Tepangajar Nutoo-too Meisi NuYahudi Nogutu Tetoo-too Nongeva TePomarenta NuꞌAlataꞌala
(Mat. 15:1-9)
7
1 Vavalii seeleo sosoꞌuya tetoo nuVarisi ane sosoꞌuya teguru nuparenta nuꞌAlataꞌala sanu najaok lamai teYerusalem neincong eipapalit niYesus moꞌinepea Siia.
2 Siira neꞌita sosoꞌuya temurit niYesus nenginang jiompo monambas telima niira monurut teada.
3 Tetoo-too nuVarisi ane jojoo tetoo nuYahudi sanu ntaninya monambas telima niira luulu heꞌuapa menginang.
Siira mogutu heꞌua molambot teada nusiopu niira luulumai.
4 Ane jiompo monambas luulu teꞌalae niira watu siira netencile lamai tepasar,
siira jiompo menginang.
Umai nabari teada ntaninya sanu tinuruꞌi niira sima mongugas tepenginunong,
tecere,
ane teꞌurong.
5 Karna heꞌua tetoo-too nuVarisi ane teguru-guru nuparenta nuꞌAlataꞌala nonjarita eisiYesus,
“Temurit-murit-Mu jio monuruk teada nusiopu niꞌita luulumai!
Siira nenginang tapi siira jiompo monambas telima niira luulu.”
6 SiYesus nonyimbat eisiira,
“Siꞌemiu tetoo-too sanu inita mombosi tapi majaat.
Tutuu tejarita nuꞌAlataꞌala sanu tinulisa niNabi Yesaya sima siꞌemiu luulu.
TeꞌAlataꞌala nongular,
‘Tetoo-too eini nomuji Siaꞌu eivivi niira.
Tapi jio eilalong nuambok niira.
7 Jio oguna siira monyombaa eiSiaꞌu.
Karna siira nomaguru tetoo-too monuut tepangajar numanusia ane jio tepangajar nuꞌAlataꞌala.’ ”
8 Lamai heꞌua siYesus nonjarita sima eini valii,
“Siꞌemiu jio nonarima tepatuju nuꞌAlataꞌala.
Siꞌemiu boi nolambot teada numanusia.”
9 Lamai heꞌua siYesus nonjarita eisiira,
“Siꞌemiu majaat nomatuvaya tepatuju nuhukum nuꞌAlataꞌala antau molambot teadamu.
10 SiNabi Musa nonjarita,
‘Poꞌongko eisiamamu ane siinamu,’
ane ‘Sisee-see monulak siamanya atau siinanya,
kanaboi siia nopatei.’
11 Tapi siꞌemiu tetoo-too nuVarisi ane teguru-guru nuhukum nuꞌAlataꞌala nonjarita,
tetoo maala mongulara eisiamanya atau siinanya,
‘Tesapa sanu kanaboi siꞌemiu maꞌaala lamai siaꞌu pinake tepombee (sanu tebatuanya tepombee eiꞌAlataꞌala).
12 Lamai heꞌua siꞌemiu jio mombeenaꞌonye siia mogutu tesapa-sapa mondulu siamanya atau siinanya.’
13 Ane sima heꞌua siꞌemiu jio pinoꞌinepeaꞌonya tejarita nuꞌAlataꞌala antau montaani teada sanu pinagurua niꞌemiu.
Mabari tesaba ntaninya sima heꞌua sanu pinogutu niꞌemiu.”
SiYesus Nomagurua Tesapa Sanu Noꞌenciina Nutoo
(Mat. 15:10-20)
14 Lamai heꞌua siYesus noleva jojoo tetoo sanu umai eiriꞌua ane nonjarita eisiira,
“Poꞌinepea mombosi eiSiaꞌu siꞌemiu jojoo,
ane moꞌotoi tesapa sanu Uulara eisiꞌemiu.
15 Jio umai teꞌaniong sanu noꞌinang nutoo maala noꞌenciinaꞌonya eimata nuꞌAlataꞌala.
Tapi tegauk sanu majaat sanu mompamula lamai teambok nutoo heꞌua sanu noꞌenciinaꞌonya.” [
16 Jojoo tetoo poꞌinepea tututuu tejaritaꞌU!] b
17 Watu siYesus nolinjoꞌi tetoo bari heꞌua ane nentama eiVonua,
temurit-murit-Nya noꞌutanya eiSiia tebatua nupogurapanong sanu inulara eikokua heꞌua.
18 Siia nonyimbat,
“Siꞌemiu selilio boi sima tetoo-too ntaninya ane jio moꞌotoi tebatua nujaritaꞌU.
Siꞌemiu jio moꞌotoi tesapa sanu ininang ane ininung jio maala menciinaꞌonya.
19 Karna teꞌaniong heꞌua jio nentama eilalong nuambok tapi nentama eilalong nuꞌompong,
lamai heꞌua sinuvuna lamai teꞌalaenya.”
Watu siYesus nongulara heꞌua,
Siia nopaꞌapatas jio umai teꞌaniong sanu mepali.
20 Lamai heꞌua Siia nonjaritaonye,
“Tesapa sanu mesuvung lamai teambok nutoo,
heꞌua menciinaꞌonya.
21 Karna lamai eilalong nuambok nutoo mompamula tepikiran sanu majaat,
monuruꞌi teꞌeseseilu sanu majaat,
mongangga,
momate,
22 monyaapi,
modoko,
teꞌajajaat,
malampoa,
monggauka mabari sanu majaat,
neꞌiri hatic,
monjaati tetoo,
majampa,
jio seilu nopagurui.
23 Jojoo sanu majaat eini mompamula lamai eilalong nuambok nutoo ane menciinaꞌonya.”
Sotoo Tebengkel Jio Tetoo NuYahudi Sanu Oꞌiman Moꞌuig
(Mat. 15:21-28)
24 Lamai heꞌua siYesus nelampa eitana sanu moꞌosuk teKota nuTirus.
Eiriꞌua Siia nentama eilalong nuvonua.
Siia jio seilu umai tetoo moꞌotoi teꞌajajaok-Nya,
tapi teꞌajajaok-Nya jio maala sinoyoka.
25 Umai sotoo tebengkel,
sanu ounga bengkel pinentamai nuꞌalus sanu majaat.
Watu tebengkel heꞌua neꞌeepe siYesus eiriꞌua,
siia najaok ane nopotuꞌu eitolo niYesus.
26 Tebengkel heꞌua jio tetoo nuYahudi tapi tetoo nuSiro-Penisia.
Siia nomongi eisiYesus mombugo teꞌalus sanu majaat heꞌua nesuvung lamai teunganya bengkel.
27 Tapi siYesus nonyimbat eibengkel heꞌua,
“Patuvaya teunga-unga nopoꞌovosu luulu,
karna jio mombosi mongala teroti nuunga ane mombeena eiasu-asu.”
28 Tebengkel heꞌua moꞌotoi siYesus nogurapang tetoo-too jio nuYahudi,
sima teasu-asu ane tetoo-too nuYahudi,
sima teunga-unga.
Lamai heꞌua siia nonyimbat,
“Oie,
tutuu heꞌua,
Siopu.
Tapi teasu nenginang teꞌaniong sanu nanavu lamai temeja.
Karna heꞌua dului siaꞌu maampo sedeꞌi.”
29 Lamai heꞌua siYesus nonjarita eisiia,
“Karna tesimbatmu tutuu,
pelampamo siꞌoo eꞌeini.
Teꞌalus heꞌua nesuvungo lamai teungamu.”
30 Tebengkel heꞌua netencile ane nongita teunganya bengkel nopoduling ane nongondok eibabok nupoꞌoturuong.
Teꞌalus sanu majaat heꞌua nesuvungo.
SiYesus Nepeꞌeondok Sotoo Telangkai Sanu Nobongol Ane Nonjarita Nongaduduut
31 Lamai heꞌua siYesus nolinjoꞌi teTana nuTirus ane nalabat teSidon umaꞌo eiBonto nuGalilea eiTana nuDekapolis.
32 Eiriꞌua lasiatoo nongomung sotoo telangkai eisiYesus.
Tetoo eini nobongol ane nonjarita nongaduduut.
Siira nomongi siYesus monggama siia antau siia meondok.
33 Lamai heꞌua siYesus nongantaa siia lamai tepeinconong nutoo heꞌua,
boi siira rotoo.
SiYesus nentamaa tebubuanong nulima eilalong nutelinga nutoo heꞌua,
lamai heꞌua siYesus netunyud ane nonggama teoyo nutoo heꞌua.
34 Lamai heꞌua,
siYesus nopongaring eilangit ane neambok nooge ane nonjarita eitoo heꞌua,
“Evata!”
sanu tebatuanya,
“Neteboꞌamo!”
35 Selengaan tetoo heꞌua maalamo neꞌeepe ane teoyonya mombosimo ane siia naalamo nonjarita mapatas.
36 Lamai heꞌua siYesus nontuuna eitoo-too sanu umai eiriꞌua antau inyaa mongulara eitoo-too sima tegauk heꞌua.
Maampo Siia nontuuna siira,
siira boi nelabi valii nokarevaa eitoo-too ntaninya.
37 Jojoo tetoo neherang tutuu tesapa sanu pinogutu niYesus ane nonjarita,
“Jojoo sanu ginaukaꞌo-Nya mombosi.
Tetoo sanu nobongol pinogutu-Nya neꞌeepe ane sanu nobobo maala nonjarita!”