SiYesus Najaok Inadili Eitolo NiPilatus
(Mat. 27:1-2; Luk. 23:1-5, 13-25; Yoh. 18:28-38)
15
1 Titieleomai teꞌolongian-olongian nuꞌimam nogutu tepejajaoꞌong concoono tetopomimpin-topomimpin nuYahudi,
teguru-guru nuparenta nuꞌAlataꞌala ane jojoo tetoo nupongadilan nuꞌagama sanu ntaninya.
Lamai heꞌua siira nonuju tetoo-too nomungui siYesus,
nongomung Siia ane nombeenaꞌo-Nya eisiPilatus.
2 SiPilatus noꞌutanya eisiYesus,
“Tutuunya Siꞌoo tepuang nutoo-too nuYahudi?”
SiYesus nonyimbat,
“Siꞌoo mboto nongulara.”
3 Lamai heꞌua teꞌolongian-olongian nuꞌimam norait siYesus nonggauka nabari tegauk sanu majaat.
4 Lamai heꞌua siPilatus noꞌutanya eisiYesus,
“Siꞌoo jio seilu monyimbat?
Poꞌinepea nabari terait niira eiSiꞌoo.”
5 Tapi maampo siYesus jio osala,
Siia jio umai nonjarita tesapa-sapa,
karna heꞌua siPilatus neherang.
SiGubernuur Pilatus Nongusaha Molapasa SiYesus Tapi Jio Maala
(Mat. 27:15-26; Luk. 23:14-25, 13-25; Yoh. 18:39--19:16)
6 Sontoung sangkaning,
watu teEleo nuPaska siPilatus molapasa sotoo sanu pinanjaraa.
Tetoo-too nuYahudi momile tetoo sanu nolapasa.
7 Watu heꞌua umai sotoo tinopei siBarabas.
Siia pinanjara concoono tetoo-too sanu majaat.
Siira nomate lasiatoo watu nongeva tepomarenta nuRomawi.
8 Lamai heꞌua tepeinconong nutoo heꞌua umaꞌo eisiPilatus ane nompamula nomongi siia nolapasa sotoo eisiira sima biasanya.
9 SiPilatus noꞌutanya,
“Siꞌemiu seilu siaꞌu molapasa tepuang nutoo-too nuYahudi eini eisiꞌemiu?”
10 SiPilatus noꞌutanya heꞌua karna siia moꞌotoi teꞌolongian-olongian nuꞌimam nongomung siYesus eisiia,
karna siira neꞌiri hatib.
11 Tapi teꞌolongian-olongian nuꞌimam nongonda-ngondaꞌi teambok nutoo-too sanu neincong,
antau siPilatus molapasa siBarabas,
jio siYesus.
12 Lamai heꞌua siPilatus noꞌutanya eisiira,
“Ane siaꞌu molapasa siBarabas,
tesapa sanu seilu niꞌemiu ugauka eitoo sanu tinopei niꞌemiu tepuang nutoo-too nuYahudi eini?”
13 Siira neroroa eisiPilatus,
“Pakumo Siia eisalip!”
14 Tapi siPilatus noꞌutanya eisiira,
“Neteꞌuya?
Tesapa teꞌajajaat sanu ginaukaꞌo-Nya?”
Tapi siira nentiang neroroa noporos,
“Pakumo Siia eisalip!”
15 SiPilatus seilu nogutu tepeinconong nutoo-too heꞌua nasanang,
karna heꞌua Siia nolapasa siBarabas sanu pinomongi niira.
Lamai heꞌua siPilatus nonuju tetantara monyambook siYesus,
ane siia nombeena siYesus eisiira antau nosalipaꞌomo.
SiYesus Pinotambaka Nutantara NiPilatus
(Mat. 27:27-31; Yoh. 19:2-3)
16 Lamai heꞌua tetantara nongomung siYesus eilalong nututumbalong nupomoiaong nutomooge sanu tinopei tePretorium ane noleva jojoo tetantara nuRomawi sanu ampi heꞌua.
17 Siira nongalina tepakean niYesus ane nepakea tebaju sanu mounguc eiSiia.
Siira valii nogutu tebanto lamai terui sima tebanto nupuang ane nongembea eivaꞌi-Nya.
18 Heꞌuapa nolalui niira sima momuji siYesus,
inular niira,
“Netuvu tepuang nutoo-too nuYahudi!”
19 Siira nemombolosong nombobog tevaꞌi niYesus nepake tetoꞌon,
nonunyui Siia ane nopotuꞌu eitolo-Nya nongaku-ngaku siira nonyomba eiSiia.
20 Notouk siYesus pinotambaka nutantara heꞌua,
siira nongalina tebaju moungu heꞌua ane nepakea vavalii tepakean numboto-Nya eiSiia.
Lamai heꞌua siira nongomung Siia umaꞌo eiaangnya momaku Siia eisalip.
SiYesus Sinalipa
(Mat. 27:32-44; Luk. 23:26, 33-43; Yoh. 19:17-24)
21 Pepees siira nelampa,
netepolabot sotoo tetopenya siSimon sanu najaok eiYerusalem.
SiSimon heꞌua lamai teKota nuKirene,
siama niꞌAleksander ane niRuvus.
Siira nomajujuta siSimon nonyumbi tesalip niYesus.
22 Lamai heꞌua tetantara nongomung siYesus eiGolgota,
sanu tebatuanya tebuut obelinga nuvaꞌi.
23 Eiriꞌua siira nombee siYesus teogo nuꞌanggur sanu ginaloti temuur noinung antau jio mepees,
tapi Siia jio seilu menginungnya.
24 Lamai heꞌua tetantara heꞌua nomaku siYesus eisalip.
Siira nongundi tepakean-Nyad antau nonantua sisee sanu maꞌaala tesapa.
25 Siira nonyalipa siYesus ati sesio titieleo.
26 Umai tetanda sanu pinakua eisalip.
Eitanda heꞌua tinulisa tesapa sanu noporaita Siia,
“EINIMO TEPUANG NUTOO-TOO NUYAHUDI.”
27 Siira nonyalipa siYesus concoono rotoo tetopongangga,
sotoo eisabata nuꞌoanong ane sotoo eisabata nuꞌoigi-Nya.
28 [Lamai heꞌua tejarita nuꞌAlataꞌala najari sanu jinaritaa sima siKristus,
“Siia irait sima tetoo-too sanu majaat.”]
29 Tetoo-too sanu nalabat eiriꞌua nongular sanu majaat eiSiia ane nombebelina tevaꞌie niira ane nonjarita,
“Hee!
Siꞌoo nongular mongguara teVonua nuꞌAlataꞌala ane mogutunya vavalii boi eilalong tolueleo!
30 Ane sima heꞌua,
penyau lamai tesalip heꞌua ane salamata teꞌalae Niꞌoo mboto!”
31 Sima heꞌua valii siYesus pinotambaka nuꞌolongian-olongian nuꞌimam ane nuguru-guru nuparenta nuꞌAlataꞌala ane siira nejajaritaong,
“Tetoo-too ntaninya sinalamataꞌo-Nya,
tapi teꞌalae-Nya mboto jio umai sinalamataꞌo-Nya!
32 Patuvaya tetoo eini,
sanu inular Siia teKristus,
tepuang nutoo-too nuꞌIsrael,
penyau lamai tesalip heꞌua eꞌeini,
antau siꞌita maala meꞌita ane momarcaya Siia tepuang niꞌita!”
Siira sanu sinalipa concoono Siia noncalai Siia valii.
SiYesus Naate
(Mat. 27:45-56; Luk. 23:44-49; Yoh. 19:28-30)
33 Watu ati sompulu rorua eleonya,
najari nondoung eitana heꞌua ane tatarus sima heꞌua jaok ati totolu beimbengi.
34 Watu ati totolu beimbengi,
siYesus neroroa noporos,
“Eloi,
Eloi,
lama sabaktani?”
sanu tebatuanya “TeꞌAlataꞌalaꞌU,
teꞌAlataꞌalaꞌU,
neteꞌuya Siꞌoo nolinjoꞌi Siaꞌu?”
35 Lasiatoo sanu neꞌoro noꞌosuk riꞌua neꞌeepe siYesus ane nonjarita,
“Poꞌinepe,
Siia noleva siNabi Elia!”
36 Lamai heꞌua sotoo nelinjok ane nongala tesagara sanu maala monosop teogof.
Siia nenjoui tesagara heꞌua nepake teꞌanggur sanu mengilu ane nongembea heꞌua eituvu nutoꞌon.
Lamai heꞌua vineenaꞌonya eisiYesus ininung-Nya ane nongular,
“Maemo siꞌita metaang ane mongita siElia menyaua Siia lamai tesalip heꞌua atau jio.”
37 Lamai heꞌua siYesus neroroa noporos ane naatemo.
38 Watu heꞌua tekaing pongonto sanu tontoeng eilalong nuVonua nuꞌAlataꞌala netilang najari rorua lamai babonya jaok eiangkopnya.
39 Lamai heꞌua tetopomimpin nutantara sanu neꞌoro eitolo niYesus heꞌua neꞌita iamaꞌo siYesus naate,
siia nonjarita,
“Tetoo eini tutuu teUnga nuꞌAlataꞌala!”
40 Umai valii lasiatoo tebengkel eiriꞌua sanu neꞌita lamai maavar jojoo sanu najari heꞌua.
Eiolot niira umai siMaria Magdalena,
ane siSalome,
ane siMaria siina niYakobus sanu nolumbi ane niYoses.
41 Tebengkel-bengkel heꞌua nonuut ane nonulunimo siYesus watu Siia eiTana nuGalilea.
Nabari tebengkel ntaninya valii eiriꞌua sanu najaok lamai teGalilea umaꞌo concoono Siia eiYerusalem.
SiYusup Nongembea Tebatang NiYesus Eilalong Nukubur
(Mat. 27:57-61; Luk. 23:50-56; Yoh. 19:38-42)
42 Teeleo heꞌua teEleo Monyadiaa teSasagara,
g jijiompo teEleo nuPengondokh nutoo-too nuYahudi.
Karna heꞌua,
i watu moꞌosuk mondoung,
43 siYusup,
tetoo nuꞌArimatea,
umaꞌo eisiPilatus.
SiYusup tetoo sanu mombosi ane tetopomimpin nuꞌagama nuYahudi.
Siia metaang tePomarenta nuꞌAlataꞌala.
Notintibarani siia umaꞌo eisiPilatus ane nomongi tebatang niYesus antau monguburaꞌonya.
44 Lamai heꞌua siPilatus neherang siYesus naatemo,
lamai heꞌua siia noleva tetopomimpin nutantara ane noꞌutanya,
“SiYesus tututuu naatemo?”
45 Touk siPilatus moꞌotoi siYesus tututuu naatemo,
siPilatus nomatuvaya siYusup mongala tebatang niYesus.
46 Lamai heꞌua siYusup nongoli tegandis ane nenyaua tebatang niYesus lamai tesalip.
Siia nongaluinya eilalong nugandis heꞌua,
ane nongembeaꞌonya eilalong nukubur sanu totouko ginauni eipampang nubuut nuvatu.
Lamai heꞌua siia nonuju tetoo nondulina sobua tevatu mooge teponaub tebamba nukubur heꞌua.
47 SiMaria Magdalena,
ane siMaria siina niYoses neꞌita eipaio tebatang niYesus kinubur.