9
1 Inular-Nya eisiira,
“Tutuunya Siaꞌu nonjarita eisiꞌemiu,
eiolot nutoo-too sanu umai eiriꞌini umai sanu jio maate jiompo siira neꞌita tePomarenta nuꞌAlataꞌala najaok mepake teꞌababaraka.”
Telio NiYesus Nabalik Eibabok Nubuut
(Mat. 17:1-13; Luk. 9:28-36)
2 Touk onoeleo lamai heꞌua siYesus noleva siPetrus,
siYakobus ane siYohanes ane concoono siira Siia nolalaꞌe eibuut sanu mapangkat.
Eiriꞌua siira apatoo boi.
Lamai heꞌua telio niYesus nabalik eitolo niira,
3 ane tepakean-Nya memeas tutuu nggugulinapong.
Jio umai sotoo sanu monjaria tepakean memeas eijuniaa eini sanu maala momeasa tepakean sima heꞌua.
4 Lamai heꞌua temurit-murit neꞌita siNabi Elia concoono siNabi Musa pepees nonjarita concoono siYesus.
5 SiPetrus nongular eisiYesus,
“Guru,
mombosi tutuu siꞌami umai eiriꞌini.
Patuvaya siꞌami mongoroa tolusinarung,
sesinarung eiSiꞌoo,
sesinarung eisiMusa ane sesinarung eisiElia.”
6 SiPetrus jio moꞌotoi tesapa sanu noularaꞌonya,
karna siira nobubuleong.
7 Lamai heꞌua teruꞌong nemboluni siira ane lamai eilalong nuruꞌong heꞌua inepe tesuara nuꞌAlataꞌala,
“Einimo teUngaꞌU sanu Uꞌagalani,
poꞌinepea Siia.”
8 Watu neꞌita papalit,
jio inototoi,
siira jio neꞌita sotoo concoono siira,
boi simotoo niYesus.
9 Watu siira nenyau lamai tebuut heꞌua,
siYesus nontuuna eisiira,
“Inyaa nonjaritaa eisisee tesapa sanu papaꞌali initamo niꞌemiu,
jijiompo teUnga nuManusia netuvuonye lamai teꞌamateong.”
10 Siira nonuruꞌi tetutuunong heꞌua ane neꞌuꞌutanyaong tesapa sanu minaksut niYesus,
nongular,
“netuvuonye lamai teꞌamateong?”
11 Lamai heꞌua siira noꞌutanya eiSiia,
“Neteꞌuya teguru-guru nuparenta nuꞌAlataꞌala nongulara siNabi Elia kanaboi majaok eijuniaa jijiompo tepuang sanu tinuju nuꞌAlataꞌala mopaꞌasalamat tetoo-too?”
12 Nonyimbat siYesus,
“Tutuu,
siElia kanaboi majaok pabibia ane membombosiongonye jojoo.
Iamaꞌo sanu umai netetulis sima teUnga nuManusia?
Neteꞌuya Siia kana mabari masesa ane noꞌajaati?
13 Tapi Siaꞌu nonjarita eisiꞌemiu,
siElia najaoko ane tetoo-too nonggauka eisiia monurut teꞌeseseilu niira sanu majaat,
selilio sanu umai netetulis eilalong nujarita nuꞌAlataꞌala sima siia.”
SiYesus Nombugo Teꞌalus Sanu Majaat Lamai Sotoo Teunga Sanu Nobobo
(Mat. 17:14-21; Luk. 9:37-43)
14 Watu siYesus,
siPetrus,
siYakobus,
ane siYohanes najaok eimurit-murit ntaninya,
siira neꞌita tetoo nabari neincong eimurit-murit heꞌua,
ane sosoꞌuya teguru nuparenta nuꞌAlataꞌala pepees negiging concoono temurit-murit-Nya.
15 Watu tetoo nabari heꞌua neꞌita siYesus,
siira jojoo neherang ane nelinjok nolaboti Siia.
16 Lamai heꞌua siYesus noꞌutanya eimurit-murit-Nya,
“Tesapa sanu pinegigini niꞌemiu concoono teguru-guru nuhukum nuꞌAlataꞌala?”
17 Nonyimbat sotoo lamai tetoo nabari heꞌua,
“Guru,
teungaꞌu eini uꞌomung eiSiꞌoo,
siia nobobo karna pinentamai nuꞌalus sanu majaat.
18 Watu siia pinentamai nuꞌalus heꞌua,
teꞌalus heꞌua nomautaꞌonya eitana;
lamai heꞌua tenganganya nevuyo,
tengisinya okoit-koit ane teꞌalaenya najari noꞌonjog.
Siaꞌu nomongimo eimurit-murit Niꞌoo,
antau siira nombugo teꞌalus heꞌua,
tapi siira jio maala monggaukaꞌonya.”
19 Lamai heꞌua nongular siYesus eisiira,
“Hee siꞌemiu tetoo-too sanu jio nomarcaya,
maganamo Siaꞌu nomoia concoono siꞌemiu.
Maganamo Siaꞌu masabar eisiꞌemiu.
Omungo teunga heꞌua menekai!”
20 Lamai heꞌua siira nongomungnya eiSiia.
Watu teꞌalus heꞌua neꞌita siYesus,
siia selengaan nonggugura teunga heꞌua,
ane teunga heꞌua pinautaꞌonya eitana ane nonangkaduling,
pepees tenganganya nevuyo.
21 Lamai heꞌua siYesus noꞌutanya eisiama nuunga heꞌua,
“Soꞌuyamo eꞌendenya siia pinentamai?”
Sinimbatinya,
“Lamai watu siia ulengi medeꞌi.
22 Mengkaning-kaning teꞌalus heꞌua nomautaꞌonya eilalong nuapi ane eilalong nuogo nonyoꞌarai momatenya.
Tapi,
ane Siꞌoo maala monggauka tesapa-sapa,
ondoni siꞌami ane tuluni siꞌami.”
23 SiYesus nonyimbat,
“Neteꞌuya inularmu,
‘Ane Siꞌoo maala?’
Jojoo tegauk maala majari eitoo sanu nomarcaya eiSiaꞌu!”
24 Selengaan siama nuunga heꞌua neroroa,
“Siaꞌu nomarcaya!
Tapi tuluni siaꞌu karna teꞌaparcayaongu mokurang.”
25 Watu siYesus neꞌita tetoo nabari najaok neincong,
Siia nonyimang teꞌalus sanu majaat heꞌua,
“Hee siꞌoo teꞌalus sanu nonyabaa tetoo majari nobobo ane nobongol.
Siaꞌu nomarentaa siꞌoo,
pesuvungo lamai teunga eini ane inyaa mentamaonye eisiia!”
26 Lamai heꞌua nesuvungo teꞌalus heꞌua pepees neroroa ane nonggugura tutuu teunga heꞌua.
Teunga heꞌua initanya sima tetoo sanu naate,
karna heꞌua nabari tetoo nonjarita,
“Siia naatemo.”
27 Tapi siYesus nondiit telima nuunga heꞌua ane nombaunaꞌonya,
lamai heꞌua siia neꞌoro.
28 Watu siYesus nentama eiVonua,
jio umai tetoo ntaninya boi temurit-murit-Nya.
Siira noꞌutanya eiSiia,
“Neteꞌuya siꞌami jio maala nombugo teꞌalus sanu majaat heꞌua?”
29 Sinimbati-Nya eisiira,
“Teꞌalus sangaya eini jio maala nobugo boi nobugoi nugane.”
Tepongular Sanu Orongkaninaꞌonya Sima Teꞌasesesa NiYesus
(Mat. 17:22-23; Luk. 9:43-45)
30 SiYesus concoono temurit-murit-Nya nelengkat lamai riꞌua ane nolabati teTana nuGalilea.
SiYesus jio seilu tetoo-too ntaninya moꞌotoi eipaio siira,
31 karna Siia pepees nomaguru temurit-murit-Nya.
Siia nongulara eisiira,
“TeUnga nuManusia kana noveena eilalong nukuasa numanusia,
ane siira momate Siia.
Tapi tolueleo touk Siia nopatei,
Siia metuvuonye lamai teꞌamateong.”
32 Siira jio moꞌotoi tebatua nujarita heꞌua,
tapi nobule noꞌutanya eiSiia.
Ane Seilu Majari Tetomooge, Kanaboi Majari Tevotuang
(Mat. 18:1-5; Luk. 9:46-48)
33 Lamai heꞌua najaoko siYesus concoono temurit-murit-Nya eiKapernaum.
Watu siYesus eilalong nuvonua,
Siia noꞌutanya eimurit-murit-Nya,
“Tesapa sanu jinaritai niꞌemiu eikokua pepees nelampa?”
34 Tapi siira noodoy,
karna eitanga nujalang eikokua siira nebabantaong sima sisee sanu tetomooge eiolot niira.
35 Lamai heꞌua siYesus nongodung ane noleva sompulu rotoo temurit heꞌua.
Inular-Nya eisiira,
“Ane sotoo seilu majari tetomooge,
siia kanaboi majari tevotuang ane mondulu jojoo tetoo.”
36 Lamai heꞌua siYesus nondiit telima sotoo teunga sanu medeꞌi ane inoroaꞌonya eitatanga niira.
Lamai heꞌua Siia negonggol teunga heꞌua ane nonjarita eisiira,
37 “Sisee-see monarima sotoo teunga sima eini karna teunga heꞌua nomarcaya eiSiaꞌu,
tetoo heꞌua monarima Siaꞌu.
Sisee-see monarima Siaꞌu,
jio boi Siaꞌu sanu notarimanya,
tapi teꞌAlataꞌala sanu nonuju Siaꞌu.”
Sisee-see Jio Mongeva Siꞌita Umai Concoono Siꞌita
(Luk. 9:49-50)
38 SiYohanes nongular eisiYesus,
“Guru,
siꞌami neꞌita sotoo nepake teꞌababaraka lamai tetope-Mu nombugo teꞌalus sanu majaat.
Lamai heꞌua siꞌami nolarang siia,
karna siia jio tetagu niꞌita.”
39 Tapi inular niYesus,
“Inyaa siꞌemiu molarang siia!
Karna sotoo sanu mepake teꞌababaraka nutopeꞌU monggauka tegauk sanu mabaraka jio maala selengaan monjajaati Siaꞌu.
40 Sisee-see jio mongeva siꞌita,
siia heꞌua tetagu niꞌita.
41 Tutuunya Siaꞌu nonjarita eisiꞌemiu,
sisee-see mombee siꞌemiu menginung teogo sakaca karna siꞌemiu umai tetoponuut niKristus,
siia monarima tetambo lamai teꞌAlataꞌala.”
Mongeva Jojoo Sanu Monyabaa Siꞌemiu Mogutu Tedosa
Tepogurapanong Sima Teosing
(Mat. 18:6-9; Luk. 17:1-2)
42 “Sisee-see monyabaa mogutu tedosa sotoo lamai teunga-unga medeꞌi eini sanu nomarcaya eiSiaꞌu,
teꞌAlataꞌala mohukum movoat tutuu tetoo heꞌua.
Aginyamo sobua tevatu sanu moogea noꞌotoa eigorogotnya ane norampaka eilalong nudagat.
43 Ane sabata telima niꞌoo monyabaa siꞌoo mogutu tedosa,
ologimo.
Aginyamo siꞌoo mentama otutuvu sanu seende-endenya olima sabata,
heꞌuapa robata telima niꞌoo norampaka eilalong nunaraka,
eilalong nuapi sanu jio maate-ate. [
44 Eipomoiaong heꞌua teule-ulenya jio maate,
ane teapinya jio maate-ate.]
45 Ane sabata tepaa niꞌoo monyabaa siꞌoo mogutu tedosa,
ologimo.
Aginyamo siꞌoo mentama eiꞌotutuvu sanu seende-endenya kingkido,
heꞌuapa robata tepaa niꞌoo norampaka eilalong nunaraka. [
46 Eipomoiaong heꞌua teule-ulenya jio maate,
ane teapi jio maate-ate.]
47 Ane sabata temata niꞌoo monyabaa siꞌoo mogutu tedosa,
suitaꞌomo.
Aginyamo siꞌoo omata sabata mentama eilalong nuPomarenta nuꞌAlataꞌala,
heꞌuapa omata robata norampaka eilalong nunaraka,
48 eipaio teule-ulenya jio maate ane teapinya jio maate-ate.
49 Karna jojoo tetoo kana noosini nuapib.
50 Teosing mombosi tutuu,
tapi ane teosing majari moonggo,
iamaꞌo siꞌemiu mopoꞌoosingonye heꞌua?
Siꞌemiu kanaboi umai teosing eilalong numbotomu ane metuvu membombosiong.”