14
A̱du̱wa̱k Ye̱su̱ nuyak waginnek kerec Vongiz ci A̱li̱le̱
1 Izek Ye̱su̱ demezeyyak waginnek ne, “Ma anyikku zi̱nze̱tti̱ cuggo̱k ku̱u̱ce̱t, abarik aartik zi̱nze̱tti̱ Ta̱mu̱ta̱dde̱n, kar bo̱do̱k aartik zi̱nze̱tti̱ annita. 2 Anyak ce̱e̱ze̱ ci Baba ce̱e̱zi̱ cik meelek, wo̱ye̱ da̱ ming ki̱zze̱c ce̱e̱zi̱ ne̱ke̱ to, ku̱du̱wa̱kku̱ng wo̱ye̱ da̱. Kokko anna kadimanekkung nginti aavtiyyu. 3 Ming kuuwa kidimanneung lo̱o̱c, koboda atin abunna ming kokko kokkoyyung bu̱k, kar niga bu̱k abait ngati kabahe anna. 4 A̱gga̱yyu̱ ri̱t niga gool ci kokkoye anna.”
Een Ye̱su̱ gool wa kovvoye ngati Batinne
5 A̱nne̱k Tomasi Ye̱su̱ ne, “Manyi iróng ka̱gga̱yya̱ nginti okkoye i̱nna̱ ko̱, ka̱gga̱yya̱ wo̱ye̱ gool ku̱?”
6 O̱bo̱de̱k zin Ye̱su̱ nonno, izek ne, “Ke̱e̱ni̱ anna eliya gool, kar bo̱do̱k kize zoz wa een de̱de̱, kar bo̱do̱k kize ruget. Iróng e̱e̱ti̱ imma a̱kku̱nna̱k Baba ming iróng iyok ngatinani. 7 Ming a̱gga̱yya̱ng, a̱gga̱yyu̱ Baba bu̱k. Akane i̱yo̱ko̱ niko kuk, a̱gga̱yyu̱ nonno kar bo̱do̱k icinntu nonno bu̱k.”
8 Izek zin Vilipi nonno ne, “Manyi, ye̱le̱kke̱t Be̱e̱ti̱nna̱ kicinta kar kubunna niko.”
9 O̱bo̱de̱k Ye̱su̱ nonno, a̱nne̱k ne, “Vilip, kabak nga̱to̱de̱ e̱rki̱nya̱ cik meelek, iróng i̱nna̱ a̱gga̱ya̱n? Ming icinna e̱e̱ti̱ imma annita, ogon niko icin enne Baba bu̱k.” Kar bo̱do̱k kize ne, “Nya ci azi i̱nna̱ ne, ‘Ye̱le̱kke̱t Baba ko̱’? 10 Vilip iróng elemna i̱nna̱ a̱tu̱ zoz ci azi ne kaave anna ngati Baba, okko Baba aave ngatinani? Okko zoz ci ka̱du̱wa̱ki̱ ko̱ iróng ci kocoma anna, a̱kku̱ doize ci Baba ci abak ngatinani ko̱ ci ogon li̱ngli̱ngo̱n cinne. 11 U̱tu̱yya̱ng annit ming ka̱nne̱kku̱ng ne kodowina anna ki Baba; icima u̱tu̱we̱t kaal ne̱k a̱vu̱la̱ kogoni anna ko̱. 12 Ka̱du̱wa̱kku̱ng zoz wa een de̱de̱, ming a̱tu̱ya̱ e̱e̱ti̱ imma annita, ogon atin enne bu̱k kaal cik kogoni anna ko̱. Ogon atin enne kaal cik a̱ddi̱ki̱re̱ ommog ne̱ko̱, ma̱rri̱t anna kokko ngati Baba. 13 Ka̱a̱nyyu̱ng atin kaal cik a̱jji̱nnu̱ niga zare cigannik, kar anna Ngerinne kanyik zar cik Baba ku̱bu̱lte̱. 14 Ming a̱jji̱nnu̱ gi̱i̱ imma zare cigannik, ka̱a̱nyyu̱ng anna.”
U̱du̱wa̱ Ye̱su̱ we̱t ci a̱kku̱nne̱ Vongizi ci A̱li̱le̱
15 Izek zin bo̱do̱k Ye̱su̱ nogo ne, “Ming irezang niga annit, elemnyyu zoz ci ka̱du̱wa̱ anna. 16 Ka̱du̱wa̱k atin anna Baba kar ka̱a̱nyyu̱ng De̱me̱zo̱i̱t kar ka̱vvu̱ ki i̱ge̱t udut. 17 Een zin neci Vongiz wa een de̱de̱. Iróng zin ol cik lo̱o̱cu̱ elemi nonno eci nege iróng acin icima a̱gga̱ nonno. A̱gga̱yyu̱ zin abarik niga nonno ma̱rri̱t ming abakku bu̱k, kar zin atin ka̱vvu̱ zi̱nze̱tti̱nne̱ cuggo̱k.”
18 Emena Ye̱su̱ zoza de, kar kizek nogo ne, “Iróng atin kungnekkung do̱ kar izet boyyok, kokko atin kobodakkung. 19 Iróng atin ol cik lo̱o̱tu̱ acinna annit arrak do̱yo̱i̱t, acinna̱ng abarik atin niga do̱. Ma̱rri̱t ming kuruga bo̱do̱k anna, arugnnu atin niga bu̱k. 20 A̱gga̱yyu̱ atin niga wazin neci ming Kodowina anna ki Baba, kar zin bo̱do̱k niga o̱do̱ye̱ ki annita. 21 Ming a̱gga̱m e̱e̱ti̱ zoz cinanni, kar zin bo̱do̱k kuzutte lo̱ti̱nno̱k ne̱ke̱, een e̱e̱ti̱ neci ci ireza annita. Irez atin Baba e̱e̱t neci ireza annit ke̱, kar zin bo̱do̱k anna kirez nonno kar zin ki̱ye̱le̱k ele ka̱gga̱wa̱n.”
22 Ize zin bo̱do̱k Judasi ne, amire zin iróng een Judas Iskariyot bali utene Ye̱su̱ ke̱, “Manyi, nya i̱nna̱ ming orongi ye̱le̱kke̱t agit do̱ ele iróng orongi ye̱le̱k ol cik lo̱o̱tu̱ ko̱?”
23 Obodeke Ye̱su̱ nogo a̱nne̱k ne, ming ireza e̱e̱ti̱ imma annita, elemi wo̱ye̱ enne de̱mzi̱ne̱t cinanni. Okko atin Baba irez nonno, kar zin naga ki̱vi̱ta̱ha̱ nonno, kar koot kidimanta ce̱e̱z wanna̱ng, kar kabakta ki e̱e̱t neci. 24 Ming iróng e̱e̱ti̱ imma elemnya annita, iróng irez de̱me̱zi̱ne̱t cinanni. Imma zoz ci aziknnu ko̱, iróng een zoz cinanni, een zoz necu ci Baba wa i̱tto̱na̱na̱ annita.
25 Ka̱du̱wa̱kku̱ng zin zo̱zzo̱k ne̱ko̱ ngati ngen karumzene anna ki i̱ge̱ta̱ ko̱. 26 Okko abarik atin De̱me̱zo̱i̱ti̱ wa een Vongiz ci A̱li̱le̱, wa atin i̱tto̱na̱ Baba zare cigannik, edemezung kaal do̱o̱k kar zin ki̱no̱na̱u̱ng kaal balik ku̱du̱wa̱u̱ng anna ke̱. 27 Kungnekkung zin i̱yo̱ko̱ gano wanai kar a̱vvu̱te̱ labak. Iróng zin ka̱a̱nyyu̱ng gano go̱o̱le̱ wagon anyike olli lo̱o̱cu̱ ol ko̱, ma anyikku zi̱nze̱tti̱ ku̱u̱ce̱t kar zin o̱to̱ngo̱o̱lte̱ lo̱o̱c.
28 “Izekttang wanai ming ka̱nne̱kku̱ng ne ‘Kokko anna izong kar zin kuk kobodaung.’ Ming irezang niga annit a̱gga̱yyu̱ niko ming kokko ngati Baba, ma̱rri̱t Baba ming a̱ddi̱ki̱re̱ ngatinani. 29 Ka̱du̱wa̱kku̱ng zin kaal ne̱ko̱ i̱yo̱ko̱ ming ngen ka̱gga̱me̱, ming ka̱gga̱me̱, ovvo atin a̱tu̱yya̱ng. 30 Iróng ngen kozozi u̱u̱mu̱c, i̱ki̱ya̱ ngerrti lo̱rye̱nto̱ wa een alaan ci lo̱o̱tu̱. Iróng anyak komiz ci ommogja annita, 31 Abunna zin ming a̱gga̱ ol cik lo̱o̱ta̱ ko̱ ming kirezi anna Baba, kar bo̱do̱k ku̱tu̱gu̱ kaal wak i̱lo̱ti̱ka̱ Baba ku̱tu̱gu̱. I̱vi̱ta̱ zin i̱yo̱ko̱ kotozo.”