SiYesus Nogurapang Eitoo-too Sanu Jio Seilu EiSiia
(Mat. 21:33-46; Luk. 20:9-19)
12
1 Lamai heꞌua siYesus nompamula nonjaritaa tepogurapanong eitopomimpin-topomimpin tetoo-too nuYahudi,
“Luulumai umai sotoo sanu nonuda teꞌanggur eijoꞌong ane nonondok eipapalitnya.
Siia nogutu tevolo tepomojotong teꞌanggur,
ane nombaung teponjagaong sanu mapangkat.
Lamai heꞌua siia concoono lasiatoo tetopokarajaa nogutu tejanji,
nopotilal tepaꞌalaa nujoꞌong nuꞌanggur heꞌua,
lamai heꞌua umaꞌo eikota ntaninya.
2 Najaoko tewatunya nelolu,
siia nonuju sotoo tevotuang eitopokarajaa-topokarajaa heꞌua nongincona lamai siira setilalong lamai tepaꞌala nujoꞌong nuꞌanggur heꞌua.
3 Tapi siira neraꞌop tevotuang heꞌua ane nomboboginya,
lamai heꞌua nonuju siia umaꞌo telima nokosongb.
4 Tetogujoꞌong heꞌua nonujuonye tevotuang sanu ntaninya eisiira.
Tapi tevotuang heꞌua binobogi niira jaok napaꞌitong eivaꞌinya ane siira nopeꞌesili tevotuang heꞌua.
5 Lamai heꞌua tetogujoꞌong heꞌua nonujuonye tevotuang sanu ntaninya,
ane tetoo eini pinatei niira.
Sima heꞌua nengkaning-kaning sanu vavaliimai,
umai sanu binobogi ane umai valii sanu pinatei niira.
6 Ulengi umai sotoo valii eitogujoꞌong,
teunga sanu inagalaninya.
Ponouꞌongnya siia nonujunya eisiira ane nonjarita,
“Teungaꞌu kana noꞌobulea niira.”
7 Tapi tetopokarajaa-topokarajaa heꞌua nejajaritaong,
‘Majaok teunganya,
siia sanu monarima teharta nutosiaꞌang.
Maemo,
siꞌita momate siia,
antau tehartanya majari teharta niꞌita.’
8 Heꞌuapa siira neraꞌop ane nomate siia,
lamai heꞌua irampakaꞌonya nesuvung lamai tejoꞌong heꞌua.”
9 SiYesus noꞌutanya eitopomimpin-topomimpin tetoo-too nuYahudi,
“Tesapa sanu nogauka nutogujoꞌong heꞌua?
Siia kana majaok ane momatei tetopokarajaa-topokarajaa heꞌua.
Lamai heꞌua momarcayaꞌonya tejoꞌong nuꞌanggur heꞌua eitopokarajaa-topokarajaa sanu ntaninya.
10 Siꞌemiu jio nombasa teBuku sanu Mapacing,
‘Tevatu sanu irampaka nutopogutu tevonua,
najarimo tevatu eipasunya.c
11 Lamai teSiopu tegauk eini najari,
ane tegauk heꞌua neherang inita!’ ”
12 Lamai heꞌua siira nongusaha meraꞌop siYesus,
karna siira moꞌotoi siYesus nonjaritaaꞌmo tepogurapanong sima siira.
Tapi siira nobule eipeinconong nutoo heꞌua.
Siira nolinjoꞌi Siia ane umaꞌomo.
Tetopomimpin-topomimpin NuYahudi Noꞌutanya EisiYesus Sima Mombayar Teasel EisiKaisar
(Mat. 22:15-22; Luk. 20:20-26)
13 Vavalii seeleo tetopomimpin-topomimpin nuYahudi nonuju lasiatoo tetoo nuVarisi sanu opondapat mombayar teasel eisiKaisar masala ane lasiatoo niHerodes sanu nosituruk tepombayarong teasel eisiKaisar.
Siira tinuju monyoꞌarai mogutu siYesus monjarita masala antau siYesus maala nosangka.
14 Siira najaok eiSiia ane nonjarita,
“Guru,
siꞌami moꞌotoi Siꞌoo tetoo sanu mondolong.
Siꞌoo mongulara tesapa sanu tutuu ane jio nobule tesapa sanu inulara nutoo ntaninya,
karna Siꞌoo jio monyabataa tetoo sanu opangka.
Tapi Siꞌoo mondolong momagurua simamo teꞌeseseilu nuꞌAlataꞌala.
Monurut teꞌaturan nuꞌagama niꞌita,
maala siꞌita mombayar teasel eisiKaisar,
atau jio?
Kanaboi siꞌita mombayar atau jio?”
15 Tapi siYesus moꞌotoi siira mombosi eivivi tapi majaat eilalong nuambok,
ane Siia nonjarita eisiira,
“Neteꞌuya siꞌemiu nonyoꞌarai Siaꞌu?
Omung menekai eiSiaꞌu somboꞌa tedinar antau Siaꞌu mongitanya.”
16 Lamai heꞌua siira nongomung tedinar heꞌua,
ane siYesus noꞌutanya eisiira,
“Tegambar ane tetope nisee eini?”
Siira nonyimbat,
“Tegambar ane tetope niKaisar.”
17 Lamai heꞌua siYesus nongular eisiira,
“Ane sima heꞌua,
veena eisiKaisar sanu masipato noveena eisiKaisar,
veena eiꞌAlataꞌala sanu masipato noveena eiꞌAlataꞌala!”
Siira neherang tutuu neꞌeepe siYesus.
Tepoꞌutanya Tetoo-too NuSaduki Sima Tepeetuvuonye
(Mat. 22:23-33; Luk. 20:27-40)
18 Lamai heꞌua najaok eisiYesus lasiatoo tetoo nuSaduki sanu nomarcaya jio metuvuonye tetoo sanu naatemo.
Siira noꞌutanya eisiYesus,
19 “Guru,
luulu siMusa nonulisa,
‘Ane sotoo telangkai,
maate ane molinjoꞌi telapi bengkel tapi jio ounga,
terurus nutoo heꞌua kanaboi molapi tetimbala heꞌua ane mombee teunga eirurus sanu maate heꞌua.’
20 Umai pitutoo sorurus.
Sanu pabibia nolapi sotoo tebengkel ane naate jio umai ounga.
21 Lamai heꞌua sanu ororuaaꞌonya nolapi siia ane naate jio umai ounga.
Sima heꞌua valii sanu ototoluaꞌonya,
22 jaok epepituaꞌonya---siira nolapi tebengkel heꞌua jio umai ounga.
Ponouꞌongnya tebengkel heꞌua naate.
23 Eieleo peetuvuonye,
watu siira netuvuonye,
sisee sanu majari telapi nubengkel heꞌua?
Karna pitutoo heꞌua nolapimo siia.”
24 SiYesus nonyimbat eisiira,
“Siꞌemiu nasala,
karna siꞌemiu jio moꞌotoi teBuku sanu Mapacing atau teꞌuig nuꞌAlataꞌala.
25 Karna watu siira netuvu lamai teꞌamateong,
siira jio molapi ane jio nopopolapi tapi metuvu sima temalaekat-malaekat nuꞌAlataꞌala eisuruga sanu jio molapi.
26 Vavalii sima tepeetuvuonye nutoo-too sanu naate.
Momikironye sima sanu binasai niꞌemiu eilalong nubuku niMusa sanu nongulara sima tevumbu nurui sanu nevaa.
Iamaꞌo teꞌAlataꞌala nonjarita eisiMusa,
‘Siaꞌu teꞌAlataꞌala sanu sinomba niꞌAbraham,
niꞌIshak ane niYakubd!’
27 Siia jio teꞌAlataꞌala sanu sinomba nutoo-too sanu naate,
tapi teꞌAlataꞌala sanu sinomba nutoo-too sanu netuvu!
Siꞌemiu tututuu nasala!”
Teparenta Sanu Mepenting Tutuu
28 Sotoo teguru nuparenta nuꞌAlataꞌala neꞌeepe siYesus ane tetoo-too nuSaduki nejajaritaong,
ane moꞌotoi siYesus nonyimbat sanu tutuu.
Siia najaok eisiYesus ane noꞌutanya,
“Tesapa teparenta nuꞌAlataꞌala sanu mepenting tutuu lamai jojoo?”
29 SiYesus nonyimbat,
“Eini teparenta sanu mepenting tutuu,
‘Poꞌinepea,
tetoo-too nuꞌIsrael,
teSiopu heꞌua teꞌAlataꞌala niꞌita,
jio umai teSiopu Alataꞌala sanu ntaninya.
30 Agalani teSiopu,
teꞌAlataꞌalamu.
Agalani mepake jojoo teambokmu ane jojoo tenyaamu ane jojoo tepikiranmu ane jojoo teꞌuigmu.’
31 Eini teparenta sanu ororuaaꞌonya,
‘Agalani tetoo-too ntaninya sima teꞌalaemu mboto.’
Jio umai teparenta sanu nelabi mepenting lamai sanu rorua teparenta eini.”
32 Lamai heꞌua teguru nuparenta nuꞌAlataꞌala heꞌua nonjarita eisiYesus,
“Mombosi tutuu,
Guru.
Tutuu sima sanu inular Niꞌoo.
Siia boi sotoo teSiopu,
ane jio umai ntaninya boi Siia.
33 Agalani teꞌAlataꞌala mepake jojoo teambok niꞌita ane jojoo tepikiran niꞌita ane jojoo teꞌuig niꞌita,
ane agalani tetoo-too ntaninya sima siꞌita agalani teꞌalae niꞌita mboto.
Melabi mepenting monggauka heꞌua lamai mombee jojoo tepombee sanu irampunie ane tepombee ntaninya!”
34 SiYesus moꞌotoi siia mapande nonyimbat.
SiYesus nonjarita eisiia,
“Siꞌoo moꞌosuk majari tetoo eilalong nuPomarenta nuꞌAlataꞌala!”
Lamai heꞌua,
jio umai sotoo nabarani noꞌutanyaonye eisiYesus.
SiYesus Noꞌutanya Sima Tebija NuPuang SiDaud
(Mat. 22:41-46; Luk. 20:41-44)
35 Watu siYesus nomaguru eipeinconong nutoo eitutumbalong nuVonua nuꞌAlataꞌala,
Siia noꞌutanya,
“Iamaꞌo teguru-guru nuparenta nuꞌAlataꞌala nongulara teKristusf heꞌua tebija niDaud?
36 SiDaud mboto pinimpin nuꞌAlus nuꞌAlataꞌala nonjarita,
‘TeSiopu Alataꞌala nonjaritamo eiSiopuꞌu,
“Pongodung eisabata teꞌoanongU,
jaok temusu-musu-Mu Uꞌembea eiangkop nupaa-Mu.” ’
37 SiDaud mboto nonope teKristus ‘Siopu’,
iamaꞌo valii Siia tebija niDaud?”
Tepeinconong nutoo bari masanang neꞌeepe Siia.
SiYesus Nolambota Inyaa Monuruꞌi Teguru-guru Nuhukum NuꞌAlataꞌala
(Mat. 23:5-7; Luk. 20:45-47)
38 Watu siYesus nomaguru,
Siia nonjarita,
“Paꞌajaga-jaga eiguru-guru nuparenta nuꞌAlataꞌala.
Inyaa monuruꞌi tegauk niira.
Siira seilu lalampa nepake tebaju melenda ane seilu noꞌongkoi eipasar.
39 Siira seilu mongodung eipongodunong sanu mombosi tutuu eipongganeong-pongganeong nuYahudi ane tepongodunong sanu eitolonya eilalong nupesta.
40 Siira mongakal jaok mongala tevonua nutimbala-timbala ane siira mongulara tegane-gane sanu meende antau nonyoyoka tegauk niira sanu majaat.
Siira kana maꞌaala teꞌasesesa lamai teꞌAlataꞌala sanu nelabi movoat.”
Tepombee NuTimbala Sanu Nopukur
(Luk. 21:1-4)
41 Vavalii seeleo siYesus nongodung nopotolo eipeti pongembeong ane nongingitai iamaꞌo tetoo-too nongembea tedoi eilalong nupeti heꞌua.
Nabari tetoo sanu nakaya nongembea mabari tedoi.
42 Lamai heꞌua sotoo tetimbala sanu nopukur najaok ane nentamaa romboꞌa tedoig,
terekenongnya sanu nedeꞌi tutuu.
43 Lamai heꞌua siYesus noleva temurit-murit-Nya ane nonjarita eisiira,
“Tutuunya Siaꞌu nonjarita eisiꞌemiu,
tetimbala nopukur heꞌua nombeena sanu mabari eilalong nupeti pongembeong heꞌua heꞌuapa jojoo tetoo ntaninya.
44 Karna siira jojoo nombeena tetilal nedeꞌi lamai teꞌakakaya niira.
Tapi tetimbala heꞌua nombeena jojoo tehartanya,
jojoo sanu pinarluuaꞌonya eiꞌotutuvunya.”