15
Ogon Ye̱su̱ ki keet ci anyak alawo
1 Kogoni anna ki keet wa een nonno ele. Ma̱i̱je̱ Baba een manyi keet. 2 Aizek enne alawo wak iróng a̱a̱ri̱ o̱ya̱u̱ tu̱, imma alawo wak a̱a̱ri̱, avil kar ki̱bi̱re̱to̱ ju̱rru̱m. 3 Abarik niga ubunntau zo̱ze̱ bali ku̱du̱wa̱u̱ng anna ke̱. 4 Ka̱vvu̱t ki annit nga̱to̱de̱ ko̱do̱ye̱ kiwagon keet ki alawo. Iróng wo̱ye̱ alawoci a̱bi̱rna̱ o̱ya̱u̱ enne do̱ ming iróng arumze ki keet ele kodowe. Iróng wo̱ye̱ niga do̱ ogonnu gi̱i̱ imma ming iróng karumze ki annita.
5 “Kogoni anna ki keet, ovvo niga ogonnu ki alawo. Ming karumena anna ki e̱e̱t ko̱do̱ye̱wa̱, a̱bi̱rna̱ e̱e̱ti̱ neci o̱ya̱u̱ cik meelek ju̱rru̱m ki keet. A̱zze̱ wo̱ye̱ gi̱i̱ ci ogonnu niga do̱ to ming iróng karumze ko̱do̱ye̱. 6 Ming iróng e̱e̱ti̱ imma aromonika annit, ogon enne ki alawoci ci u̱ju̱ko̱zi̱k tu̱ kar zin kodok. Idimttai alawo cik ogon ki ne̱ko̱ u̱lu̱to̱zi̱k kar zin kakatozik gwa̱a̱. 7 Ming karume ko̱do̱ye̱ kar zin niga u̱zu̱tte̱ zoz cinanni, i̱jji̱nne̱t gi̱i̱ ci ette orongnyu niga kar Ta̱mu̱ta̱dde̱n ka̱a̱nyyu̱ng. 8 Aanyik bi̱re̱zi̱ ci a̱bi̱rnu̱ ki keena ko̱ ki nginti i̱ye̱la̱nu̱ e̱le̱tti̱ izet nuyak cigannik, kar zara cik Baba ku̱bu̱lte̱.
9 “Ki i̱yo̱ko̱ ming ireza Baba annit ko̱, kirezzung anna i̱ge̱t bu̱k, iraktek zin rezinte cinanni. 10 Ming azunnu niga lo̱ti̱nno̱k cigannik, odokta niga bu̱k rezinte cinanni, ki i̱yo̱ko̱ ming kazunne anna lo̱ti̱nno̱k wak Baba kar zin kodowa rezinte wainne ko̱. 11 Ku̱du̱wa̱u̱ng ri̱t ba̱li̱ye̱ anna i̱ge̱t zoz cu kar talninet cinanni ka̱vvu̱ ngatinno̱ng, kar talninet cinno̱ng ki̱ddi̱ki̱r. 12 Zoz zin cinanni ki̱lo̱tu̱ng icu: Irezto e̱le̱tti̱ ki baling kirezzung anna i̱ge̱t ke̱. 13 I̱llo̱i̱ rezinet ci ommog wa a̱da̱kne̱ e̱e̱ti̱ imma ngati gonogginnu. 14 Ming ogonnu lo̱ti̱nno̱k cik ka̱du̱wa̱kku̱ng anna ko̱, izettu niga gonogga de̱de̱. 15 Iróng bo̱do̱k anna kawuyyung izet du̱cca̱k, eci du̱ca̱i̱ti̱ iróng a̱gga̱ li̱ngli̱ngo̱n ci ogon ddi̱ki̱ryo̱i̱ti̱ cinne. Kawuyyung abarik anna i̱ge̱t izet gonogga, eci ke̱de̱me̱zzu̱ng kaal do̱o̱k wak kedemeza anna ngati Baba. 16 Iróng zin een i̱ge̱t cik ahalannang annita, annit abarik ci kahalannung i̱ge̱ta̱ kar zin ka̱a̱nyyu̱ng li̱ngli̱ngo̱n ci ovvo a̱bi̱rnu̱ kiwagon o̱ya̱u̱ cik ovvo abak udut. Kar zin Baba ka̱a̱nyyu̱ng kaal cik wo̱ye̱ a̱jji̱nnu̱ niga zare cigannik. 17 Ki̱lo̱ti̱kku̱ng zin i̱yo̱ko̱ zoz ci ka̱nne̱kku̱ng ne, irezto e̱le̱tti̱.
Amarine ol cik lo̱o̱cu̱ nuyak
18 “Ming amarinnung ol cik lo̱o̱tu̱, a̱gga̱c niga ming amarinna nege annita oowa. 19 Ming e̱e̱ggi̱nnu̱ niga ol cik lo̱o̱tu̱, irezung ol cik lo̱o̱tu̱ kiwagon ming irez ol wagge̱k lo̱o̱tu̱ ogon kaal cik gerzek. Iróng niga e̱e̱ggi̱nnu̱ olli lo̱o̱tu̱, katahalaung zin anna i̱ge̱t kar u̱tu̱gu̱z kaal cik ogon ol cik Ta̱mu̱ta̱dde̱no̱ iróng bo̱do̱k ngen ogonnu kaal cik gerzek ogon ol wak lo̱o̱tu̱. Zoz zin ci amarinnung ol cik lo̱o̱tu̱ ko̱ nenen necu. 20 A̱a̱dda̱ zoz bali ku̱du̱wa̱u̱ng ke̱. I̱llo̱i̱ du̱ca̱i̱t ci a̱ddi̱ki̱re̱ ngati ddi̱ki̱ryo̱i̱t cinne. Ming a̱ggi̱dda̱ nege annit, a̱ggi̱ddu̱ng atin nege i̱ge̱t bu̱k. Ming o̱ngo̱o̱le̱ nege de̱mzi̱ne̱t cinanni, o̱ngo̱o̱le̱ atin nege de̱mzi̱ne̱t cunno̱ng bu̱k. 21 Ogonikkung atin i̱ge̱t kaal cik gerzek eci a̱tu̱yyu̱ niga zar cigannik, iróng bo̱do̱k nege a̱gga̱ e̱e̱t wa i̱tto̱na̱na̱ annita. 22 Wo̱ye̱ da̱ ming iróng anna ka̱kku̱ni̱ ki̱ki̱ya̱ ku̱du̱wa̱k nogo ba̱ci̱nno̱k cigge̱k mu̱nye̱nu̱, iróng wo̱ye̱ da̱ nege a̱gga̱ ming anyak mu̱nye̱n. Iróng zin ngen alit ba̱ci̱nno̱k cigge̱k mu̱nye̱nu̱. 23 Ming amarinna e̱e̱ti̱ annit, amarine e̱e̱ti̱ neci Baba bu̱k. 24 Ming ngen anna ku̱tu̱gu̱ kaal wak a̱vu̱la̱ ngen e̱e̱ti̱ imma ku̱tu̱gu̱ ke̱ orgene cinne̱ng, iróng wo̱ye̱ da̱ nege a̱gga̱ ming anyak mu̱nye̱n. Ma̱i̱je̱ i̱yo̱ko̱ icinnet kaal cik a̱vu̱la̱, kar abarik amartoya annit ki Baba bu̱k. 25 Ogone zoz necu kar zoz bali e̱he̱rye̱ lo̱ti̱nno̱we̱ ke̱ kakat mo̱o̱le̱t: ‘Amartoya nege annit gaganiko.’