Tepogurapanong Sima Tetopongambur
(Mat. 12:46-50; Luk. 8:19-21)
4
1 Lamai heꞌua siYesus nompamula nomaguruonye eipipit nuBonto nuGalilea.
Siia nesave tepayangan karna nabari tutuu tetoo neincong eisevi-Nya.
Siia nongodung eilalong nupayangan eibonto.
Siia maala momaguru siira.
Jojoo tetoo heꞌua neꞌoro eibaowan eipipit nubonto.
2 SiYesus nomaguru nabari tepangajar eisiira nepake tepogurapanong.
Lamai heꞌua Siia nonjarita eisiira eilalong nupangajar-Nya,
3 “Poꞌinepea tejarita eini.
Umai tetopongambur umaꞌo nongambura.
4 Pepees siia nongambur,
sanggaat tevuꞌu nugando heꞌua nanavu eijalang.
Lamai heꞌua temamanuk najaok nenginangnya.
5 Umai sanggaat nanavu eitana sanu menimpis ane ovatu-vatu.
Nolongkang tevuꞌu nugando heꞌua netuvu,
karna tetana heꞌua menimpis.
6 Tapi watu teeleo noondako,
tetutudaong heꞌua nalante ane naate,
karna jio umai arari melenda.
7 Umai sanggaat nanavu eiolot nuvumbu nurui,
lamai heꞌua tevumbu nurui heꞌua netuvu ane inipitinya jaok tetutudaong heꞌua jio nevua.
8 Umai sanggaat nanavu eitana sanu nombosi.
Sanggaat heꞌua netuvu norumbang ane nevua.
Umai sombuꞌu najari tolumpulumbuꞌu.
Umai sombuꞌu najari onompulumbuꞌu.
Umai sombuꞌu najari sagatusmbuꞌu.”
9 Touk nonjaritaa tepogurapanong heꞌua,
Siia nonjarita,
“Jojoo tetoo poꞌinepea tututuu tejaritaꞌU!” a
SiYesus Nongulara Tebatua Nupogurapanong-Nya
(Mat. 13:10-17; Luk. 8:9-10)
10 Lamai heꞌua watu tepeinconong nutoo netencilemo,
tetoo-too concoono siYesus,
ane sompulu rotoo temurit-Nya,
noꞌutanya eiSiia tebatua nupogurapanong sanu jinaritaaꞌo-Nya eisiira.
11 SiYesus nonjarita,
“Siꞌemiu inulara sima tePomarenta nuꞌAlataꞌala,
tapi ulengi sinoyoka lamai tetoo-too sanu ntaninya.
Eisiira Siaꞌu nepake tepogurapanong mongulara sima tePomarenta nuꞌAlataꞌala.
12 Antau najarimo sanu tinulis eijarita nuꞌAlataꞌala,
‘Siira nongingita nengkaning-kaning tesapa sanu Ugauka
tapi jio meꞌita.
Siira neꞌeepe nengkaning-kaning tesapa sanu Uulara
tapi siira jio moꞌotoi tebatuanya.
Antau siira
jio matoba
ane jio noꞌampuni nuꞌAlataꞌala.’ ”
SiYesus Nombatuaa Tepogurapanong Sima Tetopongambur
(Mat. 13:18-23; Luk. 8:11-15)
13 Lamai heꞌua siYesus noꞌutanya eisiira,
“Siꞌemiu jio moꞌotoi tebatuanya tepogurapanong eini?
Ane sima heꞌua,
iamaꞌo siꞌemiu moꞌotoi tebatuanya jojoo tepogurapanong sanu ntaninya?
14 Siaꞌu mongulara tebatuanya eisiꞌemiu.
Tetopongambur heꞌua sima sotoo sanu nongulara tejarita nuꞌAlataꞌala.
15 Umai tetoo-too sima tevuꞌu sanu inambura eijalang.
Siira neꞌeepe tejarita nuꞌAlataꞌala.
Selengaan tepuang nuseetan najaok nogutu siira nelingani tejarita sanu inulara eisiira.
16 Umai tetoo-too sima tevuꞌu sanu inambura eitana sanu ovatu-vatu.
Siira neꞌeepe tejarita heꞌua,
selengaan siira nomarcaya ane nadandalan.
17 Tapi siira jio umai teꞌaparcayaong sanu moꞌuig,
sima tetutudaong sanu jio arari,
ane boi nontaang sampalai.
Watu siira masesa atau jinajaati karna nomarcaya tejarita heꞌua,
siira selengaan jio nomarcayaonye tejarita nuꞌAlataꞌala.
18 Umai tetoo-too sima tevuꞌu sanu inambura eitanga nuvumbu nurui.
Siira neꞌeepe tejarita nuꞌAlataꞌala,
19 tapi siira nogoyong,
nomikira teꞌotutuvu niira eijuniaa eini.
Siira boi seilu mongincona tesasagara nujuniaa eini,
ane nabari nengangaya teꞌeseseilu umai eilalong nuambok niira.
Karna siira nogoyong,
siira nongelingana tejarita nuꞌAlataꞌala.
Siira jio nonggauka teꞌeseseilu nuꞌAlataꞌala.
20 Umai tetoo-too sima tevuꞌu sanu inambura eitana sanu mombosi.
Siira neꞌeepe tejarita nuꞌAlataꞌala,
ane nomarcayainya lamai heꞌua siira netuvu sima tetudaong sanu nohasila nabari.
Umai sanu tolumpulungkaning teꞌababarinya,
ane ntaninya onompulungkaning teꞌababarinya,
ane ntaninya sagatusngkaning teꞌababarinya.”
Tepogurapanong Sima Tetoga
(Luk. 8:16-18)
21 Lamai heꞌua siYesus nonjarita eisiira,
“Tetoo jio mongembea tetoga sanu vinaa eiangkop nuꞌurong atau eiangkop nupoꞌoturuong,
tapi mongembea eibabok nupongembeong nutoga antau jojoo tetoo maala meꞌita.
22 Karna jojoo sanu sinoyoka sima tePomarenta nuꞌAlataꞌala nopoꞌitaa.
Jojoo sanu irahasiaa noulara.
23 Jojoo tetoo poꞌinepea tututuu tejaritaꞌU!”b
24 Lamai heꞌua siYesus nonjarita eisiira,
“Pikira mombosi tesapa sanu inepe niꞌemiu lamai Siaꞌu.
Ane siꞌemiu tututuu nomikir tesapa sanu Upagurua eisiꞌemiu,
teꞌAlataꞌala mogutu siꞌemiu moꞌotoi tebatuanya.
Lamai heꞌua teꞌAlataꞌala mogutu siꞌemiu melabi mabari moꞌotoi!
25 Tetoo-too sanu moꞌotoi ane nonuuto tesapa sanu inepe lamai Siaꞌu,
teꞌAlataꞌala mogutu siira melabi mabari moꞌotoi.
Tapi tetoo-too sanu jio moꞌotoi ane jio nonuut tesapa sanu inepe lamai Siaꞌu,
sanu siira moꞌotoi noꞌelingani niira.”
Tepogurapanong Sima Iamaꞌo Tevuꞌu-vuꞌu Nugando Netuvu
26 Lamai heꞌua siYesus nonjarita eisiira,
“TePomarenta nuꞌAlataꞌala sima sotoo sanu nongambura tevuꞌu-vuꞌu nugando eitana.
27 Siia noꞌoturu ndoungnya ane eleonya siia nembaung.
Eꞌendenya heꞌua tevuꞌu-vuꞌu nugando heꞌua nonyuvuna teumbuk ane teumbuk heꞌua noniang napangkat.
Tapi tetopongambur jio moꞌotoi tesapa sanu nogutu tetudaong heꞌua netuvu.
28 Maampo jio dinului nutopejoꞌong heꞌua,
tetana nogutu tevuꞌu-vuꞌu heꞌua netuvu.
Pamulanya tetudaong heꞌua neumbuk,
lamai heꞌua tepupuyanongnya nesuvung,
lamai heꞌua tegando eilalong nupupuyanong heꞌua najari nooge.
29 Lamai heꞌua,
watu tevuanya nelilimo,
tetopejoꞌong heꞌua selengaan umaꞌo nonyarengko,
karna tewatunya tepelolu najaoko.”
Tepogurapanong Sima Tevuꞌu Sanu Medeꞌi Najari Tetudaong Sanu Nooge
30 Lamai heꞌua siYesus nonjarita,
“Iamaꞌo siꞌita maala peselio-lio tePomarenta nuꞌAlataꞌala,
atau tepogurapanong tesapa maala nopake niꞌita nopeselio-lio?
31 TePomarenta nuꞌAlataꞌala heꞌua,
sima tesapa sanu najari eivuꞌu nubololaiac watu tinuda eitana.
Tevuꞌu nubololaia heꞌua sanu nelabi nedeꞌi lamai jojoo tevuꞌu ntaninya eijuniaa.
32 Tapi touk siꞌita nonuda,
tetudaong heꞌua netuvu ane najari nelabi nooge lamai tetutudaong ntaninya.
Tetudaong heꞌua nonyuvuna tepanga-panga sanu nooge jaok temamanuk maala mogutu tejumungnya eipanga-panga heꞌua karna mbinoluninya.”
33 Nepake mabari tepogurapanong sima heꞌua siYesus nokarevaa eipeinconong nutoo tejarita nuꞌAlataꞌala.
Siia nomaguru siira,
monurut siira maala moꞌotoi.
34 SiYesus boi nepake tepogurapanong nokarevaa eisiira sima tePomarenta nuꞌAlataꞌala.
Tapi watu siYesus boi concoono temurit-murit-Nya,
Siia nombatuaa eisiira jojoo tepogurapanong heꞌua.
SiYesus Nepepengondok Tebarat Sanu Nakancang
(Mat. 8:23-27; Luk. 8:22-25)
35 Eieleo heꞌua,
watu beimbengi,
siYesus nonjarita eimurit-murit-Nya,
“Maemo siꞌita umaꞌo eisantava nubonto.”
36 SiYesus nesave tepayangan.
Temurit-murit-Nya nonuut Siia ane nolinjoꞌimo tepeinconong nutoo heꞌua nongomung siYesus concoono siira.
Lasiangkolo tepayangan nonuut Siia.
37 Watu siira umaꞌo eisantava nubonto heꞌua,
najaok tebarat sanu nakancang ane tebalayang nentama eilalong nupayangan,
tepayangan heꞌua sedeꞌipo molodong.
38 Tapi siYesus noꞌoturu noꞌosuk eitampak nupayangan.
Tevaꞌi-Nya eibabok nutambangon.
Lamai heꞌua temurit-murit-Nya nongguguri Siia ane nongular eiSiia,
“Guru,
neteꞌuya nopatuvaya Niꞌoo siꞌita molodongo?”
39 SiYesus nembaung ane nomarentaa tebarat heꞌua ane nongular eibonto heꞌua,
“Pengondoko ane poodoy!”
Tebarat nengondok ane jiongo umai tebalayang valii eibonto.
40 Lamai heꞌua siYesus nongular eimurit-murit-Nya,
“Neteꞌuya siꞌemiu nobule sima heꞌua?
Neteꞌuya siꞌemiu jio nomarcaya Siaꞌu nomiara siꞌemiu?”
41 Tapi siira nobule ane neherang tutuu ane nejajaritaong,
“Okuasa tutuu tetoo eini,
tebarat ane tebalayang nonuruꞌi Siia.”