SiYesus Netuvuonye
(Mat. 28:1-10; Luk. 24:1-12; Yoh. 20:1-10)
16
1 Touk teEleo nuPengondok nutoo-too nuYahudi,
siMaria Magdalena ane siMaria siina niYakobus,
concoono siSalome nongoli teminya sanu mombongi umaꞌo eikubur antau mongembei teminya eibatang niYesus.
2 Titieleo tutuu eieleo pabibia teduminggu heꞌua,
watu teeleo nesuvungo,
umaꞌomo siira eikubur.
3 Siira neꞌuꞌutanyaong,
“Sisee mondulina tevatu heꞌua lamai tebamba nukubur antau siꞌami maala mentama?”
4 Tapi watu siira najaok,
siira neꞌita tevatu heꞌua dinulingo.
Tevatu heꞌua nooge tututuu.
5 Lamai heꞌua siira nentama eilalong nukubur ane siira neꞌita sotoo sanu molumbi.
Siia nepake tejuba sanu memeas ane nongodung eisabata nuꞌoanong.
Siira tututuu nobule.
6 Tapi tetoo sanu molumbi heꞌua nonjarita eisiira,
“Inyaa mobule!
Siꞌemiu nelolo siYesus tetoo nuNasaret,
sanu sinalipa heꞌua.
Siia pinetuvumo.
Siia jio umai eiriꞌini.
Itai!
Eiriꞌinimo Siia inembea.
7 Tapi nyapoeini naꞌomo,
ularaꞌomo eisiPetrus ane temurit-murit ntaninya,
Siia mongaliurui siꞌoo umaꞌo eiTana nuGalilea.
Ampi heꞌua siꞌemiu netepojaok Siia,
sima sanu inularaꞌo-Nya eisiꞌemiu.”
8 Lamai heꞌua siira nesuvung ane nelinjok nolinjoꞌi tekubur heꞌua,
karna siira gugugur ane neherang.
Siira jio nongularaꞌonya tesapa-sapa eisisee-see karna nobule.
[Siira nongulara jojoo tetutuunong heꞌua eisiPetrus ane tetagu-tagunya.
Touk heꞌua siYesus mboto nonuju temurit-murit-Nya nokarevaa lamai teTimur umaꞌo teBarat tekareva sanu mapacing ane jio motou-touk sima teꞌasasalamat sanu seende-endenya heꞌua.]
SiYesus Nopo'ita EisiMaria Magdalena
(Yoh. 20:11-18)
9 Touk siYesus nembaung lamai teꞌamateong titieleo eieleo nuduminggu heꞌua,
Siia pabibia nopoꞌita eisiMaria Magdalena,
sanu luulu siYesus nombugo pituꞌalus sanu majaat.
10 Lamai heꞌua,
siMaria umaꞌo ane nongulara tesapa sanu najari eitoo-too sanu concoono Siia luulu.
Tetoo-too heꞌua noondong ane notumangis karna teꞌamateong-Nya.
11 Tapi watu siira neꞌeepe siYesus netuvu ane Siia inita niMaria,
siira jio nomarcaya tejaritanya.
SiYesus Nopoꞌita Eirotoo Temurit-Nya
12 Lamai heꞌua siYesus nopoꞌita eirotoo tetoponuut-Nya tapi telio-Nya tantani,
pepees siira nelampa nesuvung lamai tekota.
13 Lamai heꞌua siira umaꞌo ane nongulara eimurit-murit-Nya sanu ntaninya sima tegauk heꞌua.
Tapi temurit-murit-Nya sanu ntaninya jio nomarcaya.
SiYesus Nomarentaa Temurit-murit-Nya Mokarevaa TeKareva Sanu Mombosi Eijojoo Temanusia
(Mat. 28:16-20; Luk. 24:36-49; Yoh. 20:19-29; Kis. 1:6-8)
14 Lamai heꞌua siYesus nopoꞌita eisompulu sotoo temurit-Nya pepees siira nenginang.
Siia noncala siira karna siira jio nomarcaya ane maꞌadal teambok niira.
Maampo umai tetoo-too sanu neꞌita Siia touk Siia pinetuvu nuꞌAlataꞌala lamai teꞌamateong,
temurit-murit jio nomarcaya tetoo-too heꞌua.
15 Lamai heꞌua siYesus nongulara eimurit-murit-Nya,
“Naꞌomo eijojoo tepomoiaong eijuniaa ane mokarevaa teKareva sanu Mombosi eijojoo temanusia.
16 Sisee-see momarcaya eiSiaꞌu ane nobaptis kana nosalamata nuꞌAlataꞌala.
Siira jio nohukum karna tedosa niira.
Tapi sisee-see jio momarcaya kana nohukum.
17 Tetoo-too sanu momarcaya kana monggauka tetanda-tanda sanu monujua tekuasa nuꞌAlataꞌala umai eisiira:
Siira kana mombugo teꞌalus-alus sanu majaat mesuvung lamai tetoo-too nepake teꞌababaraka lamai tetopeꞌU.
Siira kana monjarita tebasa-basa sanu jiompo nopegurui niira.
18 Siira kana mondiit tesaa ane menginung tebisa sanu maꞌapate,
tapi tesaa ane tebisa heꞌua jio mesilaka siira.
Tetoo-too sanu momarcaya eiSiaꞌu kana monggama tetoo-too sanu nepees ane siira kana nopeꞌeondok.”
SiYesus Umaꞌo Eisuruga
(Luk. 24:5-53; Kis. 1:9-11)
19 Touk Siopu Yesus nonjarita eimurit-murit-Nya,
Siia neteengkat umaꞌo eisuruga ane Siia nongodung eisabata nuꞌoanong nuꞌAlataꞌala ane nomarentaa concoono Siia.
20 Lamai heꞌua siira nesuvung nokarevaa teKareva sanu Mombosi eitoo-too eipapaio.
Siopu Yesus nokarajaa concoono siira ane nombeena tekuasa eisiira nonggauka tetanda-tanda sanu mabaraka antau nonujua teKareva heꞌua tutuu.