SiYesus Nombugo Teꞌalus Sanu Majaat Lamai Sotoo Telangkai
(Mat. 8:28-34; Luk. 8:26-39)
5
1 SiYesus concoono temurit-murit-Nya najaok eisantava nuBonto nuGalilea eitana nutoo-too nuGerasa.
2 Touk siYesus nenyau lamai tepayangan,
sotoo telangkai sanu pinentamai nuꞌalus sanu majaat najaok lamai pekuburong nolaboti siYesus.
3 Tetoo heꞌua nomoia eipekuburong.
Tetoo-too nonyoꞌarai nomungui siia,
tapi siia noꞌuig tutuu,
maampo nepake terante,
jio umai sotoo maala nomungui siia.
4 Karna nabari ngkaningo tetoo-too nomungui telima ane tepaanya nepake terante,
tapi terante heꞌua inudutaꞌonya.
Jio otoo sanu moꞌuig neraꞌop siia.
5 Eleo ndoung siia umai eipekuburong heꞌua ane eibubuut oroa-roa ane nombobogi teꞌalaenya nepake tevatu.
6 Lamai heꞌua siia neꞌita siYesus lamai teꞌavarong,
siia nelinjok,
ane nopotuꞌu eitolo niYesus nonujua teꞌoꞌongkonya.
7-8 SiYesus nongular eisiia,
“Teꞌalus sanu majaat,
pesuvungo lamai tetoo eini!”
Tetoo heꞌua neroroa,
“Yesus teUnga nuꞌAlataꞌala sanu mabaraka,
neteꞌuya Siꞌoo najaok eisiaꞌu?
Siaꞌu nomongi Siꞌoo mojanji eiꞌAlataꞌala,
inyaa Siꞌoo monyesai siaꞌu!”
9 SiYesus noꞌutanya eisiia,
“Sisee tetopemu?”
Siia nonyimbat,
“Tetopeꞌu siLegiona karna siꞌami nabari.”
10 Lamai heꞌua siia nomongi tutuu eisiYesus antau Siia jio monuju siira mesuvung lamai tetana heꞌua.
11 Eibuut heꞌua umai tepeinconong nuvavi sanu mabari pepees nonyumat.
12 Siira nomongi eisiYesus,
“Tujumo siꞌami mentama eilalong nuvavi-vavi heꞌua,
patuvaya siꞌami mentamainya!”
13 Lamai heꞌua siYesus nomatuvaya teꞌalus-alus sanu majaat nesuvung lamai tetoo heꞌua ane nentama eilalong nuvavi-vavi heꞌua.
Tepeinconong nuvavi sanu kira-kira roribumbaang heꞌua,
nelinjok nenyau eipampang umaꞌo eilalong nubonto.
Tevavi-vavi naate eilalong nubonto.
14 Tetoo-too sanu nomiara tevavi-vavi heꞌua neꞌita sanu najari heꞌua,
siira nelinjok eikota ane eijoꞌong-joꞌong.
Siira nongulara eitoo-too tesapa sanu najari.
Lamai heꞌua mabari tetoo umaꞌo nongita tesapa sanu najari.
15 Tetoo sanu mabari heꞌua najaok eisiYesus ane siira neꞌita tetoo sanu pinentamai nuꞌalus sanu majaat.
Siia nongodung odo-odoy,
nepakeano ane neꞌepikirano sanu nonoto.
Lamai heꞌua siira najari nobule.
16 Tetoo-too sanu neꞌita sanu najarimo,
nongulara eitoo mabari tesapa najarimo eitoo pinentamai.
Siira valii nongulara tesapa sanu najari eivavi-vavi heꞌua.
17 Tetoo-too lamai tekota heꞌua nomongi siYesus molinjoꞌi tetana niira.
18 Lamai heꞌua siYesus nesave tepayangan,
tetoo sanu pinentamai nuꞌalus sanu majaat heꞌua nomongi eisiYesus antau siia maala monuut concoono siYesus.
19 Tapi siYesus jio nombeena siia monuut.
SiYesus nongular eisiia,
“Naꞌomo eivonuamu ane ulara eirurusmu jojoo sanu ginauka nuSiopu Alataꞌala eisiꞌoo ane iamaꞌo Siia nongagalani eisiꞌoo.”
20 Heꞌuapa tetoo heꞌua umaꞌo eiTana nuDekapolisb nokarevaa eitoo-too jojoo tegauk sanu ginauka niYesus eisiia.
Jojoo tetoo sanu neꞌeepe neherang.
SiYesus Nopepetuvu Teunga Bengkel NiYairus Lamai Teꞌamateongnya Ane Nepeꞌeondok Tebengkel Sanu Inanggasi Nuraa
(Mat. 9:18-26; Luk. 8:40-56)
21 Touk siYesus ane temurit-murit-Nya nesave tepayangan ane netencile umaꞌo eisantava nuBonto nuGalilea,
mabari tetoo neincong eipapalit niYesus.
Watu Siia eipipit nubonto heꞌua,
22 najaok sotoo tetopomimpin nupongganeong nuYahudi,
tetopenya siYairus.
Watu siia neꞌita siYesus,
siia nopotuꞌu noꞌosuk eipaa-Nya
23 ane nomongi tutuu eisiYesus,
“Teunga bengkelu nepees novoat.
Maemo concoono siaꞌu umaꞌo eivonuaꞌu ane monggamai siia antau siia nopaꞌasalamat ane tataap netuvu!”
24 Heꞌuapa siYesus ane temurit-murit-Nya nelengkat concoono siYairus umaꞌo eivonuanya.
Pepees siira nelampa,
nabari tutuu tetoo nonuut siYesus ane siira neipipitong eipapalit niYesus.
25 Umai valii sotoo tebengkel eipeinconong nutoo heꞌua sanu nasesa sompulu rontoung inanggasi nuraa lamai teꞌoungaong.
26 Siia nasesa tutuu,
inomung eidokter-dokter ane nonouka jojoo tedoinya nombayar siira,
ane jio umai naꞌaala tesasapa,
tapi boi nelabi nepees.
27 Karna siia neꞌeepe siYesus nepeꞌeondok tetoo-too,
lamai tatanga tepeinconong nutoo heꞌua siia nongosuꞌi lamai eiteꞌe niYesus.
Lamai heꞌua siia nonggama tebaju niYesus.
28 Heꞌua ginaukaꞌonya karna siia nongular eilalong nuamboknya,
“Ane siaꞌu monggama tebaju-Nya,
siaꞌu meondok.”
29 Watu siia nonggama tebaju niYesus,
teraanya selengaan neondok ane irasainya eilalong nuꞌalaenya tepeesnya neondok.
30 Watu irasai niYesus umai teꞌuig nesuvung lamai teꞌalae-Nya nepeꞌeondok,
Siia negois nongita eipeinconong nutoo heꞌua ane noꞌutanya eisiira,
“Sisee nonggama tebajuꞌU?”
31 Temurit-murit-Nya nongular eisiYesus,
“Siꞌoo neꞌita tepeinconong nutoo sanu neipipitong eipapalit Niꞌoo.
Neteꞌuya Siꞌoo noꞌutanya,
‘Sisee nonggama Siaꞌu?’
Karna nabari tetoo nonyompul Siꞌoo.”
32 Tapi siYesus nonyilig tarus papalit nelolo tetoo sanu nonggaukaꞌonya.
33 Tebengkel heꞌua nobubuleong ane gugugur,
siia moꞌotoi siYesus nepeꞌeondok.
Siia najaok nopotuꞌu eitolo niYesus.
Siia nongulara eisiYesus,
siia sanu nonggama-Nya ane neondok.
34 Lamai heꞌua siYesus nongular eibengkel heꞌua,
“cTeꞌaparcayaongmu nepeꞌeondok siꞌoo.
Petencile eilalong nuꞌombombosiong.
Siꞌoo jio mepeesonye sima heꞌua.”
35 Watu siYesus nongular eibengkel heꞌua,
lasiatoo najaok lamai tevonua niYairus ane nonjarita eisiYairus,
“Teungamu naatemo.
Jio paraluu siꞌoo monggoyonionye siYesus ane moleva umaꞌo eivonuamu!”
36 Tapi jio tinotoli niYesus tekareva niira ane nongular eisiYairus,
“Inyaa mobule,
parcaya boi eiSiaꞌu.”
37 SiYesus nonarusa tepelampa-Nya umaꞌo eiVonua niYairus,
tapi siYesus jio nombee tetoo ntaninya monuut siira.
Boi siYakobus ane siYohanes montolituai,
ane siPetrus maala monuut.
38 Siira najaok eiVonua niYairus,
siYesus neꞌita tepeinconong nutoo ane neꞌeepe tetoo-too noꞌogoriok ane notumangis noporos.
39 SiYesus nentama eilalong nuvonua heꞌua ane Siia nonjarita eisiira,
“Neteꞌuya siꞌemiu noꞌogoriok ane notumangis?
Teunga eini jio naate,
tapi noꞌoturu.”
40 Tapi siira nengisii siYesus karna inotoi niira teunga heꞌua naatemo.
Lamai heꞌua siYesus nonuju jojoo tetoo nesuvung lamai tevonua heꞌua.
Touk heꞌua Siia nongomung siama ane siina nuunga heꞌua,
ane tolutoo temurit-Nya sanu concoono Siia nentama eilalong nukamar nuunga heꞌua.
41 SiYesus nondiit telima nuunga heꞌua ane nongular eisiia,
“Talita kum,”
sanu tebatuanya “Lei,
Siaꞌu nongular eisiꞌoo,
pembaungo!”
42 Selengaan teunga bengkel heꞌua nembaung ane nelampa,
karna teꞌumurnya sompulumo rontoung.
Jojoo tetoo sanu umai eiriꞌua neherang tutuu.
43 Tapi siYesus nontuuna tutuu eisiira antau inyaa luulu mokarevaa eitoo ntaninya tesapa sanu ginaukaꞌo-Nya.
Lamai heꞌua siYesus nonuju siira mombenii teꞌaniong eiunga heꞌua.