SiYesus Nentama EiYerusalem
(Mat. 21:1-9; Luk. 19:28-38; Yoh. 12:12-15)
11
1 Watu siYesus concoono temurit-murit-Nya nongosuꞌi teYerusalem,
moꞌosuk teKampung nuBetvage ane nuBetania eiBuut nuSaitun,
siYesus nontuuna rotoo temurit-Nya,
2 “Naꞌomo eikampung sanu notoloi niꞌemiu.
Watu siꞌemiu mentama siꞌemiu netepojaok sambaang tekeledai inotoa eierii teꞌarorongnya.
Tekeledai heꞌua molumbi ane jiompo sotoo mesaveinya.
Buꞌasa teꞌarorongnya ane omung menekai.
3 Ane sotoo moꞌutanya eisiꞌemiu,
‘Neteꞌuya siꞌemiu monggauka heꞌua?’
Ulara eisiia,
‘Siopu niꞌami momarluua eini ane Siia selengaan monencilea vavalii.’ ”
4 Siira umaꞌo ane naꞌajaok sambaang tekeledai eijalang inotoa eierii teꞌarorongnya moꞌosuk tebamba nuvonua.
Siira nombuꞌasa teꞌarorongnya.
5 Lasiatoo sanu neꞌoro eiriꞌua noꞌutanya eisiira,
“Mongkuya siꞌemiu?
Neteꞌuya siꞌemiu nombuꞌasa teꞌarorong nukeledai heꞌua?”
6 Temurit-murit-Nya nonyimbat sima sanu inularaꞌomo niYesus,
‘Siopu niꞌami momarluua eini ane Siia selengaan monencilea vavalii’.
Lamai heꞌua tetoo-too heꞌua nomatuvaya siira nongala tekeledai heꞌua.
7 Lamai heꞌua siira nongomung tekeledai sanu nolumbi heꞌua eisiYesus,
ane nongembeaꞌonya tenaus niira eiteꞌenya,
ane siYesus nesave eikeledai heꞌua.
8 Nabari tetoo nomipira tenaus niira eijalang,
umai sanggaat sanu nongambura tepapanga sanu oroongnya lamai tejoꞌong ane nongembea eijalang antau noongkoi.
9 Tetoo-too sanu nelampa eitolo ane eiteꞌe niYesus neroroa,
“Nomuji teꞌAlataꞌala!
TeꞌAlataꞌala mombarakai Siia sanu najaok.
Siia umai teꞌababaraka nuSiopu.
10 TeꞌAlataꞌala mombarakai tepomarenta-Nya.
Siia momarenta simamo tekakai niꞌita luulu,
tepuang siDaud.
Nomuji teꞌAlataꞌala eilalong nusuruga!”
11 Najaok eiYerusalem,
siYesus nentama eiVonua nuꞌAlataꞌala.
Eiriꞌua Siia nengingitai jojoo.
Tapi karna teeleo nondoungo,
Siia nesuvung lamai teYerusalem ane umaꞌo eiKampung nuBetania concoono sompulu rotoo temurit-Nya.
SiYesus Nongutuk Tepuu Nuꞌara
(Mat. 21:18-19)
12 Modondongnyamai,
watu siYesus concoono temurit-murit-Nya nolinjoꞌi teKampung nuBetania,
siYesus noorok teꞌompong-Nya.
13 Lamai maavar Siia neꞌita sompuung tepuu nuꞌara sanu oroongnya.
Siia nongosuꞌi tepuu heꞌua nelolo tevua nuꞌara.
Tapi watu Siia najaok eiriꞌua,
Siia jio naꞌaala tesapa-sapa,
boi teroongnya,
jio umai ovua,
karna jiompo tewatunya nevua.
14 SiYesus nonjarita eipuu heꞌua,
“Jiongo sotoo nenginang tevuamu seende-endenya!
Siꞌoo jiongo mevua.”
Temurit-murit-Nya neꞌeepe tesapa sanu inulara.
SiYesus Nombugo Tetopobabaluk Lamai TeVonua NuꞌAlataꞌala
(Mat. 21:12-13; Luk. 19:45-48; Yoh. 2:13-16)
15 Lamai heꞌua siYesus concoono temurit-murit-Nya najaok eiYerusalem.
Touk nentama eitutumbalong nuVonua nuꞌAlataꞌala,
siYesus nompamulamo nombugo tetoo-too sanu pepees nobabaluk ane nongoli eiriꞌua.
Siia valii nolengana temeja-meja nupemombolosong tedoia ane tepongodunong nutopobabaluk temerpatib.
16 Siia jio nombeena tetoo-too nongomung tesasagara nalabat eitutumbalong nuVonua nuꞌAlataꞌala.
17 Lamai heꞌua Siia nomaguru tetoo-too eiriꞌua.
Siia nongular,
“Umai sanu netetulis eilalong nuBuku sanu Mapacing,
‘TeVonuaꞌU kana notope tevonua nupongganeong nujojoo tebangsa.’
Tapi siꞌemiu eini nonjariaꞌomo heꞌua tepomoiaong nonipu tetoo-too!”
18 Teꞌolongian-olongian nuꞌimam ane teguru-guru nuparenta nuꞌAlataꞌala neꞌeepe sanu inular niYesus heꞌua,
ane siira nelolo teꞌakal antau maala momate siYesus,
karna siira nobule eiSiia.
Siira nobule karna jojoo tepeinconong nutoo heꞌua masanang neꞌeepe tepangajar-Nya.
19 Watu beimbengimo moꞌosuk mondoung,
siira nesuvungonye lamai tekota heꞌua.
Tepuu Nuꞌara Sanu Notuugo Ane Tenasihat NiYesus Sima Tegane
(Mat. 21:20-22)
20 Vavalii titieleo siYesus concoono temurit-murit-Nya umaꞌo eiYerusalem,
siira neꞌita tepuu nuꞌara sanu kinutuk ceivengi heꞌua.
Tepuu heꞌua notuugo jaok eirarinya.
21 SiPetrus nolambot sanu jinaritaa niYesus eivengi eipuu heꞌua.
Siia nonjarita eisiYesus,
“Guru,
itaipo,
tepuu nuꞌara sanu kinutuk Niꞌoo notuugo.”
22 SiYesus nonyimbat eisiira,
“Pomarcaya eiꞌAlataꞌala.
23 Tutuunya Siaꞌu nonjarita eisiꞌemiu,
sisee-see momarenta tebuut eini,
‘Neteengkat ane neterampak eilalong nudagat!’
Ane jio mabata-bata eilalong nuamboknya,
tapi momarcaya tegauk heꞌua kana majari,
tegauk sanu pinarentaꞌonya kana majari.
24 Karna heꞌua Uulara eisiꞌemiu,
tesapa sanu nopomongi watu monggane,
pomarcaya siꞌemiu nonarimamo,
lamai heꞌua siꞌemiu noveena heꞌua.
25 Watu siꞌemiu mongganed eiꞌAlataꞌala,
mongampuni tetoo-too sanu odosa eisiꞌemiu,
antau Siama niꞌemiu eisuruga valii mongampuni tedosa niꞌemiu.” [
26 Tapi,
ane siꞌemiu jio mongampuni tetoo ntaninya,
Siama niꞌemiu eisuruga valii jio mongampuni siꞌemiu.]
Tepoꞌutanya Sima Tekuasa NiYesus
(Mat. 21:23-27; Luk. 20:1-8)
27 Lamai heꞌua siYesus concoono temurit-murit-Nya najaokonye eiYerusalem.
Watu siYesus nelampa eitutumbalong nuVonua nuꞌAlataꞌala,
teꞌolongian-olongian nuꞌimam ane teguru-guru nuparenta nuꞌAlataꞌala ane tetopomimpin-topomimpin nutoo-too nuYahudi najaok eisiYesus.
28 Siira noꞌutanya eiSiia,
“Nepake tekuasa nisee Siꞌoo nonggauka tegauk-gauk heꞌuae?
Sisee sanu nombeena tekuasa heꞌua eiSiꞌoo?”
29 Nonyimbat siYesus eisiira,
“Siaꞌu kana mombeena tepoꞌutanya eisiꞌemiu.
Ane siꞌemiu monyimbat Siaꞌu,
Siaꞌu kana mongulara eisiꞌemiu nepake tekuasa nisee Siaꞌu nonggauka tegauk-gauk heꞌua.
30 Sisee sanu nombee siYohanes tekuasa nombaptis,
teꞌAlataꞌala atau temanusia?
Simbati Siaꞌu!”
31 Siira nejajaritaong tepoꞌutanya niYesus.
Siira nonjarita,
“Ane siꞌita mongulara,
‘Lamai tesuruga,’
Siia kana nonjarita,
‘Ane sima heꞌua,
neteꞌuya siꞌemiu jio nomarcaya eisiYohanes?’
32 Tapi,
mosusa siꞌita mongulara,
‘lamai temanusia!’ ”
Siira nobule eitoo mabari,
karna jojoo tetoo nomarcaya siYohanes tututuu sotoo tenabi.
33 Lamai heꞌua siira nonyimbat siYesus,
“Siꞌami jio moꞌotoi sisee nombee siYohanes tekuasa.”
SiYesus nonjarita eisiira,
“Ane sima heꞌua,
Siaꞌu valii jio mongulara eisiꞌemiu nepake tekuasa nisee Siaꞌu nonggauka tegauk-gauk heꞌua.”