Tetoo-too EiNasaret Jio Nonarima SiYesus
(Mat. 9:18-26; Luk. 8:40-56)
6
1 Lamai heꞌua siYesus nelengkat lamai tevonua niYairus concoono temurit-murit-Nya netencile eiKampung nuNasaret,
tekampung niYesus.
2 Watu teEleo nuPengondok nutoo-too nuYahudi,
siYesus nomagurua tetoo-too nuYahudi eipongganeong nuYahudi.
Mabari tetoo-too sanu neꞌeepe neherang ane siira noꞌutanya,
“Iamaꞌo siYesus moꞌotoi tejarita nuꞌAlataꞌala?
Iamaꞌo Siia najari napande sima eini?
Neteꞌuya Siia maala nonggauka tegauk-gauk sanu mabaraka?”
3 “Siia boi tebaas nuꞌayu.
Siia teunga niMaria,
ane tesiaꞌa niYakobus,
niYoses,
niYudas,
ane niSimon.
Tetuai-tuai-Nya bengkel nomoia eiriꞌini concoono siꞌita.”
4 Lamai heꞌua siYesus nongulara eisiira,
“Tetoo nunabi,
sima Siaꞌu,
inoongkoi eipapaio tapi eikampung mbotonya ane eitatanga nurururusnya ane eivonuanya jio inoongkoi!”
5 Siira jio nomarcaya eiSiia.
Karna heꞌua siYesus jio maala nonggauka mabari tegauk sanu mabaraka eiriꞌua.
Siia boi nongembea telima-Nya eibabok lasiatoo sanu nepees antau nepeꞌeondok tepees niira.
6 SiYesus neherang karna tetoo-too jio nomarcaya eiSiia.
SiYesus Nonuju Sompulu Rotoo Temurit-Nya Nonjaritaa TePomarenta NuꞌAlataꞌala Eitoo-too
(Mat. 10:5-15; Luk. 9:1-6)
Lamai heꞌua siYesus concoono temurit-murit-Nya umaꞌo papalit eikampung-kampung sanu moꞌosuk teKampung nuNasaret, ane nomagurua tetoo-too sima tejarita nuꞌAlataꞌala.
7 Lamai heꞌua Siia noleva sompulu rotoo temurit-Nya,
ane nonuju siira nesuvung rorotoo.
Jijiompo siira nelengkat,
Siia nombenii siira teꞌababaraka mombugo teꞌalus-alus sanu majaat nesuvung lamai tetoo-too.
8 Siia nonuju siira inyaa mongomung tesapa eijalang,
boi tetoꞌon,
inyaa mongomung tevalung,
tepongkolonong tesasagara,
atau tedoi.
9 Siira maala mepake tesandal,
tapi inyaa mongomung pebolosong.
10 Lamai heꞌua siYesus nonjarita eisiira,
“Ane siꞌemiu najaok eisakampungnya ane umai tetoo sanu monarima siꞌemiu,
pomoiamo ampi heꞌua jaok siꞌemiu melengkat lamai tekampung heꞌua.
11 Ane tetoo-too jio seilu monarima siꞌemiu ane siira jio seilu moꞌinepea tepangajar niꞌemiu,
pelengkato lamai tekampung heꞌua ane peꞌelivaso teavu lamai teꞌobal nupaa niꞌemiu.
Monggauka heꞌua sima tesabi eisiira teꞌAlataꞌala jio masanang eigauk niira.”
12 Lamai heꞌua siira nolinjoꞌi Siia,
nokarevaa eitoo-too,
siira kanaboi matoba.
13 Temurit-murit niYesus valii nombugo mabari teꞌalus-alus sanu majaat nesuvung lamai tetoo-too ane nolatabi telatab nusaitun eivaꞌi nutoo bari sanu nepees ane nepeꞌeondok tepees niira.
Tevaꞌi NiYohanes TeTopombaptis Inologa
(Mat. 14:1-12; Luk. 9:7-9)
14 Watu heꞌua tePuang siHerodes neꞌeepe sima siYesus karna mabari tetoo nonjarita sima sanu ginaukaꞌo-Nya.
Umai tetoo-too sanu nongulara sima siYesus,
“SiYohanes teTopombaptis pinetuvumo nuꞌAlataꞌala lamai teꞌamateong!
Heꞌua sabanya Siia maala nonggauka tegauk-gauk sanu mabaraka.”
15 Tetoo-too sanu ntaninya nongulara sima siYesus,
“Siia siNabi Eliaa sanu netencile eijuniaa lamai tesuruga!”
Umai ntaninya sanu nongular,
“Siia sotoo tenabi sima sotoo tenabi lamai watu luulumai.”
16 Watu siHerodes neꞌeepe tesapa sanu inulara nutoo-too sima siYesus,
siia nongular,
“Siia siYohanes teTopombaptis sanu inologa tevaꞌinya nutantaraꞌu.
Siia pinetuvu nuꞌAlataꞌala lamai teꞌamateong!”
17 SiHerodes nomikir sima heꞌua karna siHerodes nonuju tetantaranya ane siira neraꞌop siYohanes ane siia pinungui eipanjara.
SiYohanes iraꞌop karna tinuju niHerodias,
karna siHerodes nolapi siHerodias watu siHerodias ulengi telapi niPilipus,
terurus niHerodes.
18 SiYohanes kalepu nongular eisiHerodes,
“Siꞌoo jio maala molapi telapi niPilipus,
terurus niꞌoo!”
19 Karna heꞌua siHerodias nengkeles eisiYohanes ane seilu momate siia.
Tapi siHerodias jio mataannya monggauka tegauk heꞌua,
20 karna siHerodes nonuju tetantara monjaga siia eilalong nupanjara.
Siia nobule momate siYohanes karna siia moꞌotoi siYohanes tetoo sanu mondolong ane mapacing.
Watu siHerodes neꞌeepe siYohanes,
nabalesa tutuu karna tesapa sanu inularaꞌonya,
tapi siHerodes masanang teambok neꞌeepe siYohanes.
21 Ponouꞌongnya teꞌeseseilu niHerodias maala majari.
Siia maala monuju momate siYohanes.
SiHerodes nogutu tepestab nolambot teeleo poguunga siia.
Siia nongundang tetoo-too sanu opangka eipomarentanya,
ane tetopongomung nutantaranya ane tetoo-too sanu makaya lamai teTana nuGalilea.
22 Watu tepesta heꞌua teunga bengkel niHerodias nentama eipesta ane nonari eitolo niHerodes ane tetamu-tamunya.
Tetarian nurandaa heꞌua nopaꞌasanang teambok niHerodes ane tetamu-tamunya.
SiHerodes nongular eirandaa heꞌua,
“Pomongimo eisiaꞌu tesapa sanu seilu niꞌoo,
siaꞌu mombeena eisiꞌoo.”
23 Lamai heꞌua siHerodes nesumpa eirandaa heꞌua,
“Siaꞌu mombeena eisiꞌoo tesapa sanu nopomongi niꞌoo eisiaꞌu.
Siꞌoo maala momongi jaok santanga lamai tepomarentaongu.”
24 Lamai heꞌua terandaa heꞌua nolinjoꞌi tepesta heꞌua ane noꞌutanya eisiinanya,
“Tesapa sanu upomongi?”
Siinanya nonyimbat,
“Pomongimo tevaꞌi niYohanes teTopombaptis.”
25 Selengaan siia lolongkang nentama umaꞌo nopotolo eisipuang ane nomongi,
“Siaꞌu seilu nyapoeini siꞌoo mombeena eisiaꞌu tevaꞌi niYohanes teTopombaptis eibabok nubaki!”
26 Lamai heꞌua tututuu noondong teambok nupuang,
tapi siia jio seilu malabat tesumpanya karna tetamu-tamunya neꞌeepe tesumpanya.
27 Tepuang selengaan nonuju sotoo tetoponyambale mongala tevaꞌi niYohanes.
Tetoo heꞌua umaꞌo ane nonyambale tevaꞌi niYohanes eipanjara.
28 Tetoponyambale heꞌua nongomung tevaꞌi heꞌua eisomboꞌa tebaki ane vineenaꞌonya eirandaa heꞌua.
Siia valii nombeena eisiinanya.
29 Watu temurit-murit niYohanes neꞌeepe tegauk heꞌua siira najaok ane nongala tebatangnya,
lamai heꞌua dinulinaꞌonya eilalong nukubur.
SiYesus Nombee Nomaꞌinang Limaributoo
(Mat. 14:13-21; Luk. 9:10-17; Yoh. 6:1-13)
30 Lamai heꞌua tetopongomung-topongomung tekareva niYesus netencile lamai tepelampa.
Siira neincong concoono siYesus ane nongulara eiSiia jojoo sanu ginauka ane pinagurua niira.
31 Lamai heꞌua Siia nonjarita eisiira,
“Maemo siꞌita molinjoꞌi tepeinconong nutoo ane montani eitana sanu moodoy,
ane mengondok sampalai!”
Siira jio maala menginang,
karna nabari tetoo sanu najaok ane sanu umaꞌo.
32 Lamai heꞌua siira nesave tepayangan ane umaꞌo eitana sanu noodoy.
33 Tapi watu siira nelengkat,
nabari tetoo neꞌita ane moꞌotoi tetolo nupayangan niira.
Tetoo-too lamai jojoo tekampung eitana heꞌua nelampa nolongkang eibaowan nongaliurui siira.
34 Watu nenyau lamai tepayangan,
siYesus neꞌita tetoo nabari neincong,
noondong teambok-Nya eisiira,
karna siira sima tedomba sanu jio otopomiara.
Lamai heꞌua nompamula Siia nomagurua nabari tesaba eisiira.
35 Watu nompamulamo mondoung,
najaoko temurit-murit-Nya eiSiia ane nongular,
“Tetana eini moodoy ane nompamulamo mondoung.
36 Tujumo siira umaꞌo eikampung-kampung sanu moꞌosuk eini,
antau siira maala mongoli teꞌaniong niira.”
37 Tapi sinimbati-Nya,
“Siꞌemiu kanaboi mombenii siira menginang!”
Inulara niira eiSiia,
“Tesapa sanu noveena eisiira?
Ane siꞌami mongoli teroti,
teolinya rogatus dinarc.”
38 Tapi Siia noꞌutanya eisiira,
“Soꞌuya teroti sanu umai eisiꞌemiu?
Arai paresa!”
Touk siira nomaresa,
siira nongular,
“Limabua teroti ane rombaang tebau.”
39 Lamai heꞌua Siia nonuju jojoo tetoo heꞌua mongodung seselibok eibabok nugugus sanu monobulung.
40 Siira nongodung seselibok,
umai sanu sagatustoo,
ane umai sanu limampulutoo.
41 Touk nongala limabua teroti ane rombaang tebau heꞌua,
Siia nopongaring eilangit ane nonggane.
Lamai heꞌua Siia nonompig-nompig teroti heꞌua ane nombeenaꞌonya eimurit-murit-Nya,
antau notitilalaꞌonya eitoo-too heꞌua.
Sima heꞌua valii Siia notitilalaꞌonya rombaang tebau eisiira jojoo.
42 Siira jojoo nenginang jaok novosu.
43 Lamai heꞌua siira nongincona tetoro nuroti ane nubau teꞌababarinya sompulu rokaranji nobuꞌe.
44 Sanu nenginang teroti heꞌua umai limaributoo langkai.
SiYesus Nelampa Eibabok Nuogo
(Mat. 14:22-33; Yoh. 6:16-21)
45 Touk heꞌua siYesus nonuju temurit-murit-Nya nesave tepayangan ane melengkat mongaliuru eisantava eiBetsaida,
pepees heꞌua Siia nonuju tetoo bari metencile.
46 Touk neꞌaꞌantaong lamai siira,
Siia umaꞌo eibuut ane nonggane.
47 Watu nondoungo,
tepayangan numurit-murit niYesus umaimo eitatanga nubonto,
pepees siYesus nomoia simotoonya eibaowan.
48 Watu heꞌua Siia neꞌita siira nandasa nongkaug karna nongeva tebarat.
Lamai heꞌua kira-kira ati totolu ndoungnya Siia najaok eisiira nelampa eibabok nuogo ane seilu molabata siira.
49 Watu siira neꞌita Siia nelampa eibabok nuogo,
siira nomikir Siia heꞌua teꞌalus,
ane siira neroroa,
50 karna siira jojoo neꞌita Siia ane siira tututuu nobule.
Tapi selengaan Siia nongular eisiira,
“Paꞌasanang teambok!
Eini Siaꞌu,
inyaa nobule!”
51 Lamai heꞌua Siia nesave tepayangan niira,
ane tebarat nengondok.
Siira tututuu netetarigut,
52 karna siira jiompo valii moꞌotoi teꞌababaraka niYesus.
Maampo nongitamo siYesus nogutu mabari teroti heꞌua,
siira nabata-bata momarcaya eisiYesus.
SiYesus Nepeꞌeondok Tepees Nutoo-too EiGenesaret
(Mat. 14:34-36)
53 Watu siYesus ane temurit-murit-Nya umaꞌo eisantava,
siira najaok eibaowan nuGenesaret ane nonavua tetapu eiriꞌua.
54 Watu siira nenyau lamai tepayangan,
tetoo-too selengaan moꞌotoi siYesus.
55 Lamai heꞌua siira nelinjok umaꞌo eikampung-kampung sanu moꞌosuk.
Siira nompamula nevuntu tetoo-too nepees eibabok nubailnya eipaio siira neꞌeepe siYesus ampi heꞌua.
56 Eipapaio Siia umaꞌo eikota-kota atau eikampung-kampung,
tetoo-too nongembea tetoo-too sanu nepees eipasar ane nomongi eiSiia,
antau siira maala monyompul maampo boi tetampak nubaju-Nya.
Jojoo tetoo sanu nonyompul-Nya,
tepees niira neondok.