱mi̱re̱ kokko ngati Baba wa bo̱do̱k een be̱e̱ti̱nno̱ng bu̱k, Ta̱mu̱ta̱dde̱n wa nanni kar bo̱do̱k kize Ta̱mu̱ta̱dde̱n cinne̱ng.”
18 I̱mi̱ro̱zi̱k Ma̱ri̱ya̱ Magadalina nuyak, uk izek nogo azi ne, kicina Manyi, kar ku̱du̱wa̱k nogo zoz ci u̱du̱wa̱k Ye̱su̱ nonno.
I̱ye̱le̱k Ye̱su̱ nuyak ciginnek ele
(Ma̱te̱yo̱ 28:16-20; Marko 16:14-18; Lu̱ka̱ 24:36-49)
19 Ize da̱ looci yo̱mo̱n, i̱i̱te̱ne̱ wa een oo biranoca, alute nuyaha ce̱e̱zi̱ne̱ ecito, eci nege o̱ngo̱o̱le̱ lo̱ddi̱ki̱re̱ cik Yo̱u̱do̱. I̱ki̱ya̱ zin Ye̱su̱ ibil orgene cinne̱ng, kar kizawo kize ne, “A̱vvu̱t labak!”
20 Baling ize niko, i̱ye̱le̱k zin nogo azzin ki ma̱ryo̱i̱t bali akati ol ke̱. Atalit nuyaha oroot baling icinnet Manyi.
21 O̱bo̱de̱k bo̱do̱k Ye̱su̱ nogo, ize ne, “A̱vvu̱t labak ki i̱yo̱ko̱ ming i̱tto̱na̱na̱ Baba ko̱, ki̱tto̱nnu̱ng anna i̱ge̱t bu̱k.”
22 Baling u̱du̱wa̱ zoz necu, otovongik nogo kar zin kizek ne, “A̱gga̱mtta̱ Vongiz ci A̱li̱le̱. 23 Ming alalnnekku ol mu̱nye̱n, alalnnek Ta̱mu̱ta̱dde̱n nogo de̱de̱; ming iróng niga alalnnekku nogo mu̱nye̱n cigge̱k, iróng Ta̱mu̱ta̱dde̱n alalnnek nogo.”
I̱ye̱le̱k Ye̱su̱ ele Tomas
24 Ma̱i̱je̱ to̱ni̱a̱ti̱ co̱de̱ to̱ni̱a̱he̱ wak e̱e̱ggi̱n omoto ki rama ci een zara Tomas, wa bo̱do̱k een cuudenit, a̱zze̱ da̱ enne to baling a̱kku̱nna̱k Ye̱su̱ nuyak waginnek. 25 U̱du̱ktta̱k zin nuyaha ne̱ke̱ nonno izettek ne, “Kicinta naga Manyi!” Izek zin Tomasi nogo ne, “Ming ngen anna kicin bboroyyok balik odode ol azzin ciginnek, kar bo̱do̱k ku̱u̱m azzin ne̱ke̱ ki ma̱ryo̱i̱t, iróng anna elemi zoz necu.”
26 Baling edeccai i̱i̱nya̱ cik e̱e̱ggi̱n turgerem, a̱vvu̱to̱ nuyaha ce̱e̱za̱ ecito, aavtte da̱ Tomasi ki nogo. Anyuge ba̱li̱ye̱ tatugeta, abarik Ye̱su̱ i̱tto̱ orgen cinne̱ng caato kibil kar zin kizek nogo ne, “A̱vvu̱t labak!” 27 Izek zin Ye̱su̱ Tomas ne, “Arik da̱ vallak cigunnek ngintu, kar cin azzin cigannik; nyaha bo̱do̱k azzin u̱u̱m ma̱ryo̱i̱t cinanni. Ma anyik zinin kodok, abunna ming a̱tu̱we̱.”
28 O̱bo̱de̱k zin Tomasi nonno zoz ci azi ne, “Manyi ki Ta̱mu̱ta̱dde̱n wananni!”
29 U̱du̱wa̱k zin Ye̱su̱ nonno zoz ci azi ne, “A̱tu̱we̱ ma̱rri̱t ming icinnan. E̱de̱tte̱ ol cik ngen kicintan imma ngatu a̱tu̱we̱.”
30 Baling a̱vvu̱ Ye̱su̱ orgene ci nuyak ciginnek, u̱tu̱gu̱ kaal cik a̱vu̱la̱ meelek iróng e̱he̱rye̱ buwe cu, icinnet nege do̱.
31 Ma̱i̱je̱ zin kaala ne̱ko̱ e̱he̱rye̱ kar niga anyait tu̱we̱ne̱t ngati Ye̱su̱ een enne Ki̱ri̱sto̱ nenen bali atahalai, Ngerrti Ta̱mu̱ta̱dde̱no̱, kar ming a̱tu̱yyu̱ niga nonno, arubannu ruget.