Tegagaatong
(Mat. 19:1-9)
10
1 SiYesus nelengkat lamai riꞌua umaꞌo eiTana nuYudea ane eitana nusantava nuBangkalang nuYordan.
Tetoo nabari najaok neincongonye eipapalit Siia.
Sima biasa Siia nomaguruonye siira.
2 Lamai heꞌua najaok tetoo-too nuVarisi,
ane monyoꞌarai mogutu siYesus monggauka teꞌasasala,
siira noꞌutanya eiSiia,
“Maala sotoo langkai monggaata telapinya?”
3 Tapi sinimbati-Nya eisiira,
“Tesapa teparenta vineena niMusa eisiꞌemiu?”
4 Nonyimbat siira,
“SiMusa nombeena teꞌisin nonggaataꞌonya,
tapi siia kanaboi nogutu tesura magaat.”
5 Lamai heꞌua nongular siYesus eisiira,
“SiMusa nonulisa teparenta eini eisiꞌemiu,
karna teambokmu maꞌadal.
6 Tapi watu teꞌAlataꞌala nopaꞌajari tejuniaa,
Siia nopaꞌajari telangkai ane tebengkel.
7 Karna heꞌua telangkai kana molinjoꞌi siamanya ane siinanya ane nosoincong concoono telapinya,
8 rotooaꞌonya majari sima sotoo.
Karna heꞌua siira jio rotoo,
tapi sotoo.
9 Karna heꞌua,
tesapa sanu pinosolibok nuꞌAlataꞌala,
inyaa nogaata numanusia.”
10 Watu siira najaoko eiVonua,
temurit-murit heꞌua noꞌutanyaonye eisiYesus sima tegagaatong.
11 Inular-Nya eisiira,
“Sisee-see sanu monggaata telapinya bengkel,
ane molapi tebengkel ntaninya,
siia monyaapi eilapinya sanu pabibia.
12 Ane telapi bengkel monggaata telapinya langkai ane nopolapi nulangkai sanu ntaninya,
siia monyaapi.”
SiYesus Nombarakai Teunga-unga
(Mat. 19:13-15; Luk. 18:15-17)
13 Lamai heꞌua lasiatoo nongomung teunga-unga medeꞌi eisiYesus,
antau Siia monggama ane mombarakai siira;
tapi temurit-murit-Nya nonyimang tetoo-too heꞌua.
14 Watu siYesus neꞌita tegauk heꞌua Siia nongoungkul ane nongular eisiira,
“Patuvaya teunga-unga heꞌua najaok eiSiaꞌu.
Inyaa mongompoti siira,
karna tetoo-too sima teunga-unga eini sanu majari tetoo-too nuꞌAlataꞌala eilalong nupomarenta-Nya.
15 Tutuunya Siaꞌu nonjarita eisiꞌemiu,
sisee-see jio monuruk teꞌAlataꞌala sima teunga sanu medeꞌi,
siia jio maala majari tetoo eilalong nupomarenta-Nya.”
16 Lamai heꞌua sotoo mai sotoo Siia nongambing teunga-unga heꞌua ane pepees nongembea telima-Nya eibabok nuvaꞌi niira,
Siia nombarakai siira.
Tetoo Nakaya Nandasa Nentama TePomarenta NuꞌAlataꞌala
(Mat. 19:16-26; Luk. 18:18-27)
17 Watu siYesus nonarusa tepelampa-Nya,
sotoo nelinjok najaok eiSiia ane nopotuꞌu eitolo-Nya ane siia noꞌutanya,
“Guru sanu mombosi,
tesapa sanu ugauka antau maꞌaala teꞌotutuvu sanu seende-endenya eisuruga?”
18 Nonyimbat siYesus,
“Neteꞌuya inulara niꞌoo Siaꞌu mombosi?
Jio sotoo sanu mombosi,
boi teꞌAlataꞌala mboto.
19 Siꞌoo moꞌotoi teparenta-parenta nuꞌAlataꞌala,
‘Inyaa momate,
inyaa monyaapi,
inyaa mongangga,
inyaa molampoa watu monyabii,
inyaa monipu,
oongkoi siamamu ane siinamu!’ ”
20 Lamai heꞌua inular nutoo eiSiia,
“Guru,
siaꞌu nonuruꞌi jojoo teparenta heꞌua lamai watu siaꞌu ulengi molumbi.”
21 SiYesus neꞌita siia ane nongagalani,
lamai heꞌua nonjarita eisiia,
“Boi ulengi sangaya sanu nokurang eisiꞌoo.
Naꞌomo,
pobaluko jojoo tehartamu ane veena heꞌua eitoo-too sanu mopukur.
Ane sima heꞌua siꞌoo maꞌaala teharta eisuruga.
Lamai heꞌua pajaok menekai ane pajari tetoponuutU.”
22 Neꞌeepe tejarita heꞌua nokurang teamboknya,
lamai heꞌua siia umaꞌo ane noondong,
karna nabari tehartanya.
23 Lamai heꞌua siYesus nongingita temurit-murit-Nya eipapalit-Nya ane nonjarita eisiira,
“Nosusa tutuu tetoo sanu makaya mentama eilalong nuPomarenta nuꞌAlataꞌala.”
24 Temurit-murit-Nya neherang neꞌeepe tejarita-Nya heꞌua.
Tapi siYesus nonjaritaonye,
“Teunga-ungaꞌU,
nosusa tutuu heꞌua mentama eilalong nuPomarenta nuꞌAlataꞌala.
25 Nagampang sambaang teꞌunta mentama telulu nujaru,
heꞌuapa sotoo sanu nakaya mentama eilalong nuPomarenta nuꞌAlataꞌala.”
26 Siira nelabi neherang ane neꞌuꞌutanyaong,
“Ane sima heꞌua,
sisee sanu maala nosalamataꞌonya?”
27 SiYesus nongingita siira ane nonjarita,
“Temanusia jio maala monyalamata teꞌalaenya mboto,
tapi teꞌAlataꞌala maala monyalamata siira,
karna Siia maala monggauka jojoo.”
28 Lamai heꞌua siPetrus nonjarita eisiYesus,
“Siꞌami eini nolinjoꞌimo jojoo ane nonuuto Siꞌoo!”
29 Nonyimbat siYesus,
“Tutuunya Siaꞌu nonjarita eisiꞌemiu,
tetoo sanu molinjoꞌi tevonuanya,
atau tesisiaꞌanya,
atau tetutuainya,
atau siinanya,
atau siamanya,
atau teunga-unganya,
atau tejoꞌongnya karna monuut Siaꞌu ane karna momarcaya teKareva sanu Mombosi,
30 tetoo heꞌua eiwatu eini monarima sagatusngkaning teꞌababarinya tevonua,
tesiaꞌa,
tetuai,
tesiina,
teunga ane tejoꞌong,
maampo nopaꞌasesa nutoo,
ane tewatu totoloi siia monarima teꞌotutuvu sanu seende-endenya.
31 Tapi nabari tetomooge majari tetoo biasa ane tetoo biasa majari tetomooge.”
Tepongular Sanu Otolungkaninaꞌonya Sima Teꞌasesesa NiYesus
(Mat. 20:17-19; Luk. 18:31-34)
32 SiYesus ane temurit-murit-Nya pepees eilalong nupelampa umaꞌo eiYerusalem ane siYesus nelampa eitolo.
Temurit-murit niYesus neherang ane tetoo-too sanu nonuut Siia pupuri valii nobule.
Sangkaningonye siYesus noleva sompulu rotoo temurit-Nya ane Siia nompamula nongulara eisiira tesapa sanu kana majari eiꞌalae-Nya mboto,
33 “Nyapoeini siꞌita umaꞌo eiYerusalem ane teUnga nuManusia kana noveena eiꞌolongian-olongian nuꞌimam ane teguru-guru nuparenta nuꞌAlataꞌala.
Siira kana monantua mohukum Siia maate.
Lamai heꞌua siira mombeena Siia eitoo-too sanu jio tetoo nuYahudi,
34 ane siira mopeꞌesili,
monyuui,
monyambook,
ane momate Siia,
tapi notouk tolueleo Siia kana metuvu lamai teꞌamateong.”
Tepomongiong NiYakobus Ane NiYohanes
Jio Momarenta Tapi Mondulu
(Mat. 20:20-28)
35 Lamai heꞌua siYakobus ane siYohanes,
teunga-unga niSebedeus,
nongosuꞌi siYesus ane nonjarita eiSiia,
“Guru,
siꞌami seilu Siꞌoo monggauka tesapa sanu nopomongi niꞌami!”
36 Sinimbati-Nya eisiira,
“Tesapa sanu seilu niꞌemiu Ugauka eisiꞌemiu?”
37 Siira nongular,
“Patuvaya siꞌami okuasa ane mongodung concoono Siꞌoo watu Siꞌoo momarenta ane nopopoꞌitaa teꞌababaraka.
Patuvaya sotoo mongodung eisabata nuꞌoanong Niꞌoo ane sotoo eisabata nuꞌoigi Niꞌoo.”
38 Tapi inular niYesus eisiira,
“Siꞌemiu jio moꞌotoi tesapa sanu pinomongi niꞌemiu.
Maala siꞌemiu masesa concoono Siaꞌu,
sima siꞌita menginung teꞌasesesa lamai tecawan sanu selilio?
Maala siꞌemiu masesa concoono Siaꞌu,
sima nobaptis nuꞌasesesa sanu kana Utarima?”a
39 Nonyimbat siira,
“Siꞌami maala.”
SiYesus nonjarita eisiira,
“Tutuu,
siꞌemiu kana menginung lamai tecawan nuꞌasesesa sanu kana Uinung ane nobaptis nuꞌasesesa sanu kana Utarima.
40 Tapi Siaꞌu jio maala monantua sisee sanu mongodung eisabata nuꞌoanongU ane sabata nuꞌoigiꞌU.
TeꞌAlataꞌala kana monantua sisee sanu mongodung eisabata nuꞌoanongU ane sabata nuꞌoigiꞌU.”
41 Watu neꞌeepe tepomongiong niYakobus ane niYohanes heꞌua sompulutoo temurit sanu ntaninya najari nongoungkul eisiira.
42 SiYesus noleva siira ane nonjarita,
“Siꞌemiu moꞌotoi siira sanu inakui sima tetopomarenta nubangsa-bangsa nomarentaa makasar sima tepuang eibabok nurayatnya.
Tetomooge-tomooge sanu opangka nonggauka tekuasa eibabok niira.
43 Jio sima heꞌua eiolot niꞌemiu.
Sisee-see seilu majari tetomooge eiolot niꞌemiu,
siia kanaboi majari tevotuang niꞌemiu.
44 Sisee-see seilu majari tetopomimpin eiolot niꞌemiu,
siia kanaboi majari tevotuang nutoo jojoo.
45 Karna teUnga nuManusia valii jio najaok antau nopiara,
tapi momiara ane mombeena teꞌalae-Nya nopatei majari pombolos tetoo bari.”
SiYesus Nepeꞌeondok Temata NiBartimeus Sanu Nobuta
(Mat. 20:29-34; Luk. 18:35-43)
46 SiYesus concoono temurit-murit-Nya najaoko eiKota nuYerikho.
Watu Siia nesuvung lamai teYerikho concoono temurit-murit-Nya ane too bari sanu netuntuutong,
umai sotoo tetopomongi-mongi sanu nobuta,
tetopenya siBartimeus,
teunga niTimeus,
nongodung eipipit nujalang.
47 Watu siia neꞌeepe siYesus tetoo nuNasaret noꞌosuk,
nompamulamo siia neroroa,
“Yesus,
tebija niDaud,
agalani aasi siaꞌu!”
48 Nabari tetoo nonyimangnya antau siia mopoodoy.
Tapi nelabi noporos siia neroroa,
“Tebija niDaud,
agalani aasi siaꞌu!”
49 SiYesus nengondok ane nonjarita,
“Levai siia!”
Siira noleva tetoo sanu nobuta heꞌua ane nonjarita eisiia,
“Paꞌasanang teambok Niꞌoo,
peꞌoro,
Siia noleva siꞌoo.”
50 Tetoo sanu nobuta heꞌua nolapasa tenausnya,
lamai heꞌua selengaan neꞌoro ane umaꞌo eisiYesus.
51 SiYesus noꞌutanya eisiia,
“Tesapa sanu seilumu Ugauka eisiꞌoo?”
Nonyimbat tetoo nobuta heꞌua,
“Guru,
siaꞌu seilu meꞌita!”
52 Lamai heꞌua siYesus nongular eisiia,
“Naꞌomo,
karna siꞌoo nomarcaya,
siꞌoo pineꞌeondok!”
Watu heꞌua siia selengaan neꞌita,
lamai heꞌua siia nonuuto siYesus eilalong nupelampa-Nya.