SiYesus Umai Teꞌababaraka Nongampuni Tedosa Nutoo
(Mat. 8:1-4; Luk. 5:12-16)
2
1 Touk nalabat lasiaeleo siYesus nentamaonye eiKota nuKapernaum,
ane tetoo-too noꞌinepea siYesus umai eisombonua.
2 Nabari tetoo neincong eisevi niYesus,
jaok jio umai nagana tepeꞌoroong eiVonua heꞌua.
Eijalang sanu moꞌosuk eibamba pentamaong nobuꞌe tetoo-too.
Lamai heꞌua siYesus nonjaritaa teKareva nuꞌAlataꞌala eisiira.
3 Apatoo najaok nongomung eisiYesus tetoo sanu noluntoy,
eibabok nubail.
4 Tapi siira jio maala nongomung eiSiia karna tepeinconong nutoo heꞌua.
Siira nomboꞌa teatok susuung siYesus.
Touk nogutu telulu,
siira nenyaua tetoo sanu noluntoy heꞌua eibabok nubailnya.
5 Watu siYesus neꞌita teꞌaparcayaong niira,
Siia nongular eitoo sanu noluntoy heꞌua,
“RurusꞌU,
tedosa niꞌoo inampunimo.”
6 Lasiatoo teguru nuparenta nuꞌAlataꞌala nongodung eiriꞌua ane nonjarita eilalong nuambok niira,
7 “Jio mombosi tetoo eini nongulara sima heꞌua.
Siia nonganggap mboto-Nya sima teꞌAlataꞌala!
Jio umai tetoo sanu maala nongampuni tedosa.
Boi teꞌAlataꞌala maala nongampuni tedosa.”
8 SiYesus moꞌotoi tesapa sanu pinikira niira eilalong nuambok niira,
Siia nongulara eisiira,
“Inyaa siꞌemiu nomikira heꞌua eilalong nuambok niꞌemiu!
9 Tesapa sanu Ugauka eitoo eini antau Siaꞌu mepopoꞌitaa teꞌababarakaꞌU?
Siaꞌu maala mongular,
‘Tedosa niꞌoo inampunimo’ atau Siaꞌu maala mongular,
‘Peꞌoromo,
ane alamo tebailmu ane pelampamo’?
10 Tapi nyapoeini Siaꞌu mepopoꞌitaa eisiꞌemiu teUnga nuManusia umai teꞌababaraka nongampuni tedosa eijuniaa!”
Siia nongular eitoo sanu noluntoy heꞌua,
11 “Siaꞌu nongulara eisiꞌoo,
pembaungo,
engkato tebailmu,
ane petencilemo eivonuamu!”
12 Tetoo heꞌua neꞌoro,
selengaan nongala tebail,
ane nesuvung lamai tevonua heꞌua.
Jojoo tetoo neꞌita.
Siira neherang neꞌita heꞌua ane nomuji teꞌAlataꞌala ane nongulara,
“Siꞌita jiompo umai neꞌita tetoo sanu noluntoy pineꞌeondok!”
SiYesus Noleva SiLewi Ane Nenginang Concoono Tetoo-too Sanu Odosa
(Mat. 9:9-13; Luk. 5:27-32)
13 Lamai heꞌua,
siYesus nesuvungonye umaꞌo eipipit nuBonto nuGalilea.
Nabari tetoo najaok eiSiia,
ane Siia nomaguru siira.
14 Pepees nelampa eipipit nubonto,
Siia neꞌita siLewi teunga niꞌAlveus nongodung eipenginconong teasel lamai tetoo-too antau noveena eipomarenta nuRomawi.
SiYesus nonjarita eisiia,
“Ponuuto Siaꞌu.”
Touk heꞌua siia nesuvung lamai tepenginconong teasel ane nonuut siYesus.
15 Lamai heꞌua siYesus concoono temurit-murit-Nya nenginang eiVonua niLewi.
Mabari tetopongincong teasel ane tetoo-too sanu odosaa nonuut nenginang concoono siYesus,
karna nabari tetoo sima heꞌua nonuut siYesus.
16 Lasiatoo teguru nuparenta nuꞌAlataꞌala,
lamai teꞌanggota tekolompok keꞌagamaꞌan sanu tinope teVarisi,
neꞌita siYesus nenginang concoono tetoo-too sanu odosa ane tetopongincong teasel.
Siira noꞌutanya eimurit-murit-Nya,
“Neteꞌuya siYesus nenginang concoono tetopongincong-topongincong teasel ane tetoo-too sanu odosa?
Aipo Siia netataguong?”
17 SiYesus neꞌeepe tepoꞌutanya niira ane Siia nogurapang,
“Tetoo-too sanu nesehat jio nomarluua tedokter,
boi tetoo-too sanu mepees sanu nomarluuaꞌonya.
Sima heꞌua valii Siaꞌu jio najaok moleva tetoo-too sanu mondolong,
tapi Siaꞌu najaok moleva tetoo-too sanu odosa.”
Temurit-murit NiYesus Jio Nepuasa Watu SiYesus Ulengi Concoono Siira
(Mat. 9:14-17; Luk. 5:33-39)
18 Vavalii seeleo temurit-murit niYohanes ane tetoo-too nuVarisi nepuasa,
tapi temurit-murit niYesus jio.
Lasiatoo najaok eisiYesus ane noꞌutanya eiSiia,
“Neteꞌuya temurit-murit niYohanes ane tetoo-too nuVarisi nepuasa tapi temurit-murit-Mu jio?”
19 SiYesus nonyimbat eisiira,
“Maalamo tetagu-tagu nuboti langkai nepuasa pepees teboti langkai concoono siira?
Eꞌendenya teboti langkai concoono siira,
siira jiompo maala nepuasa.
20 Sima heꞌua temurit-muritU,
karna Siaꞌu ulengi concoono siira.
Tapi majaok teeleo,
watu teboti langkai noala lamai siira.
Lamai heꞌua siira mepuasa eieleo heꞌua.
21 Jio otoo monampol tenaus sanu vuou eibaju sanu nopuungo,
karna ane nengkorot tenaus sanu vuou,
tebaju sanu nopuung heꞌua majari melabi mejeak.
22 Jio otoo nonubana teꞌanggur sanu vuou eilalong nupongembeong teꞌanggur lamai teꞌuli sanu nopuungo,
karna sima heꞌua,
teꞌanggur heꞌua monjeaka pongembeong heꞌua ane teꞌanggur heꞌua nojuang ane pongembeongnya norampaka.
Tapi teꞌanggur vuou kana noꞌembeaꞌonya eilalong nupongembeong sanu vuou.”
Tetoo-too NuVarisi Nonyalai Temurit-murit NiYesus
(Mat. 12:1-8; Luk. 6:1-5)
23 Najarimo eiEleo nuPengondok nutoo-too nuYahudi,
siYesus ane temurit-murit-Nya nalabat eitanga nujoꞌong nugando.
Temurit-murit-Nya nompamula nelolu tegando.
24 Tapi lasiatoo tetoo nuVarisi neꞌita tesapa sanu ginauka niira ane noꞌutanya eiSiia,
“Itai!
Neteꞌuya temurit-murit Niꞌoo jio nonuut tepangajar nuꞌagama niꞌita?
Siira nokarajaa eiEleo nuPengondok.”
25-26 Tapi siYesus nonyimbat eisiira,
“Jiompo umai siꞌemiu nombasa sima tesapa sanu ginauka tepuang siDaud?
Watu teꞌImam sanu Mooge heꞌua siꞌAbyatar,
siDaud ane tetoo-too sanu nonuut siia noorok ane siira kanaboi menginang.
Siia nentama eilalong nuVonua nuꞌAlataꞌala jinaoꞌinya siꞌAbyatar,
nomongi nenginang.
SiDaud nenginang sanggaat lamai teroti sanu vineenaꞌomo eiꞌAlataꞌala sanu maala noꞌinang boi teꞌimam-imam.
Siia valii nombeena sanggaat teroti heꞌua eitoponuut-toponuutnya ane siira valii nenginang.
Tapi teꞌAlataꞌala jio nomikir siDaud nonggauka tedosa.”