SiYesus Nongular TeVonua NuSiopu Alataꞌala Kana Nopoꞌorua
(Mat. 24:1-2; Luk. 21:5-6)
13
1 Watu siYesus nesuvung lamai teVonua nuꞌAlataꞌala,
sotoo temurit-Nya nongulara eiSiia,
“Guru,
arai itai,
magaya teVonua nuꞌAlataꞌala ane tevonua-vonua sanu ntaninya sanu vinaung eini.
Mooge valii tevatu-vatu sanu pinake nonusung!”
2 SiYesus nongulara eisiia,
“Arai itai luulu magaya tevonua-vonua sanu morosong heꞌua,
jio sobua tevatu nopatuvaya eibabok nuvatu ntaninya.
Jojoo tevatu nonavua numusu-musu nutoo-too nuYahudi!”
Tetoo-too Jojoo Masesa Tutuu, Tapi Inyaa Mobule, Momarcaya Boi EiSiopu
(Mat. 24:3-14; Luk. 21:7-19)
3 Lamai heꞌua siYesus ane temurit-murit-Nya umaꞌo teBuut nuSaitun ane nongodung nopotolo eiVonua nuꞌAlataꞌala.
Watu jio umai tetoo ntaninya,
siPetrus,
siYakobus,
siYohanes ane siꞌAndreas noꞌutanya eiSiia,
4 “Ulara eisiꞌami siambengi teVonua nuꞌAlataꞌala heꞌua nopoꞌorua.
Tesapa tetandanya jojoo tegauk heꞌua kana majari?”
5 SiYesus nongulara eisiira,
“Paꞌajaga-jaga antau jio umai tetoo-too sanu mongakal siꞌemiu sima tegauk-gauk heꞌua sanu kana majari.
6 Karna mabari tetoo mongaku-ngaku simamo Siaꞌu ane mongulara,
‘Siaꞌu teKristus,’
ane tetoo bari momarcaya siira.
7 Watu siꞌemiu meꞌeepe nepapateong eipomoiaong sanu moꞌosuk ane meꞌeepe tekareva sima nepapateong eipomoiaong sanu maavar,
inyaa mobule.
Karna teꞌAlataꞌala nonantua tegauk-gauk heꞌua kanaboi majari.
Tapi heꞌua jiompo teponouꞌong nujuniaa.
8 Karna tebangsa-bangsa meva-evaong,
ane tepomarenta-pomarenta meeva-evaong.
Umai valii telindug eipaio-paio ane umai tetoo-too naate nuorok.
Tapi jojoo tegauk-gauk heꞌua boi tepamulaong nuꞌasesesa sima tebengkel sanu kana moguunga mompamula merasai mepees.
9 Tapi paꞌajaga-jaga karna temusu-musumu mongomung siꞌemiu eipongadilan nuꞌagama niira,
ane siꞌemiu nobobogi eipongganeong-pongganeong nuYahudi.
Siꞌemiu valii kana noꞌadili eitolo nugubernuur-gubernuur ane nupuang-puang karna siꞌemiu nonuut Siaꞌu.
Eiriꞌua siꞌemiu maala mongular teKareva sanu Mombosi sima Siaꞌu.
10 TeꞌAlataꞌala nonantua teKareva sanu Mombosi sima tePomarenta nuꞌAlataꞌala kanaboi nokarevaa eijojoo tebangsa jijiompo tejuniaa eini monouk.
11 Watu temusu-musu meraꞌop ane mongomung siꞌemiu noꞌadili karna siꞌemiu majari temuritU,
inyaa siꞌemiu mobule tesapa sanu kana noular niꞌemiu monyabataa teꞌalaemu.
Tapi watu siꞌemiu noꞌadili,
ulara tesapa sanu noulara nuꞌAlataꞌala eisiꞌemiu.
Tesapa sanu siꞌemiu kanaboi mongulara eiwatu heꞌua,
heꞌua jio lamai tepikiranmu mboto tapi tebasa-basa majaok lamai teꞌAlus nuꞌAlataꞌala.
12 Majaok tewatunya tetoo-too sanu jio momarcaya eiSiaꞌu mombeena terurus sanu nomarcaya nopatei.
Siama-siama sanu jio nomarcaya monggauka tegauk sanu selilio eiunga-unga sanu nomarcaya.
Teunga-unga sanu jio nomarcaya mongeva tetosiaꞌangnya sanu nomarcaya ane momate siira.
13 Siꞌemiu noꞌengkelesi jojoo nutoo karna siꞌemiu nonuut Siaꞌu.
Tapi tetoo-too sanu montaang eilalong nuꞌaparcayaong jaok teponouꞌong otutuvu niira,
nosalamata lamai teꞌasesesa nuꞌAlataꞌala.”
Tewatu Nuꞌasesesa Sanu Mooge
(Mat. 24:15-28; Luk. 21:20-24)
14 SiYesus tatarus nonjarita,
“Siꞌemiu kana meꞌita tetoo sanu majaat tutuu sanu noꞌengkelesi nuꞌAlataꞌala,
tetoo sanu monyabaa teVonua nuꞌAlataꞌala majari noboa,
meꞌoro eipomoiaong sanu jio masipato.
a---Sanu mombasa tebuku eini kanaboi moꞌotoi tebatuanya.
---Watu heꞌua tetoo-too sanu momoia eiTana nuYudea kanaboi melinjok umaꞌo eibuut.
15 Jojoo tetoo sanu eibabok nuatok nuvonua inyaa menyau ane mentama eilalong nuvonuanya ane mongala tesasagaranya.
Tapi menyau ane boi melinjok.
16 Jojoo tetoo sanu mokarajaa eijoꞌongnya kanaboi melinjok ane inyaa morampaka tewatu metencile umaꞌo tevonua mongala tebajunya.
17 Aasi tutuu tebengkel-bengkel sanu iꞌompong ane tebengkel-bengkel sanu nonyusui teunganya eiwatu heꞌua!
18 Ponggane eiꞌAlataꞌala antau tegauk heꞌua inyaa majari tewatunya mojolob.
19 Karna eiwatu heꞌua kana majari teꞌasesesa tutuu.
Teꞌasesesa sima heꞌua jiompo majari lamai pamula nujuniaa sanu pinaꞌajari nuꞌAlataꞌala jaok eleo eini,
ane teꞌasesesa sima heꞌua jio majarionye.
20 Ane Siopu jio mopoꞌokurang tewatu heꞌua jojoo tetoo maate.
Tapi karna Siia nongagalani tetoo-too sanu pinilei-Nya,
Siia mopoꞌokurang tewatu heꞌua.
21 Eiwatu heꞌua,
ane sotoo mongular eisiꞌemiu,
‘Eiriꞌini teKristus tepuang sanu tinuju nuꞌAlataꞌala mopaꞌasalamat tetoo-too!’
atau sotoo mongular,
‘Ampi heꞌua umai teKristus!’
inyaa siꞌemiu nomarcaya,
22 karna majaok tetoo-too sanu malampoa ane mongular,
“Siaꞌu teKristus.”
Majaok valii tetoo-too sanu malampoa ane mongular,
“Siaꞌu tenabi.”
Siira mombee tetanda-tanda ane tegauk-gauk sanu mabaraka mongakal tetoo-too.
Siira valii monyoꞌarai mongakal tetoo-too sanu pinilei nuꞌAlataꞌala,
tapi jio maala.
23 Tapi paꞌajaga-jaga siꞌemiu!
Siaꞌu nongulara eisiꞌemiu sima jojoo eini jijiompo tegauk heꞌua majari.”
Teꞌajajaok TeUnga NuManusia
(Mat. 24:29-31; Luk. 21:25-28)
24 SiYesus nongular,
“Eiwatu heꞌua,
touk teꞌasesesa heꞌua,
teeleo eilangit majari nondoung,
ane tevulang jio mombee teraratnya.
25 Tevituong-vituong nanavu lamai telangit ane tekuasa-kuasac eilangit nogogea nuꞌAlataꞌala.
26 Watu heꞌua tetoo-too meꞌita,
Siaꞌu,
teUnga nuManusia majaok eijuniaa eilalong nuruꞌong concoono teꞌababaraka sanu mooge ane teꞌararava sanu mooge.”
27 Lamai heꞌua Siaꞌu monuju temalaekat-malaekat umaꞌo eijojoo tepomoiaong eijuniaa,
ane mongincona tetoo-too sanu pinilei lamai jojoo tepomoiaong eijuniaa.
Lamai tepomoiaong sanu moꞌosuk ane sanu maavar.”
Iamaꞌo Moꞌotoi SiYesus Majaok
(Mat. 24:32-35; Luk. 21:29-33)
28 SiYesus nongular eimurit-murit-Nya,
“Peguru lamai tepogurapanong sima tepuu nuꞌara heꞌua.
Siꞌemiu moꞌotoi tesilo moꞌosuko,
watu tepanga-panga majari monobulung ane teroongnya mompamulamo metuvu.
29 Sima heꞌua valii,
siꞌemiu valii kana moꞌotoi sedeꞌi maꞌopo teUnga nuManusia kana majaok,
watu siꞌemiu meꞌita tegauk-gauk heꞌua majari.
30 Tutuunya Siaꞌu nonjarita eisiꞌemiu,
tetoo-too sanu netuvu eleo eini jiompo maate jojoo jijiompo jojoo tegauk heꞌua majari.
31 Telangit ane tejuniaa motouk tapi tejaritaꞌU jio umai nabalik seende-endenya.”
Paꞌajaga-jaga Teꞌajajaok NiYesus
(Mat. 24:36-44)
32 SiYesus nonarusa tejarita-Nya,
“Jio umai sotoo moꞌotoi teeleo atau tejaang nuꞌajajaokU.
Temalaekat-malaekat eisuruga ane Siaꞌu,
teUnga nuꞌAlataꞌala,
jio moꞌotoi valii,
boi SiamaꞌU sanu moꞌotoi.
33 Karna heꞌua paꞌasasadia molaboti teꞌajajaokU,
ane paꞌajaga-jaga,
karna siꞌemiu jio moꞌotoi siambengi tewatunya Siaꞌu majaok.
34 Watu Siaꞌu majaok,
tegauk heꞌua sima tesapa sanu majari watu sotoo nakaya nelampa nelinjoꞌi tevonuanya.
Jijiompo siia melengkat,
siia nombee tepokarajaaong eivotuang-votuangnya mongurus tevonuanya,
ane siia nongulara eitoponjaga nubamba tatarus monjagai molaboti teꞌajajaoknya.
35 Karna heꞌua,
paꞌajaga-jaga molaboti teꞌajajaokU,
karna siꞌemiu jio moꞌotoi siambengi tetoguvonua majaok.
Laboi siia majaok beimbengi atau matanga ndoung atau mantieleo atau titieleo.
36 Paꞌajaga-jaga antau watu Siaꞌu jio inototoi majaok,
inyaa siꞌemiu boi neteꞌoturu.
37 Tesapa sanu inularaꞌU eisiꞌemiu,
inularaꞌU eijojoo tetoo,
‘Paꞌajaga-jaga metaang teꞌajajaokU!’ ”