SiYesus Nepeꞌeondok Telima Nutoo EiEleo nuPengondok Nutoo-too NuYahudi Ane Tetoo-too NuVarisi Oniat Momate SiYesus
(Mat. 12:9-14; Luk. 6:6-11)
3
1 Lamai heꞌua siYesus nentamaonye eilalong nupongganeong nuYahudi ane eiriꞌua umai sotoo sanu noluntoy telimanya.
2 Sosoꞌuya tetoo nuVarisi nongingitai siYesus,
mepeꞌeondok telima nutoo atau jio,
eiEleo nuPengondok nutoo-too nuYahudi.
Siira seilu monyalai siYesus monggauka sanu jio maala eiEleo nuPengondok.
3 SiYesus nongulara eitoo sanu noluntoy telimanya heꞌua,
“Maemo,
peꞌoro eitolo jojoo nutoo.”
4 Lamai heꞌua siYesus noꞌutanya eisiira,
“EiEleo nuPengondok tesapa maala siꞌita monggauka?
Sanu mombosi atau sanu majaat eitoo-too?
Monyalamata tetoo lamai teꞌamateong atau momate?”
Siira boi mopoodoy.
5 SiYesus nonyiligi siira ane nongoungkul.
SiYesus noondong karna siira jio seilu nomarcaya eiSiia.
Siia nongulara eitoo sanu noluntoy telimanya heꞌua,
“Uluga telimamu.”
Siia nonguluga telimanya ane najari neondok.
6 Lamai heꞌua tetoo-too nuVarisi nesuvung noniat concoono tetoo-too niHerodes,
antau siYesus nopatei.
Tepeinconong Nutoo Nonuut SiYesus
7 Touk heꞌua siYesus concoono temurit-murit-Nya umaꞌo eiBonto nuGalilea.
Nabari tutuu tetoo nonuut siYesus lamai teTana nuGalilea ane teTana nuYudea,
8 lamai teYerusalem,
teTana nuꞌIdumea,
eitana eisantava nuBangkalang nuYordan ncoono tetana papalit teKota nuTirus ane teKota nuSidon.
Siira najaok eisiYesus,
karna siira noꞌinepea jojoo sanu ginauka niYesus.
9 Karna tepeinconong nutoo heꞌua nabari,
siYesus nonuju temurit-murit-Nya monyadiaa songkolo tepayangan antau siira jio mongipiti Siia.
10 Siia nepeꞌeondok nabari tepees nutoo,
karna heꞌua jojoo tetoo sanu nepees neipipitong seilu monggama-Nya antau tepees niira valii nopeꞌeondok.
11 Watu tetoo-too sanu pinentamai nuꞌalus sanu majaat neꞌita siYesus,
siira nopotuꞌu eitolo-Nya ane neroroa,
“Siꞌoo teUnga nuꞌAlataꞌala!”
12 Tapi siYesus tututuu nomarentaa siira,
inyaa mongulara eitoo-too sanu ntaninya.
SiYesus Noleva Sompulu Rotoo Tetopongomung-topongomung Tekareva
(Mat. 10:1-4; Luk. 6:12-16)
13 Lamai heꞌua siYesus nolalaꞌe eibuut.
Siia noleva tetoo-too sanu pinilei-Nya ane siira valii najaok eiSiia.
14 Siia nomile sompulu rotoo,
sanu valii tinopei-Nya tetopongomung-topongomung tekareva.
Siira umaꞌo concoono Siia ane tinuju-Nya mokarevaa teKareva sanu Mombosi
15 ane vinenii-Nya teꞌababaraka mombugo teꞌalus-alus sanu majaat.
16 Sompulu rotoo sanu pinilei-Nya:
siSimon,
sanu vinenii-Nya tetope siPetrus,
17 siYakobus teunga niSebedeus,
ane siYohanes tetuai niYakobus,
(sanu rorotoo vinenii-Nya tetope siBoanerges,
tebatuanya teunga-unga nugorung neꞌati)
18 siꞌAndreas,
siPilipus,
siBartolomeus,
siMatius,
siTomas,
siYakobus teunga niꞌAlveus,
siTadeus,
siSimon tetoo lamai tekolompok nuSelot,a
19 ane siYudas Iskariot,
sanu mobaluk siYesus eimusu-musu-Nya.
SiYesus Ane SiBeꞌelsebul
(Mat. 12:22-32; Luk. 11:14-23)
20 Lamai heꞌua siYesus nentama eilalong nusombonua.
Tetoo nabari najaok ane neincongonye,
jaok siYesus ane temurit-murit-Nya jio maala nenginang valii.
21 Watu terururus-Nya neꞌeepe tesaba heꞌua,
siira najaok seilu mongala Siia,
karna siirab nongular Siia jio umai monoto.
22 Umai teguru-guru nuparenta nuꞌAlataꞌala sanu najaok lamai teYerusalem.
Siira nonjarita,
“Siia pinentamai niBeꞌelsebul,”
ane,
“Nepake tekuasa niBeꞌelsebul,
tepuang nuseetan,
Siia nombugoi teꞌalus-alus sanu majaat.”
23 SiYesus noleva siira,
lamai heꞌua nonjaritaa tepogurapanong eisiira,
“Jio umai tepuang nuseetan nombugo teꞌalus-alus sanu majaat.
24 Ane tepomarenta notilal majari rokolompok sanu meeva-evaong,
tepomarenta heꞌua jio maala montaang.
25 Ane sorurus notilal majari rokolompok sanu meeva-evaong,
sorurus heꞌua jio maala montaang.
26 Ane tepuang nuseetan mongeva teꞌalus-alus sanu majaat sanu nonuut siia,
tepomarenta nupuang nuseetan jio maala montaang,
tapi majaoko ponouꞌongnya.
27 Tepuang nuseetan sima tetoo sanu noꞌuig.
Ane sotoo seilu mentama eiVonua nutoo sanu noꞌuig ane mongala tesasagaranya,
siia kanaboi momungui tetoo sanu noꞌuig heꞌua luulu.
Touk heꞌua siia maala mongangga tesasagara eilalong nuvonua heꞌua.
Ane Siaꞌu mombugo teꞌalus-alus sanu majaat,
tebatuanya Siaꞌu mondaag tepuang nuseetan.
28 Tutuunya Siaꞌu nonjarita eisiꞌemiu,
ane tetoo-too mogutu tedosa ane monjaati teꞌAlataꞌala,
tedosa niira noꞌampuni.
29 Tapi sisee-see monjaati teꞌAlus nuꞌAlataꞌala jio maꞌaala noꞌampuni seende-endenya,
karna monggauka tedosa sanu seende-endenya.”
30 Siia nonjarita sima heꞌua karna siira nongulara Siia pinentamai nuꞌalus sanu majaat.
Siira jio momarcaya teꞌababaraka niYesus lamai teꞌAlus nuꞌAlataꞌala .
Siina Ane Tetuai-tuai NiYesus Sanu Otutuunya
(Mat. 12:46-50; Luk. 8:19-21)
31 Lamai heꞌua najaok siina ane tetuai-tuai niYesus.
Pepees siira neꞌoro eiaangnya,
siira nonuju tetoo moleva Siia.
32 Umai tetoo nabari nongodung eipapalit Siia,
siira nonjarita eiSiia,
“Guru,
itaipo,
siina ane tetuai-tuai Niꞌoo umai eiaangnya ane seilu monjaoꞌi Siꞌoo.”