SiYesus Mombee Momaꞌinang Apaributoo
(Mat. 15:32-39)
8
1 Watu heꞌua najaok mabari tetoo neincong ane siira jio umai oꞌaniong.
SiYesus noleva temurit-murit-Nya ane nonjarita,
2 “Noondong teambokU eipeinconong nutoo nabari eini,
karna tolueleomo siira concoono Siaꞌu ane siira jio oꞌaniong.
3 Ane siira Utuju metencile eiVonua niira watu moorok,
siira metinong eijalang karna umai sanu najaok lamai teavar.”
4 Temurit-murit-Nya nonyimbat,
“Iamaꞌo eitana sanu moodoy eini tetoo maala mombee siira teroti jaok movosu?”
5 Lamai heꞌua Siia noꞌutanya eisiira,
“Umai soꞌuyabua teroti eisiꞌemiu?”
Nonyimbat siira,
“Pitubua.”
6 Lamai heꞌua Siia nonuju tetoo mabari heꞌua nongodung eitana.
Touk heꞌua Siia nongala pitubua teroti heꞌua,
nonggane,
tinotompignya ane nombeenaꞌonya eimurit-murit-Nya antau siira motilalaꞌonya eitoo mabari.
7 Temurit-murit niYesus valii umai sosoꞌuya tebau sanu medeꞌi,
ane touk nonggane,
Siia nonuju motilalaꞌonya valii.
8 Jojoo tetoo nenginang jaok novosu.
Lamai heꞌua siira nongincona tetoro,
teꞌababarinya pitukaranji.
9 Terekenong niira kira-kira apaributoo.
Lamai heꞌua siYesus nonuju siira petencilemo.
10 Siia selengaan nesave eipayangan concoono temurit-murit-Nya ane nelengkat eiTana nuDalmanuta.
Tetoo-too NuVarisi Nomongi Tetanda
(Mat. 16:1-4)
11 Lamai heꞌua najaok tetoo-too nuVarisi ane nompamula nebabantaong concoono siYesus.
Siira nomongi lamai Siia tetanda mabaraka lamai tesuruga antau siira maala moꞌotoi Siia lamai teꞌAlataꞌala.
12 Lamai heꞌua Siia neambok nooge ane noꞌutanya,
“Neteꞌuya tetoo-too sanu netuvu watu eini nomongi tetanda?
Tutuunya Siaꞌu nonjarita eisiꞌemiu,
eitoo-too sanu netuvu watu eini jio umai vineena tetanda.”
13 Siia nolinjoꞌi siira ane nesaveonye tepayangan concoono temurit-murit-Nya ane nelengkat umaꞌo eisantava nuBonto nuGalilea.
SiYesus Nombee Tepolambot Sima Tetoo-too NuVarisi Ane SiHerodes
(Mat. 16:5-12)
14 Temurit-murit niYesus nelingani nongomung teroti,
boi sobua teroti sanu umai eisiira eilalong nupayangan.
15 Lamai heꞌua siYesus nolambota siira,
“Paꞌajaga-jaga ane pombosi teragi nutoo-too nuVarisi ane teragi niHerodes.”a
16 Siira nejajaritaong,
“Siia nonjarita sima heꞌua,
karna siꞌita jio umai oroti.”
17 Watu siYesus moꞌotoi tesapa sanu inulara niira,
Siia nongular,
“Neteꞌuya siꞌemiu nongular jio umai oroti?
Tutuu,
siꞌemiu jiompo moꞌotoi tebatuanya tesapa sanu Uulara!
Najarimo neteompot teambok niꞌemiu?
18 Siꞌemiu omata.
Siꞌemiu jio neꞌita?
Siꞌemiu otelinga.
Siꞌemiu jio neꞌeepe?
Jio siꞌemiu nolambotonye,
19 watu Siaꞌu nononompiga limabua teroti tinilalaꞌonya eilimaributoo heꞌua?
Soꞌuyakaranji nobuꞌe tetoronya inincona niꞌemiu?”
Nonyimbat siira,
“Sompulu rokaranji.”
20 SiYesus nonjaritaonye,
“Watu pitubua teroti tinilalaꞌonya apaributoo heꞌua,
soꞌuyakaranji nobuꞌe tetoronya inincona niꞌemiu?”
Nonyimbat siira,
“Pitukaranji.”
21 Lamai heꞌua inular-Nya eisiira,
“Jiompo moꞌotoi siꞌemiu?”b
SiYesus Nepeꞌeondok Sotoo Sanu Nobuta EiBetsaida
22 Lamai heꞌua najaoko siYesus ncoono temurit-murit-Nya eiBetsaida.
Lamai heꞌua tetoo-too nongomung eisiYesus sotoo sanu nobuta ane siira nomongi Siia nonggama tetoo sanu nobuta heꞌua.
23 SiYesus nondiit telima nutoo sanu nobuta heꞌua ane nongomung siia nesuvung lamai tekampung.
Lamai heꞌua Siia nenyuui temata nutoo heꞌua ane nongembea telima-Nya eibabonya,
ane noꞌutanya eisiia,
“Initamo niꞌoo tesapa-sapa?”
24 Tetoo heꞌua nonyilig eitolo,
lamai heꞌua nonjarita,
“Siaꞌu neꞌita tetoo-too tapi jio bega mapatas sima tepuu-puu sanu lalampa.”
25 SiYesus nongembeaꞌonye telima-Nya eimata nutoo heꞌua,
lamai heꞌua tetoo neꞌita tututuu ane pineꞌeondok,
ane siia neꞌita mapatas jojoo tesagara.
26 Lamai heꞌua siYesus nongular eisiia,
“Petencilemo,
tapi inyaa mentama eikampung heꞌua.
Inyaa mongular eitoo-too sanu najarimo eiriꞌini.”
SiPetrus Nongaku SiYesus Tepuang Sanu Tinuju NuꞌAlataꞌala Mopaꞌasalamat Tetoo-too
(Mat. 16:13-20; Luk. 9:18-21)
27 Lamai heꞌua siYesus concoono temurit-murit-Nya umaꞌo eikampung-kampung sanu moꞌosuk teKota nuKaisarea Pilipi.
Pepees nelampa Siia noꞌutanya eimurit-murit-Nya,
“Inular nutoo,
sisee Siaꞌu eini?”
28 Nonyimbat siira eiSiia,
“Umai sanu nongulara,
‘SiYohanes teTopombaptis netuvuonye,’
sanu ntaninya nongulara,
‘SiNabi Elia najaokonye,’
sanu ntaninya valii nongulara,
‘Sotoo lamai tenabi-nabi luulumai.’ ”
29 Siia noꞌutanya eisiira,
“Tapi tesapa inular niꞌemiu,
sisee Siaꞌu eini?”
Nonyimbat siPetrus,
“Siꞌoo teKristus,
tepuang sanu tinuju nuꞌAlataꞌala mopaꞌasalamat tetoo!”
30 Lamai heꞌua siYesus nonyimang tututuu antau inyaa mongulara eitoo ntaninya sima Siia.
Tepongular Sanu Pabibia Sima Teꞌasesesa NiYesus Ane Tesapa Sanu Kanaboi Nogauka Nonuut Siia
(Mat. 16:21-28; Luk. 9:22-27)
31 Lamai heꞌua nompamulamo siYesus nomagurua eisiira teUnga nuManusia kanaboi mabari masesa ane jio notarima nutopomimpin-topomimpin nuYahudi,
teꞌolongian-olongian nuꞌimam ane teguru-guru nuparenta nuꞌAlataꞌala.
Lamai heꞌua nopatei ane metuvuonye eitolueleonya.
32 Tesaba eini Siia nopaꞌapatas.
Tapi siPetrus nondiit ane nongomung siYesus lamai tetoo-too ntaninya ane nompamula nonyimang Siia.
33 Lamai heꞌua siYesus negois ane pepees nongongontong temurit-murit-Nya Siia nonyimang siPetrus,
“Naꞌomo siꞌoo,
tepuang nuseetan.
Karna siꞌoo jio nomikira tesapa sanu pinikira nuꞌAlataꞌala,
boi sanu pinikira numanusia.”
34 Lamai heꞌua siYesus noleva tetoo mabari ane temurit-murit-Nya ane nonjarita eisiira,
“Ane sotoo seilu monuut Siaꞌu,
siia kanaboi molapasa teꞌeseseilunya mboto,
monyumbi tesalipnya ane monuut Siaꞌuc.
35 Karna sisee-see seilu mopaꞌasalamat tepeetuvunya,
siia kana meꞌilang tepeetuvu seende-endenya.
Tapi sisee-see neꞌilang tepeetuvunya karna Siaꞌu ane teKareva sanu Mombosi,
siia kana monarima tepeetuvu seende-endenya.
36 Jio umai ogunanya sotoo naꞌaala jojoo tesagara eijuniaa tapi siia neꞌilang tenyaanya.
37 Jio umai tesapa sanu maala noveenaꞌonya sima tebolos nunyaanya.
38 Siꞌemiu nomoia eitatanga nutoo-too eini sanu jio nesetia ane majaat.
Sisee-see mesili mongaku siira monuut Siaꞌu ane tepangajarU,
teUnga nuManusia valii kana mesili mongaku tetoo heꞌua tetoponuut-Nya watu Siia najaok concoono temalaekat-malaekat nuꞌAlataꞌala.
Watu heꞌua,
Siia majaok concoono teꞌababaraka Niama-Nya.”